အာဏာသိမ်းစစ်ကောင်စီလက်အောက်ခံ ကရင်နယ်ခြားစောင့်တပ်ဖွဲ့(BGF) တပ်ဖွဲ့ဝင်အချို့ ပြီးခဲ့သည့် ရက်ပိုင်းက ထွက်ပြေးသွား၍ သက်ဆိုင်ရာတာဝန်ရှိသူများက စုံစမ်းစစ်ဆေးနေကြောင်း သတင်းရရှိသည်။
ထွက်ပြေးသည့် အရေအတွက် အတိအကျမသိရသေးသော်လည်း ယင်း BGF တပ်ဖွဲ့ဝင်များမှာ ကြားအင်းဆိပ်ကြီးမြို့နယ် ထီးဟူသံ အခြေစိုက် BGF တပ်နယ်(၄)လက်အောက်ခံ ၁၀၂၁ တပ်ရင်းမှ ဖြစ်သည်ဟု ဆိုသည်။
“တပ်သားအချို့ထွက်ပြေးမှုရှိတယ်။ ပြီးခဲ့တဲ့ဖလူးတိုက်ပွဲတုန်းကလိုပုံစံမျိုးပဲ” ဟု ကရင်ဒေသခံက ပြောသည်။
နယ်ခြားစောင့်တပ် ၁၀၂၁ တပ်ရင်းက တပ်ဖွဲ့ဝင်အချို့ ထွက်ပြေးသွား၍ အင်အားနည်းသွားသည့် BGF တပ်သို့ ရွှေကုက္ကိုဒေသရှိ နယ်ခြားစောင့်တပ်တပ်ဖွဲ့ဝင်များဖြင့် အင်အားဖြည့်ထားသည်ဟု ဆိုသည်။
Public Service Announcement
လက်ရှိတွင် အာဏာသိမ်းစစ်ကော်စီက BGF တပ်များကို အသုံးပြုပြီး ကရင်အမျိုးသားအစည်းအရုံး(KNU)နယ်မြေများသို့ စစ်ရေးလှုပ်ရှားမှုများ ထိုးစစ်ဆင်မှုများ လုပ်ဆောင်နေသည်။
ပြီးခဲ့သည့် ဩဂုတ် ၂၃ရက် ဝန်းကျင်က BGF တပ်များကို အသုံးပြုပြီး KNU တပ်မဟာ(၆)နယ်မြေ ကော့ကရိတ်မြို့နယ်သို့ ထိုးစစ်ဆင်ရန် ပြင်ဆင်ခဲ့၍ တိုက်ပွဲဖြစ်ပွားမှုများ ရှိခဲ့သည်။ KNU တပ်မဟာ(၅)နယ်မြေ ဖာပွန်ခရိုင်တွင်လည်း စစ်ကောင်စီတပ်က BGF တပ်များကို အသုံးပြုပြီး စစ်ရေးလှုပ်ရှားနေသည်။
