စစ်ကောင်စီတပ် စစ်ကြောင်းကြောင့် ဒေသခံ သုံးထောင်ကျော် ထွက်ပြေးတိမ်းရှောင်နေရ
စစ်ကောင်စီတပ် စစ်ကြောင်းကြောင့် ဒေသခံ သုံးထောင်ကျော် ထွက်ပြေးတိမ်းရှောင်နေရစစ်ကိုင်းတိုင်း၊ ခင်ဦးမြို့နယ် မကျီးအုပ်ကျေးရွာသို့ စစ်ကြောင်း သုံးကြောင်းဖြင့် ဝင်ရောက်လာသည့် စစ်ကောင်စီတပ်ကို မိုင်းဆွဲတိုက်ခိုက်ရာ ၇ ဦး သေဆုံးကြောင်း ခင်ဦးနယ် ဒေသခံကာကွယ်ရေးမဟာမိတ်အင်အားစု – KURDAF သတင်းနှင့် ပြန်ကြားရေးတာဝန်ခံက ပြောသည်။
ယမန်နေ့ (ဧပြီ ၁၈ရက်) နံနက် ၆နာရီခန့်က ရေဦးမှ ထွက်လာသော အင်အား ၉၀ဝန်းကျင်ပါ စစ်ကောင်စီတပ် စစ်ကြောင်းသည် ပျူစောထီးများနှင့် ပူးပေါင်းကာ စစ်ကြောင်းထိုးလာခဲ့သည်။
ထို့နောက် မကျီးအုပ်ကျေးရွာဘက်သို့စစ်ကြောင်းသုံးကြောင်းခွဲဖြန့်၍ လက်နက်ကြီး၊ လက်နက်ငယ်၊ စက်ကလေးများဖြင့် တရစပ်ပစ်ခတ် ဝင်ရောက်လာခဲ့ကြောင်း၊ အဆိုပါ စစ်ကြောင်းကို အသင့်စောင့်ဆိုင်းနေခဲ့ပြီး မိုင်းပဒေသာ (၄)တွဲ၊ မိုင်း ၁၆ လုံးဖြင့် တိုက်ခိုက်ခဲ့ပြီး PLA ရဲဘော်များနှင့် အပြန်အလှန် ၅ မိနစ်ခန့်ကြာ ထိတွေ့တိုက်ပွဲဖြစ်ခဲ့ပြီးစစ်ကောင်စီတပ်သားများ အများအပြား ဒဏ်ရာရရှိကာ သုံးဦးလဲကျသွားသည်ကို ရဲဘော်များက မျက်မြင်တွေ့ ရှိခဲဲ့ကြောင်း KURDAF သတင်းနှင့် ပြန်ကြားရေးတာဝန်ခံက ပြောသည်။
“အဝေးကလာတဲ့ စစ်ကြောင်း မဟုတ်ပါဘူး။ ရေဦးရယ်၊ ရွာသစ်ကုန်းရယ်၊ မူးတိမ်ချောင်းရယ် ပေါင်းပြီးလာတာပါ။ သုံးကောင်လဲကျ သွားတာတော့ မျက်မြင်ပါ။ တိုက်ပွဲပြီးမှအဆက်အစပ်နဲ့ စုံစမ်းကြည့်တော့ ၇ ကောင်သေ။ ၅ ကောင်ဒဏ်ရာရတယ်လို့ ပြန်သိရတယ်။ ခုတော့ သက်ဆိုင်ရာ ၀ပ်ကျင်းဆီ ပြန်သွားတယ်”ဟု အထက်ပါတာဝန်ခံက ဆိုသည်။
Public Service Announcement
သို့သော် စစ်ကောင်စီတပ်၏ ထိခိုက်သေဆုံးမှုများကို လူထုနွေဦးက သီးခြားအတည်ပြုနိုင်ခြင်း မရှိသေးပေ။
ယင်းစစ်ဆင်ရေးကို ပြည်သူ့လွတ်မြောက်ရေးတပ်မတော် (PLA)၊ ခင်ဦးနယ် ဒေသခံကာကွယ်ရေး မဟာမိတ်အင်အားစု – Kurdaf ညီနောင်များဖြစ်ကြသော TIGER – Local People Defence Force Khin U၊ ဒေါင်းနီ LDF၊ ဒို့ညီနောင် LDF အဖွဲ့များ ပူးပေါင်းတိုက်ခိုက်ခဲ့ကြောင်း အသိပေးထားသည်။
အဆိုပါ စစ်ကြောင်းသည် ယမန်နေ့က ခင်ဦးနယ်၊ ပျဥ်ထောင်ပျူစောထီးရွာရှိ စပါးများကို ရေဦးမြို့မှ ကား လေးစီးဖြင့် လာရောက်သယ်ယူခဲ့ကြောင်း၊ ရေဦး-ခင်ဦးလမ်းအတိုင်း ကင်းပုန်းဝပ်၍ လက်နက်ကြီး၊ ငယ်များဖြင့် ပစ်ခတ်ခဲ့သောကြောင့် ဒေသခံပြည်သူ သုံးထောင်ကျော် မှာ နှစ်ရက်ဆက် ထွက်ပြေးတိမ်းရှောင်နေရကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောသည်။
