ကချင်ပြည်နယ် မိုးမောက်မြို့နယ်တွင် အကြမ်းဖက်စစ်ကောင်စီတပ်နှင့် ကချင်အမျိုးသားလွတ်မြောက်ရေးတပ်မတော် (KIA) တို့ ယနေ့(အောက်တိုဘာ ၁၂)ညနေတွင် တိုက်ပွဲအပြင်းအထန် ဖြစ်နေကြောင်း ဒေသခံများကပြောသည်။
မိုးမောက်မြို့အဝင် ကျောက်စခန်းအနီးတွင် တိုက်ပွဲဖြစ်ပွားနေပြီး လက်နက်ကြီး လက်နက်ငယ်သံများ ဆူညံစွာကြားနေရကြောင်းဟု ဒေသခံအမျိုးသမီးတစ်ဦးက ပြောသည်။
“KIAနဲ့ ချနေကြတာ။ တော်တော်လေး ပြင်းထန်တယ်။ ပေါက်ကွဲသံကြီး ထွက်လာပြီး သေနတ်သံတွေ ဆက်တိုက်ကြားတယ်”ဟု ဒေသခံတစ်ဦးက ပြောသည်။
စစ်ကောင်စီတပ်စခန်းချထားသောမိုးမောက်မြို့နယ်ရှိ အလော့ဘွမ်းစခန်းကို KIA ကမေလဆန်းတွင်တိုက်ခိုက်သိမ်းပိုက်ခဲ့သည်။ ထိုစခန်းကို ပြန်လည်ရရှိရန် စစ်ကောင်စီက လေကြောