နန်းတွင်းငရဲခန်းမှာ ​ကြွေလွင့်ခဲ့တဲ့ကြယ်တပွင့်

ရှိန်း/People’s Spring

ပြီးခဲ့တဲ့၂၀၂၁ခုနှစ်ကစပြီး၂၀၂၃ခုနှစ်လောက်အထိ မန္တလေးမြို့မှာ ညဘက်လူသူမဖြတ်သန်းရဲတဲ့နေရာတခုရှိပါတယ်။

အဲဒီနေရာက ငယ်ငယ်ကကြားဖူးတဲ့ မိစ္ဆာဆိုးတွေရှိတဲ့ညောင်ပင်ကြီးတခုလို မှောင်ရီပျိုးစအချိန်ဆိုရင် မန္တလေးမြို့ခံတွေထိတ်လန့်ကြရပါတယ်။

ဒီနေရာကတော့၁၁၀လမ်း(မနော်ဟရီလမ်းထိပ်)က လေးမျက်နှာဘုရားဝန်းပါ။ ဗုဒ္ဓဘာသာဝင်တွေအလေးအမြတ်ထားရာ အဲဒီဘုရားဝန်းဟာ ယခင်ကတော့ရပ်ကွက်နေပြည်သူတွေအတွက် ညနေဘက်စိတ်အေးချမ်းစရာနေရာတခုဖြစ်ခဲ့ပါတယ်။

စစ်အာဏာသိမ်းပြီးချိန်၂၀၂၁ ခုနှစ်မှာတော့ အဲဒီဘုရားဝန်းကိုစစ်တပ်က စခန်းချတပ်စွဲလိုက်ပြီးယာယီ စစ်ကြောရေးစခန်းလုပ်ပစ်လိုက်ကြပါတယ်။ ညနေ၅နာရီကျော်ရင် ဖြတ်သန်းသွားလာသူတွေကို စိတ်မထင်ရင် မထင်သလိုဖမ်းဆီးရိုက်နှက်တာ၊သေနတ်နဲ့ပစ်တာ၊အရက်မူးနေတဲ့ရဲ နဲ့စစ်သားတွေကဆိုင်ကယ်တွေကိုတားပြီး အကြောင်းပြချက်မရှိရိုက်နှက်တာတွေပြုလုပ်လေ့ရှိပါတယ်။

ဒါ့အပြင် ဖမ်းဆီးလာသူတွေကိုနေ့ရော၊ ညပါရိုက်နှက် နှိပ်စက်စစ်ဆေးလေ့ရှိတာမို့ ငရဲခန်းတခုလို အော်ငြီးသံတွေလည်း အမြဲကြားနေရတယ်လို့ရပ်ကွက်နေပြည်သူတွေကပြောပါတယ်။

၂၀၂၁ခုနှစ်၊စက်တင်ဘာလ၃၀ရက်နေ့ ညနေပိုင်းမှာ လက်ဖက်ရည်ဆိုင်ကနေပြန်လာတဲ့ သပိတ်​ခေါင်း​ဆောင် တဦးဖြစ်တဲ့ ကိုလင်းပိုင်စိုး နဲ့ကိုတိုးတက်ဖုန်းမြင့်တို့ဟာ နောက်ယောင်ခံလိုက်လာတဲ့စစ်အုပ်စုကဖမ်းဆီးတာခံရပါတယ်။

အသက် ၂၀ ​ကျော်အရွယ် ကိုလင်းပိုင်စိုးဟာကျောက်ဆည်နည်းပညာတက္ကသိုလ်က ဒြပ်သတ္တုပိုင်းဆိုင်ရာနောက်ဆုံးနှစ် အင်ဂျင်နီယာကျောင်းသားဖြစ်ပါတယ် ။​ သူငယ်ချင်း​တွေက ချစ်စနိုးနဲ့ လပိုင်ကြီးလို့ ​​ခေါ်တဲ့ ကိုလင်းပိုင်စိုးဟာ ဂေါ်ရခါးလူမျိုးဖြစ်ပါတယ် ။

