ယင်းမာပင်တွင် စစ်ကောင်စီ လက်နက်ကြီးဖြင့် ပစ်ခတ်၍ ပြည်သူငါးဦိးသေဆုံး

ဇေအောင်/People’s Spring

စစ်ကိုင်းတိုင်း၊ ယင်းမာပင်မြို့နယ်၊ ထန်းတောကြီးကျေးရွာတွင် စစ်ကောင်စီတပ်က လက်နက်ကြီးဖြင့် ပစ်ခတ်ခဲ့၍ ပြည်သူ ငါးဦိးသေဆုံးခဲ့သည်။

ယမန်နေ့(သြဂုတ် ၇ရက်) ညနေ ၃ နာရီ မိနစ် ၅၀ ခန့်က ယင်းမာပင်မြို့နယ်၊ အောင်ဇေယျတပ်ကုန်းမှ ထန်းတောကြီးကျေးရွာသို့ လက်နက်ကြီးဖြင့်ပစ်ခတ်ခဲ့ရာ ကျေးရွာရှိ ကွမ်းယာဆိုင်အတွင်း ကျရောက်ပေါက်ကွဲပြီး ပြည်သူ ငါးဦးသေဆုံးကာ သုံးဦးဒဏ်ရာရရှိခဲ့ကြောင်း ယင်းမာပင်မြို့နယ်သတင်းမှန်ပြန်ကြားရေးအဖွဲ့က အသိပေးသည်။

Public Service Announcement

သေဆုံးသူများမှာ ဦးလွှမ်းမိုးနိုင်၊မောင်မြင့်သန်းအောင်(ခ)ဖိုးဝ၊မောင်ဖြိုးဇေယျာ၊‌‌မောင်ရဲကိုကိုတိုးနှင့် ဖိုးသက်သက်‌‌ဝေတို့ဖြစ်ပြီး ဒဏ်ရာရသူ ၃ ဦးမှာ ဆိုင်ပိုင်ရှင်မိသားစုဝင်များဖြစ်ကြောင်း သိရသည်။

ယမန်နေ့ညနေပိုင်းကလည်း အောင်ဇေယျတပ် ကုန်းမှ စစ်ကောင်စီတပ်သည် ယင်းမာပင်မြို့နယ် ကွေ့ချောင်းကျေးရွာနှင့် နဘူးတောကျေးရွာမှ ပြည်သူအများအပြားအား ဖမ်းဆီးခေါ်ဆောင်သွားကြောင်း ယင်းမာပင်မြို့နယ်သတင်းမှန်ပြန်ကြားရေးက ထုတ်ပြန်ထားသည်။

ဖြစ်စဥ်နှင့်ပတ်သက်၍ ဒေသကာကွယ်ရေးအဖွဲ့များထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပေ။

အောင်ဇေယျကုန်း၌ တပ်စွဲထားသော စစ်ကောင်စီတပ်သည် အနီးဝန်းကျင်ရွာများအား မကြာခဏ လက်နက်ကြီးဖြင့် ပစ်ခတ်တိုက်ခိုက်နေ၍ ပြည်သူထိခိုက်သေဆုံးမှုများရှိနေသည်။