အမရပူရမြို့ တောင်သမန်အင်းပတ်လမ်းတွင် ယမန်နေ့က စစ်ကောင်စီတပ်ကား ဗုံးခွဲတိုက်ခိုက်ခံခဲ့ရသဖြင့် ညပိုင်းတွင်စစ်ကောင်စီတပ်များက ဒေသခံများအား ရိုက်နှက်စစ်ဆေးမေးမြန်မှုများ ပြုလုပ်ခဲ့ကြောင်း မြို့ခံများကပြောသည်။
စက်တင်ဘာလ ၅ ရက် နံနက် ၁၁ နာရီဝန်းကျင်က အမရပူရမြို့၊ ရွှေဂွမ်းထုပ်ရပ်ကွက်၊ တရုတ်တန်းလေးရပ်၊ တောင်သမန်အင်းကန်ပတ်လမ်းတွင် စစ်ကောင်စီတပ်ကားတစ်စိး ဗုံးခွဲတိုက်ခိုက်ခံရပြီးနောက် ညပိုင်းတွင် အဆိုပါရပ်ကွက်များသို့ စစ်ကောင်စီတပ်များ ရောက်ရှိလာပြီး
လူငယ်များအား လမ်းပေါ်သို့ခေါ် ၍ စစ်ဆေးမေးမြန်းပြီး ရိုက်နှက်၍စစ်ဆေးမေးမြန်ခဲ့ကြောင်း မြို့ခံများက ပြောသည်။လူငယ် ၂၀ ကျော် ရိုက်နှက်နှိပ်စက်မေးမြန်းခံခဲ့ရကြောင်း ဒေသခံအချို့ကပြောသည်။
“သေနတ်တွေလည်းပစ်တယ်။ အိမ်တိုင်းစေ့ဝင်ပြီး လူငယ်တွေအကုန်ထွက်ခိုင်းတယ်။ ပြီးတော့ မနက်ကဖြစ်တဲ့ကိစ္စနဲ့ပတ်သက်ပြီးမေးတယ်။ ရိုက်နှက်ပြီးလည်းမေးတယ်။”ဟု အမရပူရ နယ်ခံတစ်ဦးက ပြောသည်။
ထိုအပြင် ဗုံးပေါက်ကွဲပြီးနောက် နေ့လယ်ပိုင်းတွင် ပေါက်ကွဲမှုဖြစ်စဥ်အား မှတ်တမ်းတင်ထားသည့် ဗွီဒီယိုဖိုင်တစ်ခု ပျံ့နှံ့ခဲ့သဖြင့် ဒေသခံများအား အဆိုပါရုပ်သံဖိုင်
နှင့်ပတ်သက်၍လည်း ရိုက်နှက် မေးမြန်းကြောင်း ဒေသခံတို့က ပြောသည်။ အဆိုပါရုပ်သံဖိုင်တွင် စစ်ကောင်စီရဲကားဖြတ်သွားစဥ်ဗုံးပေါက်ကွဲသွားသည်ကို ခပ်လှမ်းလှမ်းမှ ရိုက်ကူးထားခြင်းဖြစ်သည်။
ထိုအပြင်ယမန်နေ့နံနက်ပိုင်းကလည်း စစ်အာဏာရှင်အလိုမရှိကြောင်း စာရွက်များကို တောင်သမန်ကန်ပတ်လမ်းတစ်လျှောက် ကြဲချ ဆန္ဒပြခဲ့သည်။နေ့ခင်းပိုင်းတွင် ဗုံးပေါက်ကွဲမှုဖြစ်ပွားပြီးနောက် အမရပူရမြို့အား တင်းကျပ်စွာ စစ်ဆေးခဲ့ခြင်းဖြစ်သည်။
အာဏာသိမ်းစစ်ကောင်စီ၏ ဝါဒဖြန့် မီဒီယာများက အဆိုပါပေါက်ကွဲမှုတွင် ဒဏ်ရာရရှိသူများမှာ ပြည်သူ ၃ ဦးဟုဆိုသည်။