သူဟာ စစ်အာဏာအသိမ်းခံရပြီးတဲ့နောက်ပိုင်း သပိတ်လှုပ်ရှားမှုတွေမှာတက်ကြွစွာပါဝင်ခဲ့ပါတယ်။နေပြည်တော် နဲ့ မန္တလေး ဆန္ဒပြသပိတ်စစ်ကြောင်းတွေမှာဦးဆောင်ခဲ့သူတဦးဖြစ်ပြီး​တော့ စစ်တပ်ရဲ့အကြမ်းဖက်ဖြိုခွင်းမှုတွေအပြီးမှာ ပျောက်ကြားလှုပ်ရှားလာတဲ့သပိတ်တွေမှာ ကိုလင်းပိုင်စိုးပါဝင်ခဲ့ပါတယ်။

မန္တလေးသပိတ်၊မြတောင်သပိတ်စစ်ကြောင်းတွေမှာလည်းပါဝင်ခဲ့ပါတယ် ။ အဲဒီအချိန်မှာ မြို့ထဲကသပိတ်စစ်ကြောင်းတွေကို စစ်တပ်ကအကြမ်းဖက်ပြီး ပစ်ခတ်သတ်ဖြတ်ဖမ်းဆီး တဲ့အချိန်ပါ။

ကိုလင်းပိုင်စိုးတို့နှစ်ယောက်ကို စစ်​ကောင်စီတပ်က ဖမ်းဆီးသွားပြီး​တော့ လေးမျက်နှာဘုရားထဲခေါ်သွားပါတယ်။ သူတို့နှစ်ယောက်ကို ပြင်းပြင်းထန်ထန် ရိုက်နှက်စစ်ဆေးပြီးတော့ အတူတူစုနေကြတဲ့နေရာကို ဖော်ခိုင်းပါတယ် ။

အဲဒီ​နောက်စစ်အာဏာရှင်ဆန့်ကျင်​ရေး တက်ကြွစွာလုပ်ကိုင်​နေတဲ့ ကိုငြိမ်းမင်းသန့် နဲ့ CDM သူနာပြုဆရာမ မကြည်ကြည်ဝင်းတို့ကိုပါ နာရီပိုင်းအကြာမှာဖမ်းဆီးခံရပါတယ်။

ကိုငြိမ်းမင်းသန့်ဟာ လျှပ်စစ်စွမ်းအား၊ အင်ဂျင်နီယာဌာန စတုတ္ထနှစ်ကျောင်းသားတစ်ဦးဖြစ်သလိုကျောက်ဆည်နည်းပညာတက္ကသိုလ် ကျောင်းသားများသမဂ္ဂ(ဗ.က.သ များအဖွဲ့ချုပ်)ရဲ့ အမှုဆောင်ဖြစ်ပါတယ်။ မကြည်ကြည်ဝင်းဟာ CDM သူနာပြုတစ်ယောက်ဖြစ်ပါတယ်။

ကိုလင်းပိုင်စိုးတို့နှစ်ယောက်ကို ရိုက်နှက်စစ်ဆေးချိန်မှာ ဂေါ်ရခါးလူမျိုးဖြစ်နေတဲ့အတွက် လူမျိုး

ခြားဆိုပြီး ပိုမိုရိုက်နှက် နှိပ်စက်ခဲ့ကြပါတယ် ။ စစ်တပ်အတွင်းက ဘာသာ​ရေး ၊လူမျိုး​ရေး မှိုင်း​တွေ​ကြောင့် ဘာသာခြား၊လူမျိုးခြားဆိုရင် ပိုမိုဖိနှိပ်တက်တဲ့ စစ်​ကောင်စီတပ်ဖွဲ့ဝင်​တွေဟာ ကိုလင်းပိုင်စိုးကို အငြိုးတကြီးနဲ့နှိပ်စက် ငြင်းပန်းခဲ့ကြတယ်လို့ ဖြစ်စဥ်ကသိသူတစ်ဦးက လူထု​နွေဦးကို​ပြောပြပါတယ် ။

​ပြောပြသူရဲ့လုံခြုံရေး​ကြောင့်ယခုသတင်းဆောင်းပါးမှာ သူနဲ့ပတ်သက်တာ​တွေ မ​ရေးသားပါဘူး။

