မင်းတပ်မြို့နယ်တွင် စစ်ကောင်စီတပ်သားများက ဖမ်းဆီးနှိပ်စက်ထားသည့် မသန်စွမ်းဦးမာန်မောင်း နှင့် ကျည်ထိမှန် အမျိုးသမီးတို့ကို ဆေးကုသမှု ပေးနိုင်ခဲ့ကြောင်း မင်းတပ်ပြည်သူ့အုပ်ချုပ်ရေးအဖွဲ့က ယနေ့ ထုတ်ပြန်သည်။
အသက် ၄၇ နှစ်အရွယ်ဦးမာန်မောင်းသည် စိတ်ကျန်းမာ ရေးချို့တဲ့သူဖြစ်ပြီး ဇွန်လ၁၀ရက်တွင် ဘုရားစခန်းရွာထဲသို့ စစ်ကောင်စီတပ်များ ဝင်ရောက်လာပြီး ၎င်းကို ဖမ်းဆီးရိုက်နှက်ခဲ့ကြောင်း ထုတ်ပြန်သည်။
ထိုသို့ရိုက်နှက်မှုကြောင့် ဦးခေါင်းနှင့်ခြေထောက်ဒဏ်ရာများရရှိ၍ ဆေးကုသမှုပေးနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။အသက် ၆၃နှစ်အရွယ် ဒေါ်ဂေစိမ်းငှိမ်းဟာ စိတ်ကျန်းမာ ရေးမကောင်းမှု လေးနှစ်ခန့်ရှိပြီဖြစ်ပြီး အိပ်ရာအတွင်းလဲနေသူဖြစ်ကြောင်း ထုတ်ပြန်ချက်က ဆိုသည်။
“ သူ့အိမ်ခေါင်မိုးပေါ်က ဆိုလာပြားကိုတက်ဖြုတ်နေတဲ့ စကစစ်သားကို မဖြုတ်ဖို့ အိမ်ထဲကနေ အော်ပြောတဲ့အတွက် အပစ်ခံရတာပါ။ ကျည်တွေက သွပ်ခေါင်မိုးကိုဖောက်ပြီး အိပ်ရာထဲလဲနေတဲ့ ဒေါ်ဂေစိမ်းငှိမ်းရဲ့ ညာဘက်ပေါင်နဲ့ ခြေသလုံးကို ထိမှန်ခဲ့တာ ဖြစ်ပါတယ်။ သေနတ်ဒဏ်ရာတွေကို ခွဲစိတ်သန့်စင် ချုပ်လုပ် ပတ်တီး စည်းပြီး ကုသမှုပေးခဲ့ပါတယ်” ဟု မင်းတပ်ပြည်သူ့အုပ်ချုပ်ရေးအဖွဲ့က ထုတ်ပြန်ထားသည်။
Public Service Announcement
အဆိုပါ နှစ်ဦးကို လေးရက်အကြာမှသာ ဆေးကုသမှုပေးနိုင်ခဲ့ကြောင်း ထုတ်ပြန်သည်။
