အမျိုးသားညီညွတ်ရေးအစိုးရက ကချင်အာဇာနည်နေ့သို့ သဝဏ်လွှာပို့

ကချင်လက်နက်ကိုင်အဖွဲ့(KIO/KIA) ခေါင်းဆောင်များ ကျဆုံးခဲ့သည့် အထိမ်းအမှတ်နေ့ဖြစ်သော ကချင်အာဇာနည်နေ့သို့ အမျိုးသားညီညွတ်ရေးအစိုးရ(NUG) က သဝဏ်လွှာပေးပို့ခဲ့သည်။

KIO/KIAကို စတင်တည်ထောင်ကာ ဦးဆောင်ခဲ့ကြသည့် ကချင် အမျိုးသား ခေါင်းဆောင်များ ကျဆုံးခဲ့သည့် ဩဂုတ် ၁၀ရက်ရောက်တိုင်း ကချင်အာဇာနည်နေ့အဖြစ် ကျင်းပခဲ့သည်။

ယနေ့ကျရောက်သည့် (၄၆) နှစ်မြောက် ကချင်အာဇာ နည်နေ့တွင် အမျိုးသားညီညွတ်ရေးအစိုးရအနေဖြင့် ကျဆုံးလေပြီးသော ကချင်အမျိုးသား ခေါင်းဆောင်ကြီးများကို သတိရ အောက်မေ့ကြောင်း သဝဏ်လွှာတွင် ဖော်ပြခဲ့သည်။

ထို့ပြင် ကချင်လူမျိုးများ၏ ကိုယ်ပိုင် ပြဋ္ဌာန်းခွင့်ရရှိရေး၊ မြန်မာနိုင်ငံတွင် ဖက်ဒရယ်ဒီမိုကရေစီစနစ် ပေါ်ထွန်းလာရေး ရည်မှန်းချက်များ အောင်မြင်ပါစေဟု သဝဏ်လွှာ၌ ရေးသားထားသည်။

Public Service Announcement

KIO ဥက္ကဋ္ဌ ဗိုလ်ချုပ်ကြီးအင်ဘန်လကလည်း KIO/KIA ၏ ရည်မှတ်းချက်များဖြစ်သော အာဏာရှင်စနစ်ဆန့်ကျင်ရေးနှင့် ဖက်ဒရယ်စနစ်ထူထောင်ရေးကို အကောင်အထည်ဖော် နိုင်ရန်အတွက် အားလုံးနှင့်အတူ ပူးပေါင်းဆောင်ရွက်ကြရန် ၎င်း၏ ကချင်အာဇာနည်နေ့ မိန့်ခွန်း၌ထည့်သွင်း ပြောကြားခဲ့သည်။

ဗိုလ်ချုပ်ကြီး အင်ဘန်လ၏ မိန့်ခွန်းကို KIA စစ်ဦးစီးချုပ် ဗိုလ်ချုပ်ကြီးဂမ်ရှောင်က ကချင်ဘာသာဖြင့် ဖတ်ပြခဲ့ခြင်းဖြစ်ကြောင်း ကချင်တိုင်းရင်းသားတစ်ဦးက ပြောသည်။