ကိုလင်းပိုင်စိုးတို့ နှစ်ဦး​ဖမ်းဆီး နှိပ်စက်ခံရပြီး​တော့ ကိုငြိမ်းမင်းသန့်နဲ့ မကြည်ကြည်ဝင်းတို့ ရောက်လာတဲ့အခါ ကိုလင်းပိုင်စိုးတို့ရဲ့ ခန္ဓာကိုယ်ကို လှန်ပြကာ “တွေ့လား။ကောင်းကောင်းဖြေရင်ဖြေ၊မဖြေရင် မင်းတို့လည်းဒီထပ်ပိုနာမယ်”လို့ စစ်သားတွေကခြိမ်း​ခြောက်ပါတယ်။

အဲဒီအချိန်မှာကတည်းက ကိုလင်းပိုင်စိုးရဲ့ကျောတွေမှာညိုမဲနေပါတယ်။ စစ်​​ကောင်စီတပ်ဖွဲ့ဝင်​တွေက ​နောက်​ရောက်လာသူနှစ်ဦးကိုလည်းနာရီပိုင်းအကြာ ရိုက်နှက်စစ်ဆေးတာတွေလုပ်ခဲ့ပြန်ပါတယ်။ အဲဒီအချိန်မှာ ကိုလင်းပိုင်စိုးတို့ကိုစစ်ဆေးမှုခဏရပ်ထားတယ်လို့ဆိုပါတယ်။

ကိုလင်းပိုင်စိုးတယောက်ထဲကိုနှိပ်စက်ချိန်မှာ​တော့ “မင်းလားကွဂေါ်ရခါး”ဟု ဆိုပြီး ရက်ရက်စက်စက် ဝိုင်းဝန်းရိုက်နှက်ကြပါ​တယ်။

“ရိုက်တာကသံတုတ်တွေနဲ့ ရိုက်တာ။၅ ယောက်လောက်ရှိမယ်။အကုန်စစ်သားတွေချည်းပဲ”လို့ဖြစ်စဥ်ကို မြင်​တွေခဲ့သူတဦးကကပြောပါတယ်။

အဲဒီနောက်စက်တင်ဘာ ၃၀ ရက်​ ည ၉နာရီလောက်မှာ အချုပ်ကားထဲကို ဖမ်းဆီးထားသူတွေကိုထည့်ပါတယ်။အချုပ်ကားကိုတော့ရဲတွေကစောင့်ကြတာပါ။အချုပ်ကားမှာ အမျိုးသမီးနဲ့အမျိုးသားကို အဝတ်အဖြူလေးတခုခြားပြီး အကာလေးနဲ့ကာထားပါတယ်။

ကားပေါ်ကိုရောက်တဲ့အချိန်မှာတော့ ကိုလင်းပိုင်စိုးက တညလုံးအန်ပါတယ်။”ခေါင်းထိသွားတယ်ထင်တယ်။ည၉နာရီလောက်ကနေ တညလုံးမအိပ်ရဘူး။အန်တာ”လို့ မြင်​တွေ့ခဲ့သူကပြောပါတယ်။

အချုပ်ကားထဲရောက်နေတဲ့သူတွေက အချိုရည်တိုက်ဖို့ကြိုးစားကြပြီး ရဲတွေကို Royal D အချိုရည်ဗူးဝယ်ခိုင်းတော့ ဝယ်ပေးမယ်လို့ပြောပြီး ဘယ်ရဲမှပေါ်မလာတော့ပါဘူး။

“ညအစောပိုင်းကတော့ရေသောက်ချင်ရင်ရေလေးလာတိုက်တယ်။ည ၁၂နာရီနောက်ပိုင်းကြတော့ ဘယ်လိုမှခေါ်မရတော့ဘူး။အကုန်မကြားချင်ယောင်ဆောင်နေကြတာ”လို့ အ​ချုပ်ထဲမှာရှိခဲ့သူတဦးကအကြုံကိုဖွင့်ဟပါတယ်။

​ရေအရမ်းဆာ​လောင်​နေတဲ့ ကိုလင်းပိုင်စိုးအတွက်အမျိုးသမီးတွေဘက်မှာကျန်​နေတဲ့ ရေနည်းနည်းကို မုန့်ထုတ်အခွံ(ကြွပ်ကြွပ်အိတ်)ထောင့်လေးထဲကိုရေထည့်ပြီး အကာကြားထဲကနေ အမျိုးသမီးအချုပ်သမား​တွေက ​ပေးပြီးရေတိုက်ရပါတယ်။

