နေ့သစ်/ People’s Spring
နေပြည်တော်ပျဥ်းမနား
မိသားစုပိုင်း စပါးခင်း ငါးဧကခန့်ရေဘေးကြောင့် နွံနစ်ခဲ့ပြီး နွားလေးကောင်းပါ သေဆုံးခဲ့၍ နေပြည်တော် ပျဉ်းမနားမြို့နယ်မှ လယ်သမား ဦးညိုထွန်း (အမည်လွဲ)တစ်ယောက်ရင်ဝယ် အပူမီးတောက်နေသည်။ တော်သလင်းလတွင် မကြုံ
စဖူး ကြုံခဲ့ရသောရေဘေးက အလှူရှင်မရှိပါကစပါးစိုက်နေသော တောင်သူပင် ထမင်းပင် ငတ်မည့်ကိန်းဟု ဦးညိုထွန်းက ရင်ဖွင့်သည်။
“လယ်က နှုန်းတွေလွှမ်းသွားလို့ စိုက်မရတော့ဘူး။ ဘာအလုပ်မှလည်း မရှိတော့ဘူး။ အိမ်လည်း ရေမြုပ်သွားလို့ နေလို့မရလို့ ရွာကျောင်းက ကယ်ဆယ်ရေးစခန်းလာနေတာ”ဟု ဦးညိုထွန်း လူထုနွေဦးသို့ပြောပါသည်။
Public Service Announcement
နေပြည်တော်ရှိ အာဏာသိမ်းစစ်ကောင်စီ ရုံးများနှင့် မိုင် အနည်းငယ်သာဝေးသော်လည်း စက်တင်ဘာ ၂၁ ရက်အထိစစ်ကောင်စီထံမှ မည်သည့်အကူအညီမှ မရသေးဟုသူကပြောပါသည်။
ရှမ်းပြည်နယ်၊ ကလောမြို့၊ အင်းလေးကန်
ရေဘေး နှင့် မြေပြိုမှုဘေး သမိုင်းတလျှောက်အဆိုးဆုံး ရင်ဆိုင်ခဲ့ရသော ရှမ်းပြည်နယ်တောင်ပိုင်း ၊ ကလောမြို့မှ ဒေသခံတစ်ဦးကလည်း စစ်ကောင်စီထံမှ စက်တင်ဘာ ၂၁ ရက်အထိ မည်သည့်အကူအညီမျှ မရသေးဟု ပြောပါသည်။
“နွံတွေ ရှင်းဖို့က ကျတော်တို့အားနဲ့ မရဘူး။ ဒါပေမယ့် စကစက ဘာအကူအညီမှ မပေးဘူး။ ဘာဆက်လုပ်ရမှန်းမသိလို့ မြို့ခံတွေ တိုင်ပင်နေကြတုန်း” ဟု ၎င်းကပြောပါသည်။
ကမ္ဘာသိအင်းလေးကန်မှ တောင်သူ ဦးခွန်ထွန်း(အမည်လွှဲ) ကလည်း “ကျနော်စပါးတွေစိုက်ထားတာ။ ရိတ်ဖို့ ရက် ၂၀ လောက်ပဲလိုတော့ အကုန်မြုပ်သွားပြီ။ နောက်ပြီး ပန်းစိုက်ခင်းပေါ့။ သူလည်း ခူးရတော့မယ်။ တချို့နည်းနည်းပါပါးရွေးပြီးခူးလို့ရနေပြီ။ ဒီနှစ်စျေးကလည်းကောင်းတယ်။ စျေးကောင်းတဲ့နှစ်ကြမှ အကုန်မြုပ်တာပဲ။ စိုက်ခင်းနှစ်ခုပေါင်းဆိုရင် အရင်းအနှီးချည်းပဲသိန်း(၁၀၀)ဝန်းကျင်လောက် ဆုံးရှုံးသွားတယ်”ဟုရင်ဖွင့်သည်။
အင်းလေးမှတောင်သူများမှာ ဦးခွန်ထွန်းကဲ့သို့ ဆုံးရှုံးမှုများသော်လည်း စက်တင်ဘာ ၂၂ ရက်အထိ့ စစ်ကောင်စီက အကူအညီပေးရန် နေနေသာသာ ပျက်စီးဆုံးရှုံးမှု စာရင်းပင်လာမကောက်သေးဟု သိရသည်။
“ဒီဘက်မှာ (စစ်ကောင်စီ)အခုချိန်ထိတော့ ကွင်းဆင်းတာဘာညာ အဲလိုမျိုး မတွေ့မိသေးဘူး။ အလှူရှင်နည်းနည်းပါးပါးလာလှူတာတော့ရှိတယ်။ အဓိကတော့ ဆန်၊ ဆီ၊ ခေါက်ဆွဲခြောက်နဲ့ အသင့်စားလို့ရတဲ့ ဟာလေးတွေပါတယ်။ နောက်ပြီး အခြောက် အခြမ်းလေးတွေပေါ့။ အဲလောက်ပါပဲ”ဟု ၎င်းကစစ်ကောင်စီထံမှ အကူအညီမရဘဲ ပြည်သူ အချင်းချင်းပေးသောအကူအညီအကြောင်းပြောပါသည်။
မန္တလေးတိုင်း၊ ဝမ်းတွင်းနှင့် မြစ်သားမြို့နယ်
ဝမ်းတွင်းနှင့် မြစ်သားမြို့နယ်တွင်လည်း လူမှုကူညီရေးအသင်းအဖွဲ့များ၊ ပရဟိတအဖွဲ့များ ကသာ လာရောက်ကူညီခဲ့ကြပြီ စစ်ကောင်စီပေးသောအကူအညီမရှိကြောင်း ဒေသခံ က ပြောသည်။
“သူတို့(စစ်ကောင်စီ)ကိုယ်တိုင်က ဘာမှလည်းမလုပ်တတ်ဘူး။ လုပ်လည်းလုပ်မပေးနိုင်ဘူး။”ဟု မြစ်သား မြို့နယ်မှ ရေဘေးသင့်ပြည်သူတစ်ဦးက စက်တင်ဘာ ၂၁ ရက်တွင်ပြောသည်။
ဝမ်းတွင်းမြို့နယ် မှ ရေဘေးသင့် ကျေးရွာတစ်ရွာမှ ဒေသခံတစ်ဦးကလည်း “လုံးဝမရဘူး။ အစီအစဥ်မပါဘူး။”ဟု စစ်ကောင်စီ၏အကူအညီမရကြောင်းပြောသည်။
