ကျောက်မြောင်းလမ်းပိုင်းတွင် စစ်ကောင်စီတပ်က လူငယ်နှစ်ဦး သတ်ဖြတ်
စစ်ကိုင်းတိုင်း၊ ရွှေဘိုမြို့နယ်တွင် စစ်ကောင်စီတပ်သားများအတွက် ရိက္ခာဝယ်ပြန်လာသည့် ပျူစောထီး သုံးဦးအားတားဆီးရာ ထွက်ပြေး၍ ပစ်ခတ်ရာမှ သုံးဦးလုံး သေဆုံးကြောင်း ဗိုလ်ကျားရိုင်း – ရွှေဘို (LPDF)အဖွဲ့က ပြောသည်။
ဇူလိုင် ၁ရက် ညနေ ၄နာရီခွဲခန့်က ရွှေဘိုမြို့နယ်၊ ဂျိုးမြေဇင်းကျေးရွာအနီးတွင် ပစ်ခတ်မှုဖြစ်ပွားခဲ့ခြင်း ဖြစ်သည်။
မင်းသက်ခိုင်၊ အေးချမ်းအောင်နှင့် နီတွတ်တို့ ပျူစောထီးသုံးဦးသည် တည်သီးတောရွာနှင့် မင်းဘေးကျေးရွာရှိ စစ်ကောင်စီတပ်သားများနှင့် ပျူစောထီးများအတွက် ရွှေဘိုမြို့ပေါ်မှ ရိက္ခာဝယ်ပြန်လာခြင်းဖြစ်ကြောင်း ဗိုလ်ကျားရိုင်း – ရွှေဘို (LPDF) အဖွဲ့က ပြောသည်။
ထော်လာဂျီဖြင့် ပြန်လာသည့် ၎င်းတို့ သုံးဦးအား တားဆီးခဲ့ရာ ပြန်လည်ခုခံထွက်ပြေးသဖြင့် လိုက်လံပစ်ခတ်ရာ သုံးဦးစလုံး ပွဲချင်းသေဆုံးခဲ့ကြောင်း ဗိုလ်ကျားရိုင်း – ရွှေဘို (LPDF) အဖွဲ့က ပြောသည်။
Public Service Announcement
“ပျူ သုံးဦးလုံးက မင်းဘေးရွာကပါ။ ထော်လာဂျီနဲ့ပြန်လာတာ။ သူတို့ ပြန်ပြီးပစ်ချိန်မရဘူးဗျ။ ဆင်းပြေးတာ။ တရပ်စပ် ကျွန်တော်တို့ရဲဘော်တွေက လိုက်ပစ်တာ။ ပြန်လည်ခုခံဖို့ လက်နတ်ပါလာမှန်းသိလို့။ အချိန်က ၁၅မိနစ်ဝန်းကျင်ပဲကြာမယ်။”ဟု ဗိုလ်ကျားရိုင်း – ရွှေဘို (LPDF) အဖွဲ့ပြန်ကြားရေးတာဝန်ခံက ပြောသည်။
၎င်းတို့ထံမှာ သေနတ် ၂လက်၊ လက်ပစ်ဗုံး ၂လုံးနှင့် သယ်ဆောင်လာသော အရက်ဖာ၊ ဘီယာဖာနှင့် ရိက္ခာများအား သိမ်းဆည်းရမိခဲ့ကြောင်း ဗိုလ်ကျားရိုင်း – ရွှေဘို (LPDF) အဖွဲ့က အသိပေးသည်။
အဆိုပါ စစ်ဆင်ရေးကို ဗိုလ်ကျားရိုင်း – ရွှေဘို (LPDF) အဖွဲ့နှင့်အတူ၊ ကျားပျံလူငယ်အဖွဲ့ ၊ ဗိုလ်ဂျပန်ကြီး – SHWEBO LPDF၊Golden Eagle – ZBG (LPDF)၊ တောင်သူကြီးများအဖွဲ့- LDF၊ရွှေဘိုမြို့နယ်တိုက်နယ် – ၂ မဟာမိတ်ညီနောင်များ ပူးပေါင်းတိုက်ခိုက်ခဲ့ကြောင်း အသိပေးထားသည်။
ဇူလိုင် ၁ ရက်ကပင် ရွှေဘိုမြို့နယ်၊ရွှေဘို – ကျောက်မြောင်းလမ်းပေါ်သို့ စစ်ကြောင်းထိုးလာသော စစ်ကောင်စီတပ်က လူငယ် နှစ်ဦးအား သတ်ဖြတ်ခဲ့ကြောင်း ဒေသတွင်းသတင်းရင်းမြစ်များက ပြောသည်။
ပြီးခဲ့သည့် ဇွန်လ ၆ရက်ကလည်း ရွှေဘိုမြို့နယ်၊ တည်သီးတောရွာရှိ ပျူစောထီးစခန်းကို တော်လှန်ရေးတပ်များ ဝင်ရောက်တိုက်ခိုက်ခဲ့ရာ ပျူစောထီးအဖွဲ့ဝင်များ ထိခိုက်သေဆုံးမှုရှိခဲ့သည်။
