မြန်မာစစ်တပ်ရဲ့ ငြိမ်းချမ်းရေးအစီအစဉ် ကတိကဝတ်အကောင်အထည်ဖော်မှုအပေါ် အာဆီယံ ဝန်ကြီးတွေက စိတ်ပျက်နေတယ်လို့ Channel News Asia သတင်းဌာနက ဒီနေ့ဖော်ပြပါတယ်။
ဒီလအတွင်းကျင်းပဖို့ရှိနေတဲ့ အာဆီယံထိပ်သီးအစည်းအဝေးကို မြန်မာ့အာဏာသိမ်းခေါင်း ဆောင်မင်းအောင်လှိုင်တက်ရောက်ရေးအပေါ် စိုးရိမ်မိတယ်လို့လည်း အာဆီယံအဖွဲ့ဝင် နိုင်ငံခြားရေးဝန်ကြီးတစ်ဦးက ပြောတယ်လို့ ဆိုပါတယ်။
“မြန်မာနိုင်ငံမှာ သိသာထင်ရှားတဲ့တိုးတက်မှုမရှိပါဘူး။ စစ်တပ်ဟာ အာဆီယံအထူးကိုယ်စားလှယ် ကြိုးစားနေမှုပေါ်ကိုလည်း အပြုသဘောတုံ့ပြန်ဆောင်ရွက်ချက် မရှိပါဘူး” လို့ အင်ဒိုနီးရှား နိုင်ငံခြားရေးဝန်ကြီး Retno Marsudi က အာဆီယံနိုင်ငံခြားရေးဝန်ကြီးတွေနဲ့ တွေ့ဆုံမှုအပြီး သတင်းစာရှင်းလင်းပွဲမှာ ပြောပါတယ်။
“အဖွဲ့ဝင်နိုင်ငံအများစုက စိတ်ပျက်တယ်လို့ ပြောဆိုကြတယ်။ အချို့နိုင်ငံတွေကတော့ အာဆီယံဟာ ဒီအရေးကိစ္စကို ဆောင်ရွက်နိုင်မှာမဟုတ်ဘူးလို့ ခါတိုင်းလိုပဲ ပြောတယ်”လို့ အင်ဒိုနီးရှားနိုင်ငံခြားရေးဝန်ကြီးက ဆက်ပြောပါတယ်။
Public Service Announcement
အာဆီယံအထူးကိုယ်စားလှယ်ဟာ မြန်မာ့အရေးမှာ သူရင်ဆိုင်နေရတဲ့ စိန်ခေါ်မှုတွေကို အာဆီယံအဖွဲ့ဝင်နိုင်ငံတွေကို တင်ပြတယ်လို့ စင်ကာပူနိုင်ငံခြားရေးဝန်ကြီး Vivian Balakrishnan က ပြောပါတယ်။ စစ်ကောင်စီ(SAC)ကို ပူးပေါင်းဆောင်ရွက်ဖို့ အာဆီယံနိုင်ငံခြားရေးဝန်ကြီးတွေကို အထူးကိုယ်စားလှယ်က တိုက်တွန်းသွားတယ်လို့ Vivian Balakrishnan က ဆက်ပြောပါတယ်။
မလေးရှားနိုင်ငံခြားရေးဝန်ကြီး Saifuddin Abdullah က မြန်မာ့အရေးတိုးတက်မှုမရှိဘူးဆိုရင် အာဆီယံ ထိပ်သီးအစည်းအဝေးမှာ SACဥက္ကဌ တက်ရောက်ဖို့ ခက်ခဲလာနိုင်တယ်လို့ တွစ်တာ မှာရေးသားပါတယ်။
ဒါပေမဲ့ မြန်မာ့စစ်တပ်ခေါင်းဆောင် မင်းအောင်လှိုင်ကို ဒီလနှောင်းပိုင်းမှာ ကျင်းပမယ့် အာဆီယံ ထိပ်သီးအစည်းအဝေးကနေ ဖယ်ထုတ်ဖို့ အဆိုတင်သွင်းလာမလားဆိုတာ ရှင်းရှင်းလင်းလင်းမသိ ရသေးပါဘူး။
