ဒီးမော့ဆိုတွင် တိုက်ပွဲဆက်ဖြစ်၊ စစ်ကောင်စီတပ်က လက်နက်ကြီးပစ်ခတ်၍ အရပ်သားအချို့ဒဏ်ရာရ

ကယားပြည်နယ် ဒီးမော့ဆိုမြို့နယ်၌ ယနေ့ စက်တင်ဘာ ၂၀ရက်တွင် တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်က လက်နက်ကြီးပစ်ခတ်၍ အရပ်သားအချို့ ဒဏ်ရာရရှိခဲ့ကြောင်း ကရင်နီအမျိုးသား ကာကွယ်ရေးတပ်ဖွဲ့(KNDF) ပြောရေးဆိုခွင့်ရှိသူတစ်ဦးက ပြော သည်။

“ကုန်းသာမှာ စစ်တပ်က လက်နက်ကြီးနဲ့ ရမ်းသမ်းပစ်ခတ်လို့ ရွာသားတစ်ယောက်လက်နက်ကြီး ကျည်စထိမှန်တာတော့ရှိတယ်။ ဒီနေ့ကတော့ ဒေါပိုးစီနားတစ်၀ိုက်ကတော့ တိုက်ပွဲဖြစ်တယ်။ လွိုင်ကော်အထွက် အဲဒီနားတစ်၀ိုက်မှာ ဖြစ်တာ”ဟု ၎င်း ကဆိုသည်။

ကရင်နီအမျိုးသားတိုးတက်ရေးပါတီ(KNPP)၏ သတင်းနှင့် ပြန်ကြားရေးဌာန KNIC ကလည်း ယနေ့ နေ့လည်ပိုင်း၌ ဒီးမော့ဆိုမြို့နယ် ၆မိုင် အနီးတ၀ိုက်၌ အကြမ်းဖက်စစ်ကောင်စီ နှင့် ကရင်နီပူးပေါင်းတပ်ဖွဲ့များ တိုက်ပွဲဖြစ်ပွားခဲ့သည်ဟု ဖော်ပြသည်။ တိုက်ပွဲ၌ KPDF ဘက်မှ ၁ဦး ကျဆုံးကာ ၄ဦး ဒဏ်ရာရပြီး ရွာသားတစ်ဦးလည်း လက်နက်ကြီ ကျည်စ ထိမှန်ဒဏ်ရာရခဲ့သည်ဟု ဆိုသည်။