ရန်ကုန်မြို့က မြို့နယ်နှစ်ခုမှာ ယမန်နေ့ညက အကြမ်းဖက်စစ်ကောင်စီတပ်တွေက ပစ်ခတ်ဖမ်းဆီးတာတွေကျူးလွန်ခဲ့တယ်လို့ ဒေသသတင်းရင်းမြစ်တွေက ပြောပါတယ်။
ဖြစ်စဉ်ဖြစ်ပွားခဲ့တဲ့မြို့နယ်တွေကတော့ မင်္ဂလာတောင်ညွန့်နဲ့ ကမာရွတ်မြို့နယ်တွေဖြစ်ပြီး ပစ်ခတ်မှုကြောင့် တစ်ဦးသေဆုံးကာ ဖမ်းဆီးခံရသူ အနည်းဆုံးလေးဦးရှိတယ်လို့ စုံစမ်းသိရပါတယ်။
မင်္ဂလာတောင်ညွန့်ဖြစ်စဉ်မှာ မနေ့ည ၉ နာရီဝန်းကျင်မှာ ၁၂၂ လမ်းသို့ စစ်ကောင်စီတပ်များရောက်ရှိလာပြီး လမ်းအတွင်းသို့သေနတ်များဖြင့်ပစ်ခတ်တာကြောင့် ၁၂၁ လမ်းမှ ပေါင်မုန့်ရောင်းတဲ့အမျိုးသားတစ်ဦး နေရာတင် ပွဲချင်းပြီးသေဆုံးခဲ့ပါတယ်။
သေဆုံးသူဟာ ဦးသိန်းမင်းထွန်းဆိုသူဖြစ်ပြီး ၎င်းဟာ ၁၂၁ လမ်းမှာ ပေါင်မုန့်ရောင်းသူဖြစ်တယ်လို့ ဒေသခံတွေက ပြောပါတယ်။
Public Service Announcement
အလားတူ ကမာရွတ်မြို့နယ်မှာလည်း (၃)ရပ်ကွက်နဲ့ (၁)ရပ်ကွက်တွေကို စစ်ကောင်စီတပ်တွေက ည ၁၂ နာရီခန့်မှာ ဝင်ရောက်ရှာဖွေဖမ်းဆီးတာတွေ ပြုလုပ်ခဲ့ပါတယ်။
(၃) ရပ်ကွက်ထဲဝင်ရောက်ရှာဖွေရာမှာ မြနန္ဒာလမ်းနဲ့ ထန်းတပင်လမ်းတွေကို ဝင်ရောက်ခဲ့ပြီး ပြည်သူသုံးဦးအဖမ်းခံရတဲ့အပြင် စစ်တပ်ကားပေါ်မှာ အဖမ်းခံထားရသူတစ်ဦးလည်း ရှိနှင့်နေတာတွေ့ရတယ်လို့ မျက်မြင်တွေ့ရှိသူတွေကိုကိုးကားပြီး ကမာရွတ်မြို့နယ်ရဲ့ KMY-Info က ဖော်ပြပါတယ်။
ရပ်ကွက်အတွင်းဖမ်းဆီးခံရသူသုံးဦးအနက် နှစ်ဦးကို သွေးထွက်သံယိုဖြစ်တဲ့အထိ ရိုက်နှက်နှိပ်စက်တာတွေ ကျူးလွန်ခဲ့သလို အနီးဝန်းကျင်တိုက်ခန်းတွေကို ခဲနဲ့ပေါက်တာ လေးခွနဲ့ပစ်ခတ်တာတွေပါရှိခဲ့တယ်လို့ ဒေသခံတွေက ဆိုပါတယ်။
