စစ်ကောင်စီတပ်များသည် သြဂုတ် ၁၆ ရက်ညက ဘုတလင်မြို့ရှိ ကျောက်ပုံတော ဘုန်းကြီးကျောင်း၌ ဆရာတော်၏ ခွင့်ပြုချက်မရဘဲ ညအိပ်တပ်စွဲခဲ့ပြီးနောက် ယနေ့(သြဂုတ်၁၇ ရက်)နံနက်ပိုင်း၌ ကျောင်းတွင်းမွှေနှောက် ရှာဖွေမှုများ ပြုလုပ်ခဲ့ပြီး ကျောင်းပိုင် ကြိုးဆွဲမီးစက်ကြီးအား မီးရှို့ဖျက်ဆီးသွားကြောင်း ဒေသခံများက ပြောသည်။
စစ်ကောင်စီတပ်များသည် ယနေ့နံနက်တွင် ကျောက်ပုံတောဘုန်းကြီးကျောင်းမှထွက်ခွာခဲ့ပြီး တော်ဦးဘရွာ၊ ထနောင်းပကားရွာများသို့ ဝင်ရောက်ရှာဖွေမှုများ ပြုလုပ်ခဲ့ကြောင်း၊ စစ်သားအင်အား တစ်ရာနီးပါးခန့်ရှိကြောင်း ဒေသခံများက ပြောသည်။
ကျောက်ပုံတောဘုန်းကြီးကျောင်းသည် ဘုတလင်မြို့နယ် ဝက်ရဲကျေးရွာတောင်ဘက်တွင် တည်ရှိပြီး တောရကျောင်းတစ်ကျောင်းဖြစ်ကာ သီတင်းသုံးကျောင်းထိုင် ဆရာတော်တစ်ပါးသာရှိကြောင်း ၎င်းဆရာတော်ကြီးလည်း ဘေးလွတ်ရာရှောင်တိမ်းနေကြောင်း သိရသည်။
