'/%3E%3C/svg%3E){kind=small}
ကယားပြည်နယ် လွိုင်ကော်မြို့နယ်တွင် ကရင်နီအမျိုး သားတိုးတက်ရေးပါတီ(KNPP/KA)နှင့် အာဏာသိမ်းစစ်တပ်တို့ ယနေ့ တိုက်ပွဲထပ်မံဖြစ်ပွားခဲ့ကြောင်း KNPP သတင်းနှင့်ပြန်ကြားရေးဌာန KNICက သတင်းထုတ်ပြန်သည်။
KNPP အမှတ်(၃)တပ်ရင်း လှုပ်ရှားရာ နယ်မြေဖြစ်သည့် လွိုင်ကော်မြို့နယ် လွိုင်လင်လေးမြို့အရှေ့ဘက် ဒေါတဟေးရွာနှင့် တီးလုံရွာ အကြားတွင် ဇူလိုင် ၁၂ရက် ၈နာရီခန့်က နာရီဝက်ကြာ တိုက်ပွဲဖြစ်ပွားခဲ့ခြင်းဖြစ်သည်ဟုဆိုသည်။
တိုက်ပွဲဖြစ်ပွားရခြင်းအကြောင်းအရင်းမှာ ယင်းဒေသသို့ စစ်ကောင်စီတပ်မှ ဝင်ရောက်လာ၍ ဖြစ်ကြောင်း၊ စစ်ကောင်စီတပ်မှ ပြန်လည်ဆုတ်ခွာခြင်း မရှိပါက တိုက်ပွဲများ ထပ်မံဖြစ်ပွားနိုင်ကြောင်းလည်း KNICတွင် ဖော်ပြထားသည်။
(KNPP တပ်သားများ၏ပုံမှာ ပုံဟောင်းဖြစ်ပါသည်) (KNPP တပ်သားများ၏ပုံမှာ ပုံဟောင်းဖြစ်ပါသည်)
ဇူလိုင် ၃ရက်က လွိုင်ကော်မြို့အနီးတွင် စစ်ကောင်စီနှင့် KNPP တပ်တို့ တိုက်ပွဲနှစ်ကြိမ်ဖြစ်ပွားပြီးနောက် ယခုထပ်မံ တိုက်ပွဲဖြစ်ပွားခြင်းဖြစ်သည်။
Public Service Announcement
ယင်းမတိုင်မီ ဇူလိုင် ၂ရက်ကလည်း လွိုင်ကော်- ရှားတော လမ်းပိုင်း ပွန်ချောင်းအနီးတွင် စစ်ကောင်စီတပ်ကို KNPPက ကြားဖြတ်တိုက်ခိုက်ခဲ့သည်။
စစ်တပ်အာဏာသိမ်းပြီးနောက်ပိုင်းတွင် KNPPနှင့် စစ်ကောင်စီတို့သည် မေလ ၂၀ရက်တွင် တိုက်ပွဲ စတင်ဖြစ်ပွားခဲ့သည်။
ထို့နောက် ဇူလိုင် ၂ရက်မှ စ၍ တိုက်ပွဲဖြစ်ပွားမှု မကြာခဏ ဖြစ်ပွားခဲ့ရာ ၁၀ရက်အတွင်း တိုက်ပွဲ ၄ကြိမ်ဖြစ်ခဲ့သည်။
ဇူလိုင် ၂ရက် တိုက်ပွဲတွင် စစ်ကောင်စီဘက်မှ သေဆုံးထိခိုက်မှုရှိနိုင်ကြောင်း KNICက သတင်းဖော်ပြခဲ့ပြီး နောက်ပိုင်းဖြစ်သည့် တိုက်ပွဲများတွင် ထိခိုက်ကျဆုံးမှု အခြေအနေများ ဖော်ပြထားခြင်းမရှိပေ။
