ဆေးကုသမှုခံယူနေတဲ့ ပဲခူးမြို့က နိုင်ငံရေးအကျဉ်းသားဟောင်းကိုရန်ပိုင်စိုးအား စစ်ကောင်စီက ယမန်နေ့ညပိုင်းမှာ ဆေးရုံကိုလာရောက်ဖမ်းဆီးလိုက်ပါတယ်။
ကိုရန်ပိုင်စိုးဟာ လွန်ခဲ့တဲ့ သုံးရက်ကစပြီး ပဲခူးဆေးရုံကြီးမှာ ဆေးကုသမှုခံယူနေတာဖြစ်ပြီး ပဲခူးမြို့ ဆိုရှယ်လစ် ၁၀ လမ်းက အိမ်ကိုသွားရောက်ရှာဖွေရာမှာ ဆေးရုံတက်နေတဲ့အကြောင်း စစ်ကောင်စီကသိရှိရာက ခုလိုဆေးရုံမှာအဖမ်းခံရတာလို့ ကိုရန်ပိုင်စိုးရဲ့ မိတ်ဆွေတစ်ဦးက ပြောပါတယ်။
“တုပ်ကွေးဖြစ်လို့ ဆေးရုံမှာ သွေးရေကြည်သွင်းနေရတာ ၃ ရက်ရှိပြီ။ ညက(သြဂုတ် ၂၅) ၁၂ နာရီမှာ အိမ်မှာလာဖမ်းတာ။ ဆေးရုံတက်နေတယ်ဆိုလို့ ဆေးရုံမှာ သွားဖမ်း။ အခုဆေးရုံမှာပဲရှိသေးတယ်”လို့ ကိုရန်ပိုင်စိုးရဲ့ မိတ်ဆွေက ပြောပါတယ်။
ဖေဖော်ဝါရီ ၁ ရက်စစ်တပ်က အာဏာသိမ်းပြီးတဲ့နောက် အာဏာရှင်ဆန့်ကျင်ရေးလှုပ်ရှားမှုတွေမှာပါဝင်ခဲ့တဲ့ ကိုရန်ပိုင်စိုးကို စစ်ကောင်စီက ပုဒ်မ ၅၀၅ (က)နဲ့ ဖမ်းဝရမ်းထုတ်ထားခဲ့ပြီး လက်ရှိအဖမ်းခံရချိန်မှာလည်း ဆေးရုံမှာလက်ထိပ်ခတ်ခံထားရတယ်လို့ သူ့မိတ်ဆွေတွေက ပြောပါတယ်။
Public Service Announcement
“ဆေးရုံကို ကိုယ်တိုင်သွားတွေ့ခဲ့ပါတယ်။ သူက အရိုးအကြောဆောင်မှာပါ။ (PDF)သင်တန်းဆင်း ပြန်လာတယ်လို့ စွပ်စွဲပြီးဖမ်းတယ်လို့ သိရပါတယ်”လို့ ကိုရန်ပိုင်စိုးရဲ့ မိတ်ဆွေတစ်ဦးက အတည်ပြုပါတယ်။
လက်ရှိအခြေအနေမှာ ကိုရန်ပိုင်စိုးနဲ့အတူ မိခင်ဖြစ်သူလည်း ဆေးကုသမှုခံယူနေရပြီး ဖခင်ဖြစ်သူကတော့ ပြီးခဲ့တဲ့ရက်ပိုင်းကပဲ ကိုဗစ်ရောဂါနဲ့ ကွယ်လွန်ခဲ့ပါတယ်။