စစ်ကောင်စီအကူအညီတွေ ဘယ်မလဲ
အာဏာသိမ်းခေါင်းဆောင်မင်းအောင်လှိုင်ကစ၍ စစ်ကောင်စီ တစ်ဖွဲ့လုံး ရေဘေးနှင့် ပတ်သက်၍ မည်သို့ ဆောင်ရွက်နေ ကြောင်း စစ်ကောင်စီမီဒီယာများနှင့် စစ်ကောင်စီဝါဒဖြန့် တယ်လီဂရန်ချန်နယ်များတွင် နေ့စဥ်အများအပြားဖော်ပြနေသော်လည်း People’s Springက ရေဘေးသင့် ဒေသများမှ ပြည်သူ ၂၀ ကျော်ကို ကျပန်းဆက်သွယ်မေးမြန်းရာ စက်တင်ဘာ ၂၂ ရက်အထိ စစ်ကောင်စီပေးသောအကူအညီ ရဖူးသူမရှိပါ။
People’s Spring မေးမြန်းသူများတွင် နေပြည်တော် ပျဥ်းမနား ၊ နေပြည်တော်တပ်ကုန်း ၊ ရမည်းသင်း ၊မန္တလေးတိုင်းမှ မြစ်သား နှင့်ဝမ်းတွင်းမြို့နယ် ၊ ရှမ်းပြည်နယ် မှာ ကလော၊ အင်းလေး ၊ဆီဆိုင်မြို့နယ် ၊ ကရင်နီပြည် လွိုင်ကော် ပဲခူးတိုင်း ရေတာရှည် ၊တောင်ငူ စသောဒေသများမှ ပြည်သူများပါဝင်သည်။ ထိုကြောင့် စစ်ကောင်စီက ပေးသည် ဆိုသောအကူအညီများ ဘယ်မှာလဲ ဆိုသည်မှာ အဓိကမေးခွန်းထုတ်စရာဖြစ်လာပါသည်။
ကရင်နီပြည် ၊ပဲခူးတိုင်း စစ်တောင်းမြစ်အရှေ့ဘက်ရှမ်း တို့တွင်မူ စစ်ကောင်စီက အကူအညီမပေးယုံမျှမက ထိုဒေသများသို့ သွားကူညီလိုသောပရဟိတအဖွဲ့များ ၊အလှူရှင်များကိုပင် မသွားရန် တားမြစ်ထားကြောင်းဒေသခံပြည်သူများနှင့်တော်လှန်ရေးအဖွဲ့များကပြောသည်။
သဘာဝဘေးကို နိုင်ငံရေးအတွက်အသုံးချသောစစ်ကောင်စီ
အာဏာသိမ်းခေါင်းဆောင်မင်းအောင်လှိုင်က စက်တင်ဘာ ၁၃ရက်တွင် နေပြည်တော်သိုက်ချောင်းတံတား(ဆင်သေချောင်းကူး)၊ ပုဗ္ဗသီရိမြို့နယ်ရှိ ဝက်ကုန်းကျေးရွာ နှင့် ပေါက်တောကျေးရွာတို့ သွားခဲ့သည်။စက်တင်ဘာ ၁၅ ရက် ဇေယျာသီရိမြို့နယ်မှ ရန်ကုန်-မန္တလေးလမ်းဟောင်းအတိုင်း နဝင်းချောင်းတံတား(အဆုံ) နှင့် ကင်းသာဆည်သို့သွားခဲ့သည်ဟုဆိုသည်။ စက်တင်ဘာ ၁၈ ရက် တွင်ပျဥ်းမနားရေဘေးရှောင်စခန်း နှင့် တပ်ကုန်းတပ်နယ်သို့သွားခဲ့သည်ကို
တွေ့ရသည်။
သို့သော်အာဏာသိမ်းခေါင်းဆောင် သွားခဲ့သမျှနေရာများမှာ နေပြည်တော်ပတ်ပတ်လည်မိုင် ၃၀ မကျော်သောနေရာများဖြစ်နေသည်။ ရေဘေးသင့်ဒေသသို့သွားသည်ဆိုသော်လည်း မည်းနက်ပြောင်နေသော ရူးဖိနပ် ရွှံမပေအောင် သွားခဲ့ခြင်းပင်။ဖိနပ်ရွံ့မပေသော်လည်း ရေဘေးသင့်ဒေသသို့ကိုယ်တိုင်ကွင်းဆင်းကြောင်း ဓါတ်ပုံများကမူပုံစံမျိုးစုံ ၊ရှုထောင့်မျိုးစုံဖြင့် အများအပြားထွက်ပေါ်လာပါသည်။ ရေဘေးကို တိုင်းနှင့်ပြည်နယ် ၉ ခုရှိမြို့နယ်ပေါင်း ၆၀ ကျော်ခံစားခဲ့ရသော်လည်း အာဏာသိမ်းခေါင်းဆောင်ကနေပြည်တော် ဝန်းကျင်မိုင် ၃၀ ပတ်လည် မကျော်သောနေရာများသို့သာကားဖြင့်ခေတ္တသွား၍ ဟန်ရေးပြနေခြင်းပင်ဖြစ်တော့သည်။
ထိုနောက်ရေကြီးခြင်း၊မြေပြိုခြင်းမှာ သစ်ပင်များခုတ်လဲပြီး ဆင်းမြောင်းများအထက်တွင်ရေစီးများပိတ်နေခြင်းကြောင့်ဖြစ်ကြောင်း ၊နိုင်ငံတကာမှ အကူအညီများတောင်းခံရမည်ဖြစ်ကြောင်း ၊ နိုင်ငံတကာမှ အကူအညီများမကြာမီရောက်တော့မည်ဖြစ်ကြောင်း၊ခြောက်လအတွင်း ပြန်လည်ထူထောင်ရေးပြီးအောင်လုပ်မည်ဖြစ်ကြောင်း ၊သန်းခေါင်းစာရင်းကောက်ယူမှုကို ရည်မှန်းထားသည့်အတိုင်းအောက်တိုဘာတွင်ကောက်ယူမည်ဖြစ်ကြောင်းစသဖြင့် မင်းအောင်လှိုင်ကပြောခဲ့သည်။သို့သော်လည်း ပြည်သူသန်းပေါင်းများစွာရေဘေးဆိုးရွာစွာကြုံခဲ့ရခြင်း၏ အဓိကအကြောင်းရင်းကိုမူထည့်သွင်းမပြောခဲ့ပါ ။