ဒီလိုနည်းတခုထဲနဲ့သာ ကိုလင်းပိုင်စိုးရေသောက်ခွင့်အနည်းငယ်ရခဲ့တာပါ။

​နောက်တ​နေ့နံနက်ဖြစ်တဲ့အောက်တိုဘာ ၁ ရက်​နေ့ မနက်၉နာရီလောက်မှာ နာမည်ဆိုးနဲ့​ကျော်ကြားတဲ့ နန်းတွင်းစစ်ကြောရေးကိုပို့လိုက်ကြပါတယ်။

စစ်ကြောရေးဂိတ်အဝင်မှာကိုလင်းပိုင်စိုးကို ထပ်မံစစ်ဆေးရိုက်နှက်ကြပြန်ပါတယ်။

ကိုလင်းပိုင်စိုးက “ကျွန်တော့်ကိုခဏနားခွင့်ပေးပါ။အကုန်ဖြေပါ့မယ်”လို့ပြောပြီး ခွင့်တောင်းတာမို့အဲဒီနေရာမှာ သူခဏတော့နားခွင့်ရခဲ့ပါတယ်။

အဲဒီနောက်အဆောင်တွေဘက်ကို လမ်းလျှောက်ဝင်ရတဲ့အချိန်မှာကိုလင်းပိုင်စိုးလဲသွားပါ​တော့တယ်။

“အုန်းခနဲလဲကျတဲ့အသံကြားလို့ နောက်လှည့်ကြည့်လိုက်တဲ့အချိန်မှာ အဲတာသူဖြစ်နေတာပဲ။အဲတာက ကိုလင်းပိုင်စိုးကိုနောက်ဆုံးတွေ့လိုက်ရတဲ့အချိန်ပဲ”လို့ အတူတူဖမ်းဆီးခံခဲ့ရသူတဦးကပြောပါတယ်။ လဲကျသွားတဲ့ကိုလင်းပိုင်စိုးကို စစ်သားနှစ်ယောက်ကဆွဲခေါ်သွားပါ​တော့တယ်။

မနက်၁၁နာရီလောက်အရောက်မှာ အတူတူဖမ်းခံရတဲ့သူတွေအကုန်လုံးဆီကိုစစ်သားတွေကပဲ ကိုလင်းပိုင်စိုးသေဆုံးသွားပြီဖြစ်ကြောင်းလာ သတင်းစကား​ပေးကြပါတယ်။

အဲဒီနေ့ကစပြီး ကိုလင်းပိုင်စိုးဟာ အပြင်ကစောင့်မျှော်နေတဲ့သူ့မိဘတွေဆီရော၊ရဲဘော်ရဲဖက်မိတ်ဆွေဆီရော ပြန်ရောက်မလာတော့ပါဘူး။ကိုလင်းပိုင်စိုး ကျဆုံးပြီး​​နောက်ပိုင်းမှာကိုငြိမ်းမင်းသန့် လွတ်​မြောက်လာပြီး ၊ မကြည်ကြည်ဝင်းနဲ့ကိုတိုးတက်ဖုန်းမြင့်တို့ဟာ ​နောက်ပိုင်းမှ အတူတူလွတ်​မြောက်ခဲ့ကြပါတယ် ။

အဲဒီအချိန်မှာ မန္တလေးသပိတ်တွေကိုဖြိုခွင်းဖို့အဓိကညွန်ကြားနေတဲ့သူထဲမှာ အလယ်ပိုင်းတိုင်းစစ်ဌာန ချုပ်၊ တိုင်းဦးစီးချုပ်ဗိုလ်မှူးချုပ်သူရိန်ထွန်း လည်းအပါအဝင်ဖြစ်ပါတယ်။ ဒါ​ပေမယ့် ၂၀၂၄ ဒီဇင်ဘာ ၈ ရက်​နေ့မှာ​တော့ ဗိုလ်မှူးချုပ်သူရိန်ထွန်း ကို အာရက္ခတပ်​တော်(AA) က ​မောင်​တောနခခ (၅) စခန်းသိမ်းတိုက်ပွဲမှာ ထွက်​ပြေး​နေစဥ် ဖမ်းဆီးထားနိုင်ခဲ့ပြီဖြစ်ပါတယ် ။

