မြန်မာ့ နိုင်ငံရေး အခြေအနေကို ကြားဝင် စေ့စပ်ပေးဖို့ အာဆီယံရဲ့ အထူးကိုယ်စားလှယ် အဖွဲ့တစ်ခု ဖွဲ့စည်းဖို့ တောင်းဆိုခဲ့ကြောင်း အင်ဒိုနီးရှား သမ္မတ ဂျိုကို ဝီဒိုဒိုက ပြောကြားခဲ့ပါတယ်။
အင်ဒိုနီးရှားနိုင်ငံ၊ ဂျကာတာမြို့တော်မှာ ဧပြီ ၂၄ ရက်က ပြုလုပ်တဲ့ အာဆီယံ ထိပ်သီး အစည်းအဝေးကို တက်ရောက်ခဲ့တဲ့နောက် ဝီဒိုဒိုက သတင်းထောက်တွေကို အခုလို အသိပေးခဲ့တာပါ။ ဒီအစည်းအဝေးဟာ နိုင်ငံရေး အကျပ်အတည်းတွေနဲ့ ရုန်းကန်နေရတဲ့ မြန်မာ့ နိုင်ငံရေး အကျပ်အတည်းတွေကို ပြေလျော့စေဖို့ အဓိက ရည်ရွယ်ထားတာ ဖြစ်ပါတယ်။
အာဆီယံက ဖွဲ့စည်း စေလွှတ်မယ့် အထူးကိုယ်စားလှယ် အဖွဲ့ဟာ မြန်မာ့ နိုင်ငံရေး နယ်ပယ်က ဆက်စပ်ပါဝင်သူ အားလုံးနဲ့ ထိတွေ့ ညှိနှိုင်းပြီး အဖြေတစ်ခု ရှာဖွေနိုင်မယ်လို့ မျှော်လင့်ကြောင်း ဝီဒိုဒိုက ဆိုပါတယ်။ ပြီးတော့ မြန်မာနိုင်ငံမှာ အထောက်အပံ့ လမ်းကြောင်းတွေ ဖွင့်လှစ်ပေးဖို့နဲ့ နိုင်ငံရေး အကျဉ်းသား အားလုံးကို လွှတ်ပေးဖို့လည်း တောင်းဆိုခဲ့ကြောင်း အင်ဒိုနီးရှား သမ္မတက ပြောကြားသွားပါတယ်။
အာဆီယံ အဖွဲ့ဝင် ၁၀ နိုင်ငံဟာ မြန်မာ့ အရေးနဲ့ ပတ်သက်လို့ ဘုံသဘောတူညီမှုတစ်ခု ရရှိခဲ့ပြီး အာဆီယံ အထွေထွေ အတွင်းရေးမှူးက ကြေညာလိမ့်မယ်လို့လည်း ဝီဒိုဒိုက ဆိုပါတယ်။
Public Service Announcement
ဖေဖော်ဝါရီ ၁ ရက်မှာ မြန်မာစစ်တပ် အာဏာသိမ်းခဲ့တဲ့အပေါ် ဆန္ဒပြတဲ့ ပြည်သူတွေကို အကြမ်းဖက် ဖြိုခွင်းမှုတွေကြောင့် လူပေါင်း ၇၃၀ ကျော် အသက် ဆုံးရှုံးခဲ့ရပါတယ်။ အာဆီယံ အစည်းအဝေးဟာ မြန်မာ့ နိုင်ငံရေး အကျပ်အတည်းနဲ့ ပတ်သက်လို့ နိုင်ငံတကာ ပူးပေါင်း ဖြေရှင်းမှုတွေရဲ့ ကနဦးအစ ခြေလှမ်းတစ်ခု ဖြစ်နိုင်ကြောင်းလည်း လေ့လာသူတွေက သုံးသပ်ထားကြပါတယ်။
