စစ်ကိုင်းတိုင်းဒေသကြီး ဒီပဲယင်းမြို့နယ်တွင် ပြည်သူ့ကာကွယ်ရေးတပ်ဖွဲ့(PDF)တပ်ဖွဲ့ဝင် ၃၀ ကျော် ကျဆုံးခဲ့ရခြင်းမှာ တိုက်ပွဲတွင် ဒဏ်ရာရသူများကို စစ်ကောင်စီတပ်က ပစ်သတ်သွား၍ ဖြစ်ကြောင်း အဆိုပါမြို့ဒေသခံတစ်ဦးက ပြောသည်။
ဒီပဲယင်းမြို့နယ် ဆပ်ပြာကျင်းရွာနှင့် ကျွန်းတောရွာကြားတွင် ဇူလိုင် ၂ရက်က PDFနှင့် စစ်ကောင်စီတပ်များ တိုက်ပွဲဖြစ်ပွားခဲ့ရာ PDF ၃၀ ကျော်ကျဆုံးပြီး ၁၀ဦးကျော် ဒဏ်ရာရရှိခဲ့သည်။ စစ်ကောင်စီဘက်မှလည်း ၄ဦးခန့် သေဆုံးခဲ့ကြောင်း PDFက ထုတ်ပြန်ခဲ့သည်။
စစ်ကောင်စီတပ်များ ဝင်လာ၍ ဒေသခံများ ထွက်ပြေးတိမ်းရှောင်ရာ လက်နက်ကြီးဖြင့် ပစ်ခတ်ခဲ့၍ PDFက ပြန်လည်ခုခံခဲ့ခြင်းဖြစ်ကြောင်း၊ ထိုသို့ ခုခံခြင်းကို စစ်ကောင်စီက လက်နက်ကြီးများ အချက် ၄၀ကျော် ပစ်ခတ်ခဲ့၍ ဒဏ်ရာရသူများပြားခဲ့ကြောင်း ဒေသခံက ပြောသည်။
“တိုက်ပွဲပြီးတဲ့အချိန်မှာ စစ်ကြောင်းထိုးပြီးတော့ ဒဏ်ရာရလို့ မပြေးနိုင်တဲ့ သူတွေနဲ့ ပုန်းခိုနေတဲ့ သူတွေတို့ကို ပစ်သတ်သွားတာ” ဟု ၎င်းက ဆိုသည်။
Public Service Announcement
ယနေ့နေ့လည်ပိုင်းရှိ စစ်ကောင်စီတပ်များက ကျေးရွာများ နှင့် PDFများ ပုန်းခိုနိုင်ဖွယ်ရှိသော နေရာများကို စစ်ကြောင်းထိုး၍ ရှာဖွေမှုများ ပြုလုပ်နေကြောင်း ဒေသခံက ပြောသည်။
ဒီပဲယင်းမြို့နယ်သည် စစ်အာဏာရှင်ဆန့်ကျင်ရေး လူထုလှုပ်ရှားမှု အားကောင်းခဲ့သည့် မြို့နယ်တစ်ခုဖြစ်ပြီး စစ်ကောင်စီတပ်များက ကျေးရွာများသို့ မကြာခဏ ဝင်ရောက်စီးနင်းခြင်းများ ပြုလုပ်ခဲ့သည်။