ဗိုလ်မှူးချုပ်သူရိန်ထွန်း တိုင်းစစ်ဦးစီးချုပ်အဖြစ်တာဝန်ယူထားချိန်မှာ မန္တ​လေးမြို့ အ​ခြေစိုက်တဲ့ အလယ်ပိုင်းတိုင်းစစ်ဌာနချုပ် (လပခ) စစ်တိုင်းမှူး ဟာ ဗိုလ်ချုပ်ကိုကိုဦးဖြစ်ပါတယ် ။ သူတို့ နှစ်​ယောက်ဟာ မန္တ​လေးမြို့မှာ ငြိမ်းချမ်းစွာဆန္ဒပြ​နေတဲ့ပြည်သူ​တွေကို အကြမ်းဖက်သတ်ဖြတ်ဖြိုခွင်း

ဖို့ ၊ဖမ်းဆီးခံရတဲ့သပိတ်​ခေါင်း​ဆောင်း​တွေကို နန်းတွင်းစစ်​ကြော​ရေးမှာသတ်ဖြတ်ဖို့ အဓိကအမိန့်​ပေးခဲ့သူ​တွေဖြစ်ပါတယ်။

သပိတ်ခေါင်း​ဆောင်​တွေ ၊ပြည်သူ​တွေကို ရက်ရက်စက်စက်ဖမ်းဆီး နှိပ်စက် သတ်ဖြတ်တာ​တွေ​ကြောင့် နန်းတွင်းစစ်​ကြော​ရေးဟာနမည်ဆိုးနဲ့ ​ကျော်ကြားသလို ဒုတိယဗိုလ်ချုပ်ကိုကိုဦး နဲ့ ဗိုလ်မှူးချုပ်သူရိန်ထွန်း ကို အာဏာသိမ်း​ခေါင်း​ဆောင်ကရာထူးတိုးပြီး​မြောက်စားခဲ့​ပါ​သေးတယ်။

ဗိုလ်ချုပ် ကိုကိုဦးက​တော့ အခုအခါ ဒုတိယဗိုလ်ချုပ်ရာထူးနဲ့ အမှတ်(၁) စစ်ဆင်ရေးအထူးအဖွဲ့မှူး(ကစထ မှူး) တာဝန်ထမ်း​ဆောင်​နေတယ်။ ဒုတိယဗိုလ်ချုပ်ကိုကိုဦး ဟာ ဒီဇင်ဘာ ၁၅ ရက်မှာ တရုတ်အစိုးရ စီစဥ်တဲ့ ကိုးကန့်လက်နက်ကိုင်အဖွဲ့(MNDAA) နဲ့​​ဆွေး​နွေးပွဲမှာ စစ်​ကောင်စီ ကိုယ်စားလှယ်အဖွဲ့ကိုဦး​ဆောင်သွားခဲ့သူတဦးဖြစ်ပါတယ် ။

ဗိုလ်မှူးချုပ်သူရိန်ထွန်းကိုလည်းအာဏာသိမ်း​ခေါင်း​ဆောင်နဲ့ စစ်​​ကောင်စီအတွက် မန္တ​လေးတိုင်းစစ်ဌာနချုပ်မှာ ​ဆောင်ရွက်​ပေးခဲ့တာ​တွေအတွက်၂၀၂၂ ခုနှစ်မှာ ဗိုလ်မှူးချုပ်ရာထူးတိုးခဲ့သလို ၊ အာဏာသိမ်း​​ခေါင်း​ဆောင်ကချီးမြှင့်တဲ့စီမံထူးချွန်တံဆိပ်(ပထမအဆင့်)ကိုပါရခဲ့​ထားတာပါ။

သူတို့ ၂ ဦးနဲ့အတူ အောင်မြေသာစံမြို့နယ်ရဲမှူးကျော်ဇင်မြင့်ကလည်း ပြည်သူ​တွေရဲ့ သပိတ်ဖြိုခွင်းတာ​တွေကိုတက်တက်ကြွကြွလုပ်ခဲ့သူပါ။

