ပျူသုံးဦးအား ဖမ်းဆီးမိပြီး လက်နက်ခဲယမ်းအချို့ သိမ်းဆည်းရမိ
မန္တလေးတိုင်း၊ သပိတ်ကျင်းမြို့နယ်တွင် ရွာသားများအား ပျူစောထီးမလုပ်မနေရ စေခိုင်းနေသည့် ပုဏ္ဏားကြီး(ပျူ)ကျေးရွာအား ဝင်ရောက်တိုက်ခိုက်ရာ လက်နက်ခဲယမ်းအချို့သိမ်းဆည်းနိုင်ခဲ့ပြီး ပျူသုံးဦးအား ဖမ်းဆီးမိခဲ့ကြောင်း ပြင်ဦးလွင်ခရိုင်(ပကဖ)၊ ဗိုလ်လင်းယုန်တပ်ဖွဲ့၏ ခေါင်းဆောင် ဗိုလ်ဇီးရိုးဝမ်းက ပြောသည်။
ယမန်နေ့ (ဇွန်လ ၁ရက်)က ဗိုလ်လင်းယုန်တပ်ဖွဲ့နှင့် ပူးပေါင်းတပ်ဖွဲ့များသည် သပိတ်ကျင်းမြို့နယ်၊ ပုဏ္ဏားကြီး(ပျူစောထီး)ရွာအား ဒုတိယအကြိမ်ထပ်မံ တိုက်ခိုက်ခဲ့သည်။
အဆိုပါ ကျေးရွာအား ဒရုန်းဖြင့် ဗုံးသီးတစ်လုံးကြဲချတိုက်ခိုက်ပြီး မြေပြင်မှ တပ်ဖွဲ့ နှစ်ဖွဲ့ခွဲ၍ ရွာအတွင်း ဝင်ရောက်ခဲ့ခြင်းဟု ဆိုသည်။
ကျေးရွာအတွင်း နှစ်ဖက်အပြန်အလှန်ပစ်ခတ်မှုဖြစ်ပွားရာ ပျူ သုံးဦး ထိခိုက်ဒဏ်ရာရပြီးထွက်ပြေးသွားခဲ့ကြောင်း ဗိုလ်ဇီးရိုးဝမ်းက ပြောသည်။ ထို့အပြင် ကင်းကုန်းတွင် ကျန်နေသော ပျူ သုံးဦးအား ဖမ်းဆီးမိခဲ့ပြီး ဆိုင်ကယ်(၅)စီး သိမ်းဆည်းရခဲ့ကြောင်း ၎င်းက ပြောသည်။
Public Service Announcement
“မီးရှို့တာတွေ မလုပ်ခဲ့ပါဘူး။ ဖမ်းဆီးလာတဲ့ သုံးယောက်ကိုတော့ စစ်ဆေးနေပါတယ်။ အဲရွာကပျူတွေက မြစ်ဘေးမှာ သစ်ဖောင်၊ ဝါးဖောင်တွေကို ပိုက်ဆံတောင်းတယ်။ အေးချမ်းစွာနေချင်တဲ့ ရွာသားတွေကိုလည်း ပျူစောထီးမလုပ်မနေရဆိုပြီး ဖိအားပေးခိုင်းစေတာတွေရှိပါတယ်။”ဟု ဗိုလ်ဇီးရိုးဝမ်းက ပြောသည်။
ကျေးရွာရှိ စစ်ကောင်စီခန့်အုပ်ချုပ်ရေးမှူးနေအိမ်ကိုလည်း ဝင်ရောက်ရှာဖွေခဲ့ရာ ပျူစာရင်းစာအုပ်၊ တူမီး(၂)လက်၊ တူမီး ယမ်းဆက်စပ်ပစ္စည်းများ၊ လက်လုပ်တစ်တောင့်ထိုး (၂)လက်၊7.62ကျည်၊ ကျည်ဘောက်၊ (၁၂၀)မမ ပို့ယမ်း၊ ဓားနှစ်လက် အစရှိသည့်ပစ္စည်းများသိမ်း ဆည်းရရှိခဲ့ကြောင်း စစ်ဆင်ရေးတွင် ပါဝင်ခဲ့သော အဖွဲ့များက အသိပေးသည်။
ပုဏ္ဏားကြီးရွာအနေဖြင့် ပျူရွာအဖြစ် ဆက်လက်လုပ်ဆောင်နေပါက နောက်တစ်ကြိမ်တွင် ယခုထပ်ပို၍ ရှင်းလင်းခြင်းများ လုပ်ဆောင်သွားမည်ဟု ဗိုလ်လင်းယုန်တပ်ဖွဲ့က သတိပေးသည်။
စစ်ဆင်ရေးအား ဗိုလ်လင်းယုန်တပ်ဖွဲ့(ပြင်ဦးလွင်ခရိုင် ပကဖ)၊ ဗိုလ်ဇင်ယော် PDF တပ်ဖွဲ့၊ Nine PDF တပ်ဖွဲ့နှင့် Northern Tigers Group တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
ဗိုလ်လင်းယုန်တပ်ဖွဲ့သည် ပုဏ္ဏားကြီးရွာအား ၂၀၂၂ ဒီဇင်ဘာ ၂၄ ရက်ကလည်း ဝင်ရောက်တိုက်ခိုက်ခဲ့သေးသည်။