ယာဂီမုန်တိုင်းနောက်ဆက်တွဲ အရှေ့မြောက်မှလာသောလေပွေလှိုင်းနှင့် တိမ်စိုင်းကြီးများကြောင့် မိုးသည်ထန်စွာရွာသွန်းပြီး ရေဘေး ၊မြေပြိုဘေးရင်ဆိုင်ရတော့မည်ကို မြန်မာပြည်သူများမှ မည်သည့်သတိပေးချက်မှ မရှိဘဲရင်ဆိုင်ခဲ့ရခြင်းဖြစ်သည်။ ယာဂီမုန်တိုင်းဒဏ် အဆိုးဆုံးခံရသောတရုတ် ၊ဗီယက်နမ် နှင့် မြန်မာကဲ့သို့ရေဘေးကြုံခဲ့သောထိုင်းနိုင်ငံတို့တွင် အစိုးရများက ကြိုတင်သတိပေးသလို ၊အန္တရာယ်ကြုံနိုင်သူများကို ရွေ့ပြောင်းပေးခဲ့၍ မုန်းတိုင်းဖျက်အားပြင်းသော်လည်း မြန်မာကဲ့သို့လူသေဆုံးမှုမများလှပါ။
မြန်မာနိုင်ငံတွင်မူ စစ်ကောင်စီကရော ၊စစ်ကောင်စီလက်အောက်ခံ မိုးလေဝသနှင့် ဇလဗေဒ ညွန်ကြားမှု ဦးစီးဌာနတို့က ရေကြီး၊မြေပြိုနိုင်ကြောင်းကြိုတင်သတိပေးခြင်း ၊ဘေးသင့်နိုင်သောပြည်သူများကိုသတိပေး၍ ရွေ့ပြောင်းခိုင်းခြင်းလုံးဝ
မရှိခဲ့ပါ ။ထိုကြောင့် မုန်တိုင်းဒဏ်မခံရဘဲ တိမ်စိုင်ကြီးများ၏ သက်ရောက်မှု ခံရသောမြန်မာနိုင်ငံက ပြည်သူရာပေါင်းများစွာသေဆုံး၊ပျောက်ဆုံးကာ
ဆုံးရှုံးမှု အများဆုံးဖြစ်နေခဲ့ပါသည်။
ကြိုတင်ကာကွယ်ရေးအစီအမံ ဘာမှမလုပ်ခဲ့သော်လည်း စစ်ကောင်စီက ရေဘေးအလွန်တွင် ၎င်းတို့ကသာ ရေဘေးအတွက်အများဆုံးလုပ်ပေးနေသည်ဆိုသောပုံစံဖြင့် နေစဥ် ဝါဒလှိုင်လှိုင်ဖြန့်ချီနေသည်ကိုတွေ့ရသည်။
ရေဘေးကိုအကြောင်းပြု၍ နိုင်ငံတကာအကူအညီများရလိုသဖြင့် စစ်ကောင်စီမှာ သေဆုံး၊ပျက်စီးစာရင်းများကို နိုင်ငံတကာသိအောင်ထုတ်ပြောလိုသလို ၊တချိန်တည်းတွင် သေဆုံး ပျက်စီးမှုများခြင်းမှာ စစ်ကောင်စီ ညံ့ဖျင်းမှုကြောင့်ဟု ပြည်သူများက အပြစ်တင်မည်စိုးရိမ်နေပြန်သောစစ်
အုပ်စုသည် ရေဘေးကြောင့်သေဆုံးစာရင်းများကိုလည်းဖုံးကွယ်ထားပါသည်။
စစ်ကောင်စီကရေဘေးကြောင့် တိုင်းနှင့် ပြည်နယ် ၉ ခုရှိ မြို့နယ် ၅၄ မြို့နယ် ၌ ပြည်သူ ၃၈၄ ဦးသေဆုံးပြီး လူဦးရေ တစ်သိန်းခွဲခန့်ရေဘေးသင့်
ခဲ့သည်ဟုထုတ်ပြန်သည်။ People’s Spring ၏ အချက်အလက်များအရ သေဆုံးသူ အနည်းဆုံး ၅၀၀ ကျော်ရှိပြီး မြေပြင်အမှန်စာရင်းမှာထိုထက်ပင်ပိုများနိုင်ပါသည်။
အမျိုးသားညီညွတ်ရေးအစိုးရနှင့် တိုင်းရင်းသားလက်နက်ကိုင်အဖွဲ့များဖြစ်သော KNU ၊ KNPP ၊CNF တို့က စက်တင်ဘာ ၁၇ ရင်တွင်ပူးတွဲထုတ်ပြန်ရာတွင်ရေဘေးကြောင့် ပြည်သူ ၇ သိန်းခန့်ထိခိုက်နိုင်ပြီး သေဆုံးပျောက်ဆုံးသူ ထောင်နှင့်ချီရှိနိုင်ကြောင်း ခန့်မှန်းဖော်ပြသည်။ ရေဘေးအတွက် ကုလသမဂ္ဂနှင့် နိုင်ငံတကာမှ လူသားချင်းစာနာမှု အကူအညီများပေးအပ်ရာတွင် နိုင်ငံရေး ၊စစ်ရေး အမြတ်မထုတ်ရန် ၊ ရေဘေးသင့်ပြည်သူများကို အညီအမျှ ပွင့်လင်းမြင်သာစွာပေးရန် ၊ ရေဘေးသင့်ဒေသများရှိ တော်လှန်ရေးတပ်ဖွဲ့များ၊ လူသားချင်းစာနာမှုဝန်ကြီးဌာနတာဝန်ခံများ၊ အရပ်ဘက်လူမှုရေးအဖွဲ့ပစည်းများကိုတိုက်ရိုက်ပေးရန်လည်းတိုက်တွန်းထားသည်။ထိုအပြင်ထိလွယ်ရှလွယ်အုပ်စုများလိုအပ်ချက်ကိုထည့်သွင်းတွက်ချက်ရန် နှင့် ပြန်လည်ထူထောင်ရေးပြန်လည်တည်ဆောက်ရေးကိုပါ ကူညီကြရန်တိုက်တွန်းထားသည်။
