စစ်ကိုင်းတိုင်း၊ အရာတော်မြို့နယ် အမတ(၃၆၉) တပ် ပြန်လာသော စစ်ကောင်စီစစ်ကြောင်းကို မိုင်းဆွဲတိုက်ခိုက်ရာ လေးဦးသေဆုံးကြောင်း Danger Force LPDF၏ မိုင်းတာဝန်ခံက ပြောသည်။
ယမန်နေ့ (ဧပြီ ၁၄ ရက်) နံနက် ၇နာရီခန့်က အရာတော်မြို့နယ်၊ သစ်ကျင်းကြီးကျေးရွာအနီး အမတ(၃၆၉)တပ်သို့ ပြန်လာသော ခြေလျင် အင်အား ၅၀ခန့်ပါ စစ်ကောင်စီတပ်ကို ခမြင့်လမ်းခွဲအနီးတွင် ပဒေသာမိုင်း (၃)လုံး တူမီးရှေ့ထွက်ကြီး (၂)လုံးဖြင့် မိုင်းဆွဲတိုက်ခိုက်ခဲ့ကြောင်း Danger Force LPDF၏ မိုင်းတာဝန်ခံ ကိုသူသူက ပြောသည်။
ထိုသို့ တိုက်ခိုက်မှုကြောင့် စစ်ကောင်စီတပ်သား လေးဦးသေဆုံးပြီး သုံးဦး ပြင်းထန်ဒဏ်ရာရရှိသွားကြောင်း စောင့်ကြည့်ကင်းထောက်များက ဆိုသည်။
“လွန်ခဲ့တဲ့ နှစ်ရက်သုံးရက်လောက်က အရာတော် လေ့ကျင့်ရေးတပ်ကနေ အရာတော်-မုံရွာလမ်းပေါ်ကို မိုင်းရှင်းလင်းရေးထွက်တဲ့ တပ်ဖွဲ့ဗျ။ သစ်ကျင်းကြီးနဲ့ ၃၆၉ ကို ကျွန်တော်တို့အဖွဲ့တွေ ဝင်စီးတုန်းက မပြန်နိုင်သေးတဲ့အဖွဲ့တွေက မနေ့ကမနက်ခင်းမှာ ပြန်ထွက်လာတာ။ သစ်ကျင်းကြီးကနေ ၃၆၉ကို ပြန်တဲ့အဖွဲ့ပါ။ သူတို့ပြန်တဲ့လမ်းကြောင်းကို ကျွန်တော်တို့က နောက်ကနေလိုက်ပြီး မိုင်းခွဲတာပါ။”ဟု Danger Force LPDF၏ မိုင်းတာဝန်ခံ ကိုသူသူက ပြောသည်။
Public Service Announcement
စစ်ကောင်စီဘက်က ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
အဆိုပါမိုင်းဆွဲတိုက်ခိုက်မှုအပြီးတွင် စစ်ကောင်စီတပ်သားများ၏ လက်နက်ငယ်များဖြင့် ရမ်းသမ်းပစ်ခတ်မှုကြောင့် အနီးနားရှိ ဒေသခံများ ထွက်ပြေးတိမ်းရှောင်ခဲ့ရကြောင်း သိရသည်။
ထို့အပြင် စစ်အုပ်စုဝင်များ၏ ထိခိုက်သေဆုံးသူများအား အရာတော်မြို့မှ စစ်ကားအလွတ် (၂) စီးဖြင့် လာတင်သွားကြောင်း၊ ထိုစစ်ဆင်ရေးကို Danger Force LPDFနှင့် ကြယ်နီတပ်ဦးတို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
Danger Force LPDF အဖွဲ့သည် ဧပြီ ၁၀ရက် ညနေပိုင်းကလည်း အရာတော်မြို့အနောက်ဘက်ရှိ စစ်ကောင်စီ၏ စစ်ဆေးရေးဂိတ်အား (၄၀) မမဖြင့် ပစ်ခတ်တိုက်ခိုက်ခဲ့ရာ နှစ်ဦးသေဆုံးပြီး နှစ်ဦး ပြင်းထန်ဒဏ်ရာရရှိသွားကြောင်း ထုတ်ပြန်ထားသည်။