ဒါ​ကောင့်ရဲမှူးကျော်ဇင်မြင့်ဟာ အာဏာသိမ်းခေါင်းဆောင်ကပေးတဲ့ပြည်သူ့ဝန်ထမ်းကောင်းဆုရခဲ့ပါတယ် ။ ​နောက်ပိုင်းမြို့နယ်ရဲမှူးကနေ မန္တလေးတိုင်းဒုတိယရဲမှူးကြီးအဖြစ်ရာထူးတိုးခဲ့ပါတယ် ။ မန္တ​လေးတိုင်းဒုတိယရဲမှူးကြီးအဖြစ် တက်ကြွ​နေတဲ့ ဒုရဲမှူးကြီးကျော်ဇင်မြင့်တစ်​ယောက်က​တော့တော်လှန်​ရေးအင်အားစု​တွေရှိတဲ့​နေရာကို စစ်ကြောင်းထိုးဖို့သွား​နေရင်းတောင်သာ-မြင်းခြံလမ်းပိုင်းမှာ ၂၀၂၄ ခုနှစ် မတ်လမှာ မိုင်းဆွဲခံရပြီး သေဆုံးခဲ့ပါတယ်။

သူတို့​တွေ လက်ချက်​ကြောင့် နန်းတွင်းစစ်​ကြော​ရေးမှာ ၊​လေးမျက်နှာဘုရားဝန်းမှာ ၊မန္တ​လေးမြို့ကလမ်းမ​တွေထက်မှာ ​ကြွေလွင့်ခဲရတဲ့ လူငယ်​တွေ၊ပြည်သူ​တွေအနည်းမ​နောရှိခဲ့ပါတယ် ။

စစ်ကိုင်းပညာရေးတက္ကသိုလ်ရဲ့ ဥက္ကဌမအေးနန္ဒာစိုး ၊ အသက်၁၉နှစ်အရွယ် လူငယ်သပိတ်ခေါင်းဆောင်ကိုသူရအောင် ၊အစ္စလာမ်ဘာသာဝင်ဖြစ်ပြီး အစ္စလာမ်လူငယ်သပိတ်၊မန္တလေးသပိတ်၊ပြည်ကြီးတံခွန်မြို့နယ်သပိတ်တွေမှာ တက်တက်ကြွကြွဦးဆောင်ခဲ့တဲ့အသက်၁၇နှစ်အရွယ်ကိုကျော်စွာဝင်း(ခ) Felix စတဲ့လူငယ်သပိတ်​ခေါင်း​ဆောင်​တွေကို လပခ ရဲ့နမည်ကြီးနန်းတွင်းစစ်​ကြော​ရေးမှာ ရက်ရက်စက်စက် နှိပ်စက်ငြှင်းပန်းနှိပ်စက်ပြီး လက်စ​ဖျောက်ခဲ့ကြတာပါ။

ဒါဟာလူသိများသူတွေရဲ့ဖြစ်စဥ်တချို့ပဲရှိပါတယ်။၂၀၂၁ခုနှစ်ဒီဇင်ဘာလတုန်းက People Spring ကြည့်ရှုခွင့်ရရှိခဲ့တဲ့ နန်းတွင်းစစ်ကြောရေးမှာ အဆက်အသွယ်ပျက်တောက်သွားတဲ့ လူငယ်တွေ၊မန္တလေးကသပိတ်အဖွဲ့ဝင်တွေရဲ့ စာရင်းဟာ သံဃာတွေအပါအဝင် ၃၀ ကျော်အထိရှိခဲ့ပါတယ်။

စစ်တပ်အာဏာသိမ်းပြီး​နောက်ပိုင်း နိုင်ငံတစ်ဝန်းမှာစစ်အုပ်စုနဲ့ စစ်​ကောင်စီလက်​အောက်ခံ​တွေကြောင့် ကျဆုံးခဲ့ရတဲ့ ဒီမိုကရေစီရေး လှုပ်ရှားသူ​တွေနဲ့ ပြည်သူစုစုပေါင်းမှာ (၆၀၄၉) ဦး ရှိခဲ့ပြီလို့နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)ကဒီဇင်ဘာ ၁၃ ရက်မှာထုတ်ပြန်ထားပါတယ် ။ဒါဟာ AAPP အတည်ပြုနိုင်တဲ့အ​ရေအတွက်သာဖြစ်ပြီး အတည်ပြုဖို့လို​နေ​​သေးတဲ့သူ ၂၇၅၀ခန့်ရှိ​နေ​သေးတယ်လို့ငိရပါတယ် ။ဒါ​ကြောင့် ​မြေပြင်မှာစစ်​ကောင်စီ​​ကြောင့်​သေဆုံး၊​ပျောက်ဆုံးသူအ​ရေအတွက်ဟာ ​အခုထက်ပိုများပါတယ် ။