လတ်တလောတွင် အိန္ဒိယ ၊ထိုင်း ၊စင်ကာပူ ၊အာဆီယံ စသောနိုင်ငံများမှ ရေဘေးအကူအညီများကိုစစ်ကောင်စီကတဆင့်ပေးသည်ကိုတွေ့ရသည်။အမေရီကန်က US AID မှတဆင့်ကူညီမည်ဟုကြေညာပြီး ကုလသမဂ္ဂ နှင့်ဥရောပသမဂ္ဂတို့ကလည်းဒေါ်လာသန်းနှင့်ချီကူညီကြမည်ဟုထုတ်ပြန်ကြသည်။ ကရင်နီပြည် ၊ကရင် ၊ပဲခူးတိုင်း စစ်တောင်းမြစ်အရှေ့ပိုင်း၊ရှမ်းပြည်နယ် ဒေသအချို့ စသောဒေသများတွင်စစ်ကောင်စီတပ်မှာ နယ်မြေစိုးမိုးမှုမရှိဘဲ တော်လှန်ရေးအဖွဲ့များကနယ်မြေစိုးမိုးထားခြင်းဖြစ်သည်။ ထိုကြောင့် တော်လှန်ရေးအဖွဲများစိုးမိုးထားသောဒေသများမှာရေဘေးသင့်ပြည်သူများမှာ ယခင်ကတည်းကစစ်ဘေးဒဏ်ပါခံရသူများဖြစ်၍ ၎င်းတို့ကို နိုင်ငံတကာအစိုးရ နှင့် အဖွဲ့အ စည်းများကကူညီပေးရန် များစွာလိုအပ်နေသည်။
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images 
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images 
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images
စစ်ကောင်စီ၏ ရေဘေးသင့်ပြည်သူကို ဒုက္ခပေးသော လုပ်ရပ်များ
စစ်တောင်းမြစ်ရေမြင့်တက်လာမှုကြောင့် တောင်ငူခရိုင် (၆)မြို့နယ်ရှိကျေး ရွာအများအပြား ရေဝင်ရောက်ခဲ့ရာ စစ်ကောင်စီက မြစ်အရှေ့ဘက်ခြမ်းရှိကျေးရွာများသို့ ကယ် ဆယ်ရေးအဖွဲ့များ သွားရောက်ခွင့်မပြုဘဲ ပိတ်ပင်ထားကြောင်းကူညီကယ်ဆယ်ရေးလုပ်ဆောင်နေသူများက ပြောသည်။
“စစ်တောင်းမြစ်အရှေ့ဘက်ခြမ်းတချို့နေရာတွေ ကယ်ဆယ်ခွင့်မရပါဘူးဗျ။ တချို့နေရာတွေက PDF ထိန်းချုပ်နယ်မြေတွေမို့ပါ။ သွားမရတာတွေ ရှိပါတယ်။ တားမြစ်တာက စစ်ကောင်စီဘက်ကပါ”ဟု ပရဟိတသမားတစ်ဦးက ပြောသည်။
ထို့ကြောင့် မြစ်အရှေ့ဘက်ခြမ်းကျေးရွာများမှ ရေကြီးနစ်မြုပ်သည့် ကျေးရွာများသို့ တော်လှန်ရေးတပ်ဖွဲ့အချို့ သွားရောက်၍ ကယ်ဆယ်ရေးလုပ်ပေးနေကြရသည်။ စက်တင်ဘာ ၁၃ ရက် နံနက်ပိုင်းအထိ ကလေးငယ်နှစ်ဦးရေစီးနှင့်မျောပါသေဆုံးထားကာ ကယ်ဆယ်ရေးလုပ်သည့် PDF ရဲဘော်တစ်ဦးလည်း အသက်ဆုံးရှုံးခဲ့သည်။
ရေဘေးကယ်ဆယ်ရေးနှင့်စပ်လျဥ်းပြီး စစ်ကောင်စီသည် ကန့်သတ်ပိတ်ပင်မှုများ၊ ကယ်ဆယ်ရေးပစ္စည်းများကို ၎င်းတို့ထံတွင်သာပေးအပ်ခဲ့ရန် ခြိမ်း ခြောက်အကြပ်ကိုင်ခြင်းများလည်း ရှိနေသည်။
အဆိုပါဖြစ်ရပ်များအနက် တောင်ငူမြို့နယ်တွင် ပရဟိတသမားတစ်ဦးကြုံခဲ့ရသည်မှာ ၎င်းတို့သယ်ဆောင်လာသည့် လှေ ၅ စီးတွင် ၄စီးကို စစ်ကောင်စီတပ်သားများနှင့် ဌာနဆိုင်ရာဝန်ထမ်းအချို့က အတင်းအဓမ္မကြားဖြတ်ယူဆောင် ခံခဲ့ရသည်။သို့သော် ကျန်စက်လှေ တစ်စီးကိုမပေးသ
ဖြင့် ရေဘေးသင့်ပြည်သူများကူညီမည့်အစီအစဥ်ကိုဖျက်ခဲ့ရကြောင်းပရဟိတသမားတစ်ဦးက ၎င်းကိုယ့်တွေဖြစ်ရပ်အား ရင်ဖွင့်သည်။
အလားတူ စစ်ကောင်စီရုံးစိုက်ရာ နေပြည် တော်ကောင်စီနယ်မြေ၊ တပ်ကုန်းမြို့နယ်အ တွင်းရှိ ကျေးရွာအချို့သို့ ရေဘေးကူညီရေးသွားရောက်စဥ် လမ်း၌ဂိတ်ချထားသော စစ်ကောင်စီတပ်သားများက ကူညီထောက်ပံ့ရေးပစ္စည်းများ ၎င်းတို့ထံအပ်နှံထားခဲ့ရမည်ဆိုကာ လုယက်ယူဆောင်ခြင်းများကြုံခဲ့ရကြောင်း သွားရောက်ခဲ့သည့် အဖွဲ့တစ်ခုက ပြောပါသည်။
