မကွေးတိုင်းဒေသကြီး ရေစကြိုမြို့နယ် လှေခုတ်ရွာတွင် ယမန်နေ့ညက စစ်ကောင်စီသတင်းပေးအမျိုးသားတစ်ဦးကို အဖွဲ့တစ်ခုမှ လာရောက်ပစ်ခတ်ပြီး ဖမ်းဆီးခေါ်ဆောင်သွားကြောင်း ဒေသခံများက ပြောသည်။
ယမန်နေ့ (စက်တင်ဘာလ ၂၈ ရက်)ညပိုင်းက ရေစကြိုမြို့နယ် လှေခုတ်ရွာရှိ စစ်ကောင်စီကို သတင်းပေးနေသူဟု ကျော်ဇောနေသည့် အမျိုးသားတစ်ဦး၏ နေအိမ်ကို အဖွဲ့တစ်ခုမှလာရောက်ပစ်ခတ်၍ ဖမ်းဆီးခေါ်ဆောင် သွားပြီး ၎င်း၏သားဖြစ်သူမှာ ပုခုံးကျည်မှန်ဒဏ်ရာရသွားခဲ့ကြောင်း ဒေသခံများက ပြောသည်။
ယနေ့နံနက်ပိုင်းတွင် စစ်ကောင်စီတပ်များသည် လှေခုတ်ရွာသို့ ရောက်ရှိလာသည့်အတွက် ပြည်သူများ ကြိုတင်ထွက်ပြေးတိမ်းရှောင်နေရကြောင်း ဒေသခံများက ပြောသည်။
“ရွာကလူတွေကို ဖမ်းတာတွေတော့မတွေ့ဘူး။ လှေခုတ်ရွာလူကြီးမိသားစုကိုတော့ စစ်ကောင်စီက လုံခြုံအောင်လို့ ခေါ်သွားတယ်လို့ကြားတယ်”ဟု ဒေသခံတစ်ဦးက ပြောသည်။
Public Service Announcement
စစ်ကောင်စီသတင်းပေးအား လာရောက်ဖမ်းဆီးသွားသည့်အဖွဲ့မှာ မည်သည့်အဖွဲ့ဖြစ်သည်ကို မသိရသေးကြောင်း ဒေသခံများက ဆက်ပြောသည်။
စစ်ကောင်စီတပ်များသည် လှေခုတ်ရွာအနီးသို့ ရောက်ရှိချိန်တွင် လက်နက်ကြီးဖြင့်ခြောက်လှန့်ပစ်ခတ်ခဲ့ကြောင်းလည်း ဒေသခံများက ပြောသည်။
စက်တင်ဘာ ၂၈ ရက် နံနက်ပိုင်းက ရေစကြိုမြို့နယ် ကမ်းဖြူအုပ်စု ကိုင်းရွာတွင်ရှိသော မိုင်တဲတာဝါတိုင်တစ်တိုင်လည်း မီးရှို့ဖျက်ဆီးခံခဲ့ရသည်။
