ဇေအောင်/People’s Spring
စစ်ကိုင်းတိုင်း၊ ရွှေဘိုမြို့တွင် PDF ရဲဘော်များထောင်ထားသော မိုင်းများရှင်းလင်းသည့် စစ်ကောင်စီတပ်နှင့် ပျူစောထီးများ မိုင်းပေါက်ကွဲ၍ ထိခိုက်မှုရှိကြောင်း သတင်းရရှိသည်။
စက်တင်ဘာ ၄ ရက်က နံနက်က ရွှေဘိုမြို့နယ်၊ ဇီးကုန်းလေးပျူစောထီးရွာစခန်းမှလာသော အင်အား ၁၀၀ကျော်ပါ စစ်ကောင်စီတပ်နှင့် ပျူစောထီးများသည် စစ်ကြောင်းနှစ်ကြောင်းခွဲ၍ စစ်ကြောင်းထိုးလာခဲ့သည်။
Public Service Announcement
စစ်ကြောင်းတစ်ကြောင်းသည် နေ့လယ် ၁နာရီခွဲခန့်တွင် ရွှေဘိုမြို့ အနောက်ဘက် မြို့ရိုးပေါ်အရောက် PDF ရဲဘော်များထောင်ထားသောမိုင်းများအား တွေ့ရှိပြီး ရှင်းလင်းစဥ် မိုင်းကွဲ၍ စစ်ကောင်စီတပ်နှင့် ပျူစောထီးများ ထိခိုက်မှုရှိကြောင်း လျှပ်စီးမုန်တိုင်း ပကဖအဖွဲ့မှ သတင်းနှင့်ပြန်ကြားရေးတာဝန်ခံ ကိုအောင်ဒင်က ပြောသည်။
ထို့အပြင် ၎င်းတို့ကို ဒရုန်းဖြင့် ဗုံးသီး ၂လုံးချ တိုက်ခိုက်ရာ ပျူစောထီး သုံးဦး ထိခိုက်ဒဏ်ရာရရှိခဲ့ကြောင်း ၎င်းက ပြောသည်။
“ဒီနေ့ ဒဏ်ရာရတဲ့ စခ၊ပခတွေ ရွှေဘိုမှာ မသက်သာလို့ မန္တလေးလွှဲတယ်လို့ ဖရဲသီးကနေ သတင်းပို့ထားတယ်။”ဟု ကိုအောင်ဒင်က ပြောသည်။
ထိုနေ့ပင် ဒရုန်းဖြင့် ဗုံးသီး လေးလုံးချ တိုက်ခိုက်ရာ ပျူစောထီးတစ်ဦးသေဆုံးပြီး နှစ်ဦး ပြင်းထန်ဒဏ်ရာရရှိကြောင်း ရွှေဘိုပကက ပြောသည်။ စစ်အုပ်စု ထိခိုက်သေဆုံးမှုများနှင့်ပတ်သက်ပြီး လူထုနွေဦးက သီးခြားအတည်မပြုနိုင်ပေ။