ထို့အပြင် မန္တလေးတိုင်း၊ ရမည်းသင်းမြို့နယ်သို့ ရေဘေးသင့်ပြည်သူများအား သွားရောက်လှူဒါန်းရာတွင်လည်း ဒေသအာဏာပိုင်ဆိုသူ များက အလှူပစ္စည်းများကို ၎င်းတို့သာ သယ် ယူမည်ဖြစ်ကြောင်းနှင့် သယ်ယူစရိတ်အ တွက် ဆန်တစ်အိတ်လျှင် ကျပ်နှစ်သောင်းပေးရမည်ဆိုသောကြောင့် မလှူဘဲလှည့်ပြန်ခဲ့ကြောင်း ကိုယ်တွေ့ကြုံခဲ့သည့် အမျိုးသားတစ်ဦးက ပြောသည်။
သို့ဖြစ်ရာ အဆိုပါကျေးရွာသို့ အခြားပရဟိ တအဖွဲ့တစ်ခုသွားရောက်လှူဒါန်းရန် ထပ်မံရောက်ရှိလာရာ အဆင်မပြေ၍ ပြန်လှည့်လာသူများနှင့် လမ်းတွင်ဆုံပြီး အကျိုးအ ကြောင်းမေးမြန်းသည်တွင် အထက်ပါဖြစ်စဥ်ကို ပြောပြသောကြောင့် ထပ်ရောက်လာသည့်အဖွဲ့ပါ နောက်ကြောင်းပြန်ခဲ့ရသည်လည်း ရှိနေသည်။
ကရင်နီပြည်တွင်စစ်ကောင်စီက အကူအညီမပေးသည့်အပြင် ပြည်သူချင်းအကူအညီမပေးနိုင်ရန်ပါပိတ်ဆို့ထားကြောင်း အတွင်းရေးမှူး ဦးဗညားခွန်အောင်ကရင်နီပြည် ကြား ကာလအုပ်ချုပ်ရေးကောင်စီ (IEC )အတွင်းရေးမှူး ဦးဗညားခွန်အောင်ကပြောသည်။
“စစ်ကောင်စီက အရင်ကတည်က လူမှုအဖွဲ့အစည်းတွေဖြစ်ဖြစ် UN လို အေဂျင်စီတွေကိုတောင်မှပိတ်ပင်တာရှိခဲ့တာပဲ။ အခု အခြေအနေ အရ စစ်ရေးပိုင်းမှာ ကရင်နီတပ်ပေါင်းစုက နယ်မြေအများစု ထိန်း ချုပ်ထားတာရှိတော့ စစ်ကောင်စီက နယ်မြေ ဖြတ်တောက်ပြီး ရိက္ခာပိတ်ဆို့တာတွေရှိခဲ့တယ်။ နောက်ပြီး အရင်တုန်းကထက် ကြပ်မတ်တာတွေ ပိုလုပ်တာရှိတယ်။ ရေဘေးမှာလည်း ဒီအတိုင်းပါပဲ။စစ်ကောင်စီက ပိတ်ဆို့မှုတွေဆက်လုပ်နေဦးမှာပါပဲ”
ဦးခွန်ဗညာအောင်၏ ပြောကြားချက်အပေါ် လွိုင်ကော်မြို့နယ်မှပြည်သူတစ်ဦးကလည်းထပ်မံအတည်ပြုသည်။
“ရေတက်နေတာ တစ်ပတ်နီးပါးရှိပြီ လုံးဝ ပြန်မကျဘူး။ မိုးကလည်း မတိတ်တော့ တရိပ်ရိပ်နဲ့ ပိုပိုတက်လာတယ်။ မင်းစု၊ နမ့်ကွတ်၊ ဒေါ့နိုးကူးရပ်ကွက်တွေဘက်မှာ အဆိုးဆုံးပဲ။ အခု မိန်းလမ်းတွေပေါ်မှာပါ ရေက ကျော်နေပြီ။ ကူညီကယ်
ဆယ်ရေးတွေ လာတာ တော်တော်နည်းတယ်။ စစ်ကောင်စီကလည်း ဘာမှကူညီပေးတာ မရှိဘူး”ဟု လွိုင်ကော်မြို့နယ်မှပြည်သူတစ်ဦးကပြောသည်။
ထိုအပြင် စစ်ကောင်စီက ကရင်နီပြည်နယ် ၊ရှမ်းပြည်တောင်ပိုင်းရေကြီးနေချိန်တွင် စက်တင်ဘာ ၂၁ ရက်နှင့် ၂၂ ရက်တွင် ဖယ်ခုံ နှင့် ပင်လောင်းဒေသကို လေကြောင်းမှ ဗုံးကြဲပြီး စစ်ကြောင်းထိုးရန်ပင်ကြိုးစားနေသည်။
“အခုက တော်လှန်ရေးတပ်ဖွဲ့တွေ့က ကူညီရေး ကယ်ဆယ်ရေး ပြန်လည်ထူထောင်ရေး လုပ်နေတဲ့နေရာတွေကို စစ်ကောင်စီက လက်နက်ကြီးတွေနဲ့ ရမ်းသမ်းပစ်ခတ်နေတာတွေရှိတယ်။ ဒါကဆီဆိုင်ဘက်ပေါ့။ ပြီးတော့ ပင်လောင်းဘက်မှာလည်းအဲဒီလိုမျိုးပဲ ဒီနေ့ ရှေ့တစ်နေ့ဆို တိုက်ပွဲဖြစ်ကြတယ်။ တောင်ပိုင်းပေါ့။ ရေဘေးသင့်တဲ့နေရာမှာပဲ။ လမ်းတွေပြိုတဲ့နေရာတွေမှာ ။ သူတို့(စစ်ကောင်စီ)က ကူညီဖို့နေနေသာသာ ရေဘေးကသင့်ပါတယ်ဆို အဲဒီ့နေရာတွေကို တိုက်ပွဲဖော်ချင်နေတဲ့သဘောတွေ့နေရတယ်။”ဟု PNLA ပြန်ကြားရေးတာဝန်ခံ ခွန်ရိန်းယံကလည်းပြောသည်။
နေပြည်တော် PDF မှ တပ်ရင်းမှူး ဇင်ယော်က