ဒါအပြင် စစ်အုပ်စုဟာနိုင်ငံ​ရေးအကျဥ်းသမား​တွေအပါအဝင် ပြည်သူ ၂၇၈၇၂ ဦးကိုဖမ်းဆီးခဲ့ပြီး အဲဒီထဲက ၂၁၀၀၀ ​ကျော်ဟာအခုချိန်ထိဖမ်းဆီး​ထောင်ချခံ​နေရဆဲဖြစ်ပါတယ် ။

ကိုလင်းပိုင်စိုး အပါအဝင် ​နွေဦးတော်လှန်ရေးမှာ ကျဆုံးခဲ့သူတစ်ဦးချင်းစီအတွက် စစ်ကောင်စီနဲ့ အပေါင်းအပါ​တွေအားလုံးကို သွေးကြွေးပြန်ဆပ်ရင်း အောင်မြင်မှုပန်းတိုင် ဆွတ်ခူးနိုင်တယ်အထိ တိုက်ခိုက်ချေမှုန်းသွားမယ်လို့ဂေါ်ရခါးကာကွယ် ရေးတပ်(Gurkha Defence Force – GDF) က၂၀၂၁ ​အောက်တိုဘာလ ၁၉ ရက်မှာ​ကတိသစ္စာပြုခဲ့ပါတယ် ။

ကိုလင်းပိုင်စိုးရဲ့ မိသားစုဟာ သူတို့ရဲ့ အဖိုးတန်ရင်​သွေးဟာစစ်တပ်ရဲ့ နှိပ်စက်ညှင်းပန်းမှု​တွေ​ကြောင့်ကျဆုံးသွားပြီဆိုတာကိုကွယ်လွန်ပြီး နှစ်ပါတ်​ကျော်ကြာမှ သိခွင့်ရခဲ့ကြတာဖြစ်ပါတယ် ။

အာရက္ခတပ်တော် က လက်ရဖမ်းမိထားတဲ့ အမှတ် (၁၅) စစ်ဆင်ရေးကွပ်ကဲမှုဌာနချုပ်မှူး (စကခ-၁၅) ဗိုလ်မှူးချုပ် သူရိန်ထွန်းကို ပြစ်မှုပြစ်ဒဏ်မျှတအောင် စစ်ဆေးစီရင်သွားမယ်လို့AA ပြောရေးဆိုခွင့်ရှိသူ ဦးခိုင်သုခက ဧရာဝတီ သတင်းဌာနကိုပြောထားပါတယ် ။သူဟာ ၂၀၁၇ ခုနှစ်က စစ်အုပ်စုရဲ့ ရိုဟင်ဂျာလူမျိုး​တွေကို လူမျိုးတုံးသတ်ဖြတ်မှု​တွေကျူးလွန်တာမှာ ပါဝင်ခဲ့သူ ၊ ၂၀၂၄ခုနှစ်မှာ ရခိုင်ပြည်နယ်မှာ AA နဲ့ ရိုဟင်ဂျာ ၊ ရခိုင် နဲ့ ရိုဟင်ဂျာ ပြည်သူ​တွေကိုအမုန်းပွား​အောင် လူမျိုး​ရေး၊ဘာသာ​ရေး မိုင်း​တွေ​ထောင်ခဲ့သူဆိုတဲ့စွပ်စွဲချက်​တွေကိုလည်း ရင်ဆိုင်​နေရပြီဖြစ်ပါတယ် ။

ကိုလင်းပိုင်စိုးရဲ့ မိတ်​ဆွေ​​တွေ ၊​တော်လှန်​ရေးရဲ​ဘော်ရဲဘက်​တွေက​တော့ လပခ စစ်​ကြော​ရေးမှာ ရက်ရက်စက်စက် နှိပ်စက်သတ်ဖြတ်ခဲ့မှုအတွက်ဗိုလ်မှူးချုပ် သူရိန်ထွန်း ကို စစ်​ဆေး ​ဖော်ထုတ်ပြီး တရားမျှတမှု ပြန်လည်ရယူ​ပေးနိုင်နိုင်ဖို့​မျှော်လင့်​နေကြပါတယ် ။ ။