ဒီးမော့ဆိုမြို့နယ်အတွင်း စက်တင်ဘာ ၂၅ရက်နှင့် ၂၆ရက်တွင် တိုက်ပွဲများပြင်းထန်စွာဖြစ်ပွားခဲ့ရာ စစ်ကောင်စီတပ်ဖွဲ့ဝင်များက ဒေသခံများ၏ နေအိမ် ၃၀ကျော်ကို မီးရှို့ဖျက်ဆီးခဲ့ကြောင်း ကရင်နီအမျိုးသားကာကွယ်ရေးတပ်ဖွဲ့(KNDF)က ထုတ်ပြန်သည်။
ဒီးမော့ဆိုမြို့နယ် ကုန်းသာ တိုက်ပွဲများအတွင်းအကြမ်း ဖက်စစ်ကောင်စီတပ်များမှ ပြည်သူ့ အိုးအိမ်များကို ဖောက်ထွင်းဖျက်စီးခဲ့ပြီး နေအိမ်များပေါင်း ၃၀ကျော်ကို မီးရှို့ဖျက်စီးခဲ့သည်ဟု ဖော်ပြသည်။
တိုက်ပွဲအတွင်း အကြမ်းဖက်စစ်ကောင်စီတပ်များ၏ လက်ခဲယမ်းအချို့နှင့်ဆက်သွယ်ရေးပစ္စည်း အချို့ကို သိမ်းဆည်းရမိခဲ့ကြောင်း ထုတ်ပြန်ထားသည်။
ကရင်နီတပ်မတော်(KA)၊ KNDF၊ ပြည်သူ့ကာကွယ်ရေးတပ်မတော်(PDF) ပူးပေါင်းအဖွဲ့တို့သည် ဒီးမော့ဆိုမြို့နယ်အတွင်း စစ်ရေးလှုပ်ရှားလာသည့် စစ်ကောင်စီတပ်ကို ခုခံတိုက်ခိုက်ခဲ့ခြင်းဖြစ်သည်။
နှစ်ရက်တာ တိုက်ပွဲအတွင်း စစ်ကောင်စီတပ်မှ သေဆုံးထိခိုက်မှုအများအပြားရှိသကဲ့သို့ ကရင်နီလက်နက်ကိုင်ပူးပေါင်းအဖွဲ့မှ ရဲဘော်အချို့ကျဆုံး ဒဏ်ရာရမှုရှိခဲ့သည်။