ထီးချိုင့် ပြည်သူ့ကာကွယ်ရေးတပ်ဖွဲ့(HPDF) အနေဖြင့် စစ်ဆင်ရေးများ ပြုလုပ်တော့မည်ဖြစ်၍ ကုန်တင်ယာဉ်နှင့်ခရီးသည်တင်ယာဉ်များ ယနေ့ (အောက်တိုဘာ ၉ရက်)မှစ၍ ၁၅ရက်နေ့အထိ တစ်ပတ်ကြာ သွားလာခြင်း လုံး၀မပြုလုပ်ရန် HPDFက ထုတ်ပြန်သည်။
စစ်ကိုင်းတိုင်း ထီးချိုင့်မြို့နယ်အတွင်း၌ စစ်ရေးတင်းမာလျက်ရှိနေချိန်တွင် အကြမ်းဖက်စစ်ကောင်စီတပ်ဖွဲ့ဝင်များသည် ကုန်တင်ယာဉ်များ၊ ခရီးသည်တင်ယာဉ်များဖြင့် သွာလာလှုပ်ရှားနေခြင်းကြောင့် ယခုကဲ့သို့ ထုတ်ပြန်ခြင်းဖြစ်သည်ဟုဆိုသည်။
“အရပ်သားကားတွေကို အသွင်ယူပြီး သွားနေကြလို့ အဲဒါကြောင့်။ လတ်တလော စစ်ရေးအခြေအနေက အလယ်တောဘက်မှာ ဝင်ကြမ်းနေတယ်။ ဧရာ၀တီမြစ်အရှေ့ဘက် သစ်ဆုံးအင်း တောဘက်ကိုလည်း နင်းနေတယ်”ဟု ထီးချိုင့်ဒေသခံတစ်ဦးက စစ်ကောင်စီတပ်၏ ဒေသတွင်း စစ်ရေးလှုပ်ရှားမှု အခြေအနေကို ပြောပြသည်။
ထုတ်ပြန်ချက်အတိုင်း လိုက်နာမှုမရှိ၍ ဖြစ်ပေါ်လာသော အကျိုးဆက်များကို လုံး၀ တာဝန်ယူမည်မဟုတ်ကြောင်းလည်း HPDFက ထုတ်ပြန်သည်။