“စစ်တပ်က စစ်ရေးအမြင်နဲ့ နိုင်ငံကို ထင်သ လိုလုပ်နေတာမို့ ပြည်သူတွေ ရေနစ်မြုပ်တာကိုပဲ သူတို့စစ်တပ်အတွက် စစ်ရေးအရအားသာလာမယ်လို့အမြင်ရှိနေတာပါ။ ပြည်သူတွေ ရေနစ်မြုပ် ဒုက္ခရောက်ရင် သူတို့စစ်တပ်ကိုမတော်လှန်နိုင်တော့ဘူး တော်လှန်ရေးအဖွဲ့တွေကို မထောက်ပံ့၊ မဝန်းရံနိုင်တော့ဘူးဆိုတဲ့ စစ်ရေးအရသူအားသာဖို့အမြင်နဲ့ပဲ အဆုံးထိ ဒုက္ခပေးနေတာ။ သူတို့ရဲ့ယုတ်မာမှုတွေကို အစွန်းဆုံးအထိ လုပ်လိမ့်မယ်။ ဒါကို ကျွန် တော်တို့အားလုံး ကြိုတင်တွက်ဆပြီး အာ ဏာရှင်တွေကိုဖယ်ရှားရမှာပါခင်ဗျ”ဟု မှတ်ချက်ပြုသည်။
အလားတူ ရေတာရှည်မြို့နယ် အခြေစိုက်PDF တပ်ရင်း ၃၅၀၁ တပ်ခွဲ (၄)သတင်းပြန်ကြားရေး တာဝန်ခံ ကိုအီဗယ်ကလည်း “စစ်ကောင်စီဘက်က ကူညီမှုက လုံး၀မရှိပါဘူးဗျ။လုံး၀မရှိတဲ့အပြင်ကို ဒီဘက်ကိုလှူဒါန်းချင်တဲ့ အလှူရှင်တွေကိုတောင်မှ လှူဒါန်းခွင့်မရှိဘူး။ စစ်တောင်းမြစ်ထဲကို အကြောင်းအရင်းမရှိဘဲ သူတို့ရဲ့ ခွင့်ပြုချက်မရှိဘဲလှေ၊ သမ္ဗန်လှော်ခတ်ခွင့် မောင်းနှင်ခွင့်တောင်မရှိဘူး။တကယ်လို့ သူတို့ရဲ့ ခွင့်ပြုချက်မပါဘဲနဲ့ လှေသမ္ဗန်ကိုစက်လှေကို စစ်တောင်းမြစ်ထဲ မောင်းနှင်မယ်ဆိုရင် ပစ်ခတ်တာမျိုးတွေ လုပ်မယ်ဆိုပြီးတော့တောင်မှ ခြိမ်း
ခြောက်ထားတာရှိပါတယ်ဗျ”ဟု စစ်တောင်းမြစ်အရှေ့ဘက်ခြမ်းတွင် စစ်တပ်က အကူအညီမပေးနိုင်ရန် ခြိမ်းခြောက်တားမြစ်ထားခြင်းအပေါ်ရှင်းပြောသည်။
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images 
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images 
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images 
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images 
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images 
နိုင်ငံအလယ်ပိုင်းတွင်ဆယ်စုနှစ်များစွာအတွင်းအဆိုးရွာဆုံးရေဘေးကြုံခဲ့ရသော ပြည်သူများ။ဓါတ်ပုံ-AP ၊ AFP ၊ Getty Images
ပြည်သူအချင်းချင်းကူညီနေရသောရေဘေး
ထိုကြောင့် ရေဘေးသင့်အကူအညီများမှာ ပြည်သူမှ ပြည်သူသို့သာအဓိကကူညီနေကြရခြင်းဖြစ်သည်။တော်လှန်ရေးအဖွဲ့များစိုးမိုးထားသောဒေသများတွင် တော်လှန်ရေးအဖွဲ့များနှင့် ပြည်တွင်းပြည်ပမှ ပြည်သူများကအဓိကကူညီနေကြသလို ၊စစ်ကောင်စီ စိုးမိုးသော ဒေသများတွင်လည်းပြည်သူများ၏အကူအညီကအဓိကဖြစ်နေသည်။
ရေဘေးကြုံပြီး ၁၀ ရက်ကျော်အကြာတွင်မှ စစ်ကောင်စီကရေဘေးအတွက်ကျပ် ဘီလီယံ ၃၀( ၁ ဒေါ်လာ ကျပ် ၅၀၀၀ ဖြင့်တွက်လျင် ဒေါ်လာ ၆သန်း) သုံးစွဲမည်ဟု မင်းအောင်လှိုင်က စက်တင်ဘာ ၂၃ ရက်ကပြောသည်။စစ်ကောင်စီနှင့်နီးစပ်သောလုပ်ငန်းရှင်များထံ ရေဘေးအကူအညီတောင်ပြီး လုပ်ငန်းရှင်များကစုစုပေါင်း ကျပ်ငွေ ၃၁ ဘီလီယံလှူဒါန်းသောအခမ်းအနားတွင် အာဏာသိမ်းခေါင်းဆောင်ကပြောခြင်းဖြစ်သည်။ ရွေးကောက်ခံအရပ်သားအစိုးရလက်ထက်တွင် သဘာဝဘေးအရေးပေါ် ရန်ပုံငွေ ဘီလီယံ ၁၀၀၀ ထားခဲ့ပြီး ကမ္ဘာကပ်ရောဂါကြောင့်စီးပွားရေးလုပ်ငန်းများပြန်လည်ကုစားရေးတွဘီလီယံ ၃၀၀ သုံးခဲ့ပြီးနောက် ကျန်နေသော ဘီလီယံ ၇၀၀ ခန့်ကိုမူ အာဏာလု စစ်အုပ်စုက စိတ်ကြိုက်သုံးစွဲ စာရင်းဖျောက်ခဲ့ပြီးနောက် ယခုရေဘေးတွင်ကျပ် ဘီလီယံ ၃၀ သာအသုံးပြုမည်ဆိုခြင်းကို ငွေပမာဏအများကြီးထုတ် သုံးစွဲတော့သယောင်ပြောနေခြင်းလည်းဖြစ်ပါသည်။
အမှန်တွင် ရေဘေးသင့်ပြီး နှစ်ပါတ်ကျော်အတွင်းစစ်ကောင်စီက နိုင်ငံတစ်ဝန်း ဗုံးကြဲရာတွင် အသုံးပြုခဲ့သောလက်နက်ခဲယမ်း ၊လေယာဥ်ဆီဖိုး စသည့် စုစုပေါင်းတန်ဘိုးမှာရေဘေးတွင်အသုံးပြုမည်ဆိုသောဒေါ်လာ ၆ သန်းထက်ပိုများဖွယ်ရှိပါသည်။ ရခိုင် ၊ရှမ်းမြောက် ၊ မန္တလေး ၊ကရင်နီ၊ကရင် ၊ကချင် စသောဒေသများကိုစစ်ကောင်စီက လေကြောင်းမှ အကြိမ်ရေစုစုပေါင်းရာချီဗုံးကြဲခဲ့ပါသည်။
စစ်ကောင်စီထုတ်ဖော်ပြောဆိုမှုအရ ရေဘေးတွင် ၎င်းတို့ထံမှ အကူအညီအနည်းငယ်သာရမည်ဖြစ်၍ ရေဘေးအလွန်အရေးပေါ်ကယ်ဆယ်ရေး
နှင့်ပြန်လည်ထူထောင်ရေးမှာ နိုင်ငံတကာ နှင့်ပြည်သူများ၏ အကူအညီသာအဓိကဖြစ်မည်ဖြစ်၏ ။ကုလအပါအဝင် နိုင်ငံတကာမှအကူအညီပေးရာတွင်လည်း ရေဘေးသင့်ပြည်သူများကိုတိုက်ရိုက်အကူအညီပေးနိုင်ရန် အရေးကြီးသည်။စစ်ကောင်စီထံပေးပါက စစ်တပ်နှင့် စစ်ကောင်စီလက်အောက်ခံ ယန္တရားများက၎င်းတို့ကိုယ်ကျိုးအတွက်အသုံးပြုပြီး အမှန်တကယ်အကူအညီလိုသူများထံမရောက်နိုင်ကြောင်း ရေဘေးအကူအညီပေးနေသူများကပြောသည်။
တောင်ငူမြို့မှရေ ဘေးသင့်ပြည်သူတစ်ဦးက
“ရေဘေးအတွက်လာပြီးကူညီတယ်ဆိုရင် ကျွန်တော်တို့လက်ထဲကို တိုက်ရိုက်ကူစေချင်တယ်။စကစအုပ်ကြီးတွေက ကောင်း ပေ့ဆိုတာတွေရွေးယူပြီးကာမှ ပိုတာကိုပြန်ဝေနေတယ်”ဟု အတွေ့အကြုံကိုပြောသည်။
တပ်ကုန်းမြို့နယ်မှပြည်သူတဦးကလည်း၎င်းတို့ဒေသတွင်လည်း စစ်ကောင်စီထံမှ စစ်ကားတစ်စီးဖြင့်ရောက်လာသောရေဘေးသင့်အကူအညီများမှ ရွာများရှိ အုပ်ကြီး များ၊ရာအိမ်မှူး၊ ဆယ်အိမ်မှူးများ၏ ဆွေးမျိုးများ ၊နီးစပ်သူများဖြင့်ကုန်သွား၍ အမှန်တကယ်လိုအပ်နေသူများမရကြောင်းပြောသည်။
စစ်ကောင်စီကိုမယုံကြည်သလို ၊စစ်ကောင်စီ၏ စီမံခန့်ခွဲမှု ညံ့ဖျင်းပြီး ပြည်သူအပေါ်စေတနာလည်းမထားသဖြင့် ရေဘေးသင့်အကူအညီများမှာ ပြည်သူများ၏ လှူဒါန်းမှု ၊ကိုယ်တိုင်ရုန်းကန်မှုဖြင့်သာပြန်လည်ထူထောင်နိုင်ရေးကြိုးစားရမည်ံဟုရေဘေးသင့်ပြည်သူအချို့ကပြောသည်။
သဒ္ဒါနှင့် ဥာဏ်ယှဥ်ကူရမည့်ရေဘေး
စစ်တပ်အာဏာသိမ်းပြီးနောက်တိုင်းပြည်စီးပွားရေးဆိုးဆိုးရွားရွားကျဆင်းနေသဖြင့် ပြည်သူအများစု စားဝတ်နေရေးကြပ်တည်း နေသည့်ကြားမှ ကူညီနေကြခြင်းဖြစ်သောကြောင့်အကူအညီများ အမှန်တကယ်ထိခိုက်နေသောရေဘေး
သင့်ပြည်သူများထံရောက်ရန်အရေးကြီးကြောင်း ကူညီရေးလုပ်ကိုင်နေသူများကပြောသည်။
အကူအညီရသူကများစွာရပြီး. ၊ မရသူကလုံးလုံးမရသောအခြေအနေမဖြစ်စေရန် ရေဘေးသင့်သူများ တက်နိုင်သမျှမျှတစွာရရှိရန် စနစ်တကျစာရင်းကောက်ယူ၍ လိုအပ်သူအများစုရရှိအောင်ကူညီခြင်း၊ အလှူငွေရရှိမှု ကူညီနေမှုစသောစာရင်းဇယားအချက်အလက်များကိုစနစ်တကျပွင့်လင်းမြင်သာစွာ ရှင်းလင်းပြီးကူညီပေးနေသောအဖွဲ့များကို ကူညီခြင်း၊အရေးပေါ်အကူအညီလုံလောက်ပါက ပြန်လည်ထူထောင်ရေးအတွက်ပါကူညီခြင်း စသဖြင့် သဒ္ဒါနှင့် ဥာဏ်ကိုတွဲ၍ ကူညီပါမှ အကူ
အညီများပိုထိရောက်မည်ဟု ၂၀၀၈ နာဂစ်မုန်တိုင်း ၊၂၀၁၅ ရေဘေးနှင့် ယခုရေဘေးတွင်ကူညီပေးခဲ့ ပေးနေသူများကအကြံပြုသည်။
“ရေဘေး အလှူငွေတွေ တကယ်ထိရောက်ဖို့လိုပါတယ်။ လှူနေတာတွေကို ကျေးဇူးတင်ပါတယ်။ ဒါပေမယ့် တချို့သော ဆယ်လီတွေ၊ စီးပွားရေးလုပ်
ငန်းရှင် တွေဟာ ရေဘေးကို အကြောင်းပြုပြီး အရမ်းကာရော လုပ်စားနေသလို ခံစားရတယ်။ ဘာသာရေးဆရာတွေပါ မြေပြင်အထိ ခေါ်လာပြီး ဘာသာရေးဂျင်းထည့်တာမျိုးတွေ၊ အလှူကို ဗန်းပြပြီး ပြီးစလွယ်လုပ်တာတွေ၊ တကယ်လိုတဲ့နေရာတွေအထိ မလာဘဲ လက်သင့်ရာပေးထားခဲ့တာတွေ မြင်နေရတယ်”ဟု မန္တလေးမြို့မှ လူမှုကူညီရေးလုပ်ဆောင်သူတစ်ဦးကအကြံပြုသည်။
“အောက်ခြေကိုဆင်း။ အောက်ခြေမှာတကယ်လုပ်နေတဲ့ နယ်ခံပရဟိတတွေရှိတယ်။ အုပ်ချုပ်ရေးမှူးတွေနဲ့ မဆက်သွယ်ချင်ရင်တောင်မှ။ တစ်ရွာကိုကောင်းကောင်းထောက်ပံ့နိုင်ရင် နောက်တစ်ဖွဲ့က နောက်တစ်ရွာကို ထောက်ပံ့ရင် ဝန်ထုပ်ဝန်ပိုးတွေတော့ လျော့ကျသွားမယ်လို့ထင်တာပဲ”ဟုမြစ်သားဒေသခံတစ်ဦးကအကြံပြုသည်။
စစ်ကောင်စီ၏ အကြံအစည်
စစ်ကောင်စီကရေဘေးကိုအကြောင်းပြု၍ နိုင်ငံတကာမှ အသိအမှတ်ပြုမှု နှင့် အကူအညီများရရှိရန် အားထုတ်နေသလို၊ စစ်ကောင်စီကသာ ရေဘေးအတွက်အများဆုံးလုပ်နိုင်ကြောင်းထင်အောင် ဝါဒဖြန့်ချီနေသည်။စစ်တပ်ကအာ
ဏာသိမ်းပြီးနောက် ပြည်သူကိုအကြမ်းဖက် စစ်ရာဇဝတ်မှုများဆက်တိုက်ကျူးလွန်နေသောစစ်ကောင်စီက ပြည်သူများထံမှ ယုံကြည်ကိုးစားမှု
ရ ရန်လည်း ကြံစည်နေသည်။
ထိုကြောင့် စစ်တပ်၏ ရေဘေးကူညီမှုမှာနေပြည်တော် ဝန်းကျင် တဝိုက်တွင်သာ ဟန်ရေးပြနေပြီ ၊အမှန်တကယ်ဒုက္ခရောက်နေသည့်ရေဘေးသင့်ပြည်သူအများစုထံ အကူအညီရောက်အောင်မပေးပါ။ နေပြည်တော်ပြင်ပ ကျန်ဒေသများမှ ပြည်သူများကိုမူ စစ်ကောင်စီက စာရင်းပင်ကုန်အောင်မကောက်ပေ။ တော်လှန်ရေးတပ်များနှင့် PDFများစိုးမိုးသောဒေသများမှ ရေဘေးသင့်ပြည်သူများကိုစစ်တပ်က ရန်သူလိုသဘောထားပြီး အကူအညီမပေးနိုင်ရန်ပင်တားဆီးပိတ်ဆို့နေသဖြင့်နိုင်ငံတကာနှင့် ပြည်တွင်းမှ အလှူရှင်များကထိုအခြေအနေကို သိပြီး လိုအပ်နေသူများထံအကူအညီများရောက်ရန် ပေးနိုင်ရေးမှာအရေးကြီးလှပါသည်။
ထိုအပြင် အောက်တိုဘာ ၁ ရက်မှစ၍ သန်းခေါင်စာရင်းကောက်ယူရန် နှင့် ၂၀၂၅ တွင်အမည်ခံရွေးကောက်ပွဲလုပ်၍ အာဏာကို ရာသက်ပန် လက်မလွတ်ရရေး မင်းအောင်လှိုင်ခေါင်းဆောင်သော စစ်ကောင်စီက အဓိကအာရုံစိုက်လုပ်နေကြခြင်းသည်။
အာဏာသိမ်းခေါင်းဆောင်ကစက်တင်ဘာ ၂၂ ရက်တွင်ရေဘေးသင့်အလှူငွေလက်ခံသောအခန်းအနားတွင်ပင် သန်းခေါင်စာရင်းကောက်ယူရန်၊ ရွေးကောက်ပွဲလုပ်နိုင်ရေး လုပ်ငန်းရှင်များကူညီကြရန်ပြောခဲ့သေးသည်။ သန်းခေါင်စာရင်းကောက်ယူရန်အတွက် ရေဘေးသင့်ပြည်သူများ ရေဘေးစခန်းများမှ အမြန်ပြန်ကြရန်လည်း မင်းအောင်လှိုင်က ပြောထားသေးသည်။
စစ်အုပ်စု၏ သန်ခေါင်စာရင်းကောက်ယူမည့် အစီအစဥ်ကရေဘေးကြောင့်အိမ်မရှိတော့သော နေပြည်တော်ပျဥ်းမနားမြို့နယ်မှ ဦးညိုထွန်းကို အကြီးအကျယ် ဒုက္ခရောက်စေပြီဖြစ်သည်။
သန်းခေါင်းစာရင်းကောက်ယူရန် စစ်ကောင်စီလက်အောက်ရှိကျောင်းများမှ ဆရာ၊ဆရာမ များကလုပ်အားပေးကြရမည်ဖြစ်သလို သန်းခေါင်စာရင်းကောက်ရန်ဆိုကာ ရေဘေးသင့်ပြည်သူများကိူ အိမ်အမြန် ပြန်ခိုင်းနေ၍ ဦးညိုထွန်းအခက်တွေ့နေပါသည်။
“အိမ်လည်း ရေမြုပ်သွားလို့ နေလို့မရလို့ ရွာကျောင်းက ကယ်ဆယ်ရေးစခန်းလာနေတာ။ ကျောင်းတွေ ပြန်ဖွင့်မှာမို့ ပြန်ခိုင်းနေပြန်ပြီ” ဟုသူက ညီးညူရင်းပြောသည်။
အတင်းပြန်ခိုင်းပါက နေစရာအိမ်မရှိတော့၍ အခြားမြို့သို့သွား၍ အလုပ်ရှာရတော့မည်ဟုဦးညိုထွန်ကဆိုလိုက်ပါသည်။ ။
