ကလေးမြို့ ရာဇဂြိုလ်ရဲဘက်စခန်း(၂)အား သိမ်းပိုက်စဉ်ထွက်ပြေးသည့် စစ်ကောင်စီတပ်သား လေးဦးကို ပြန်လည်ဖမ်းမိ

စစ်ကိုင်းတိုင်း ကလေးမြို့နယ်ရှိ ရာဇဂြိုလ်ရဲဘက်စခန်း(၂)အား သိမ်းပိုက်စဉ် ထွက်ပြေးပြီး ပုန်းနေသည့် စစ်ကောင်စီတပ်သား လေးဦးကို သေနတ် နှစ်လက်အတူ ယနေ့ ဖမ်းဆီးရမိကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက သတင်းထုတ်ပြန်သည်။

နိုဝင်ဘာ ၃ရက် နံနက် ၃ နာရီခွဲခန့်က ကလေးမြို့နယ်၊ ရာဇဂြိုလ်ကျေးရွာအနီးရှိ အကျဉ်းစခန်း အမှတ်(၁)နှင့် အမှတ်(၂)တို့ကို အထူးလှုပ်ရှားတပ်ရင်း(၂)က ဝင်ရောက်တိုက်ခဲ့ရာတွင် ထွက်ပြေးသွားသည့် စစ်ကောင်စီတပ်ဖွဲ့ဝင်များ ဖြစ်သည်။

ဖမ်းဆီးရမိထားသည့် စစ်ကောင်စီတပ်ဖွဲ့ဝင်များကို နိုင်ငံတကာ စစ်သုံ့ပန်းစည်းမျဉ်းစည်းကမ်းများနှင့်အညီ ထိန်းသိမ်းထားကြောင်းလည်း ထုတ်ပြန်ချက်တွင် ဖော်ပြထားသည်။

အဆိုပါ အထူးလှုပ်ရှားတပ်ရင်း (၂)က ဝင်ရောက်တိုက်ခိုက်ရာတွင် အကျဉ်းစခန်း (၂)အား သိမ်းပိုက်ရမိပြီး အကျဉ်းစခန်း (၁)မှ စစ်ကောင်စီခန့် ရဲနှင့်ဝန်ထမ်း ၂၀ခန့်က ပြည်သူ့ဘက်ကို ကူးပြောင်းလာခဲ့၍ အမှတ် (၁)စခန်းကိုပါ သိမ်းဆည်းရမိခြင်းဖြစ်သည်ဟု ကာကွယ်ရေးဝန်ကြီးဌာနက ထုတ်ပြန်ထားသည်။

Public Service Announcement

အဆိုပါ စခန်းများကို တော်လှန်ရေးတပ်ဖွဲ့များက သိမ်းပိုက်ပြီးနောက် နေ့လယ် ၁၂ နာရီ ၄၆ မိနစ်ခန့်တွင် စစ်ကောင်စီတပ်က တိုက်ခိုက်ရေးလေယာဉ်ဖြင့် ဗုံးကြဲတိုက်ခိုက်ခဲ့သည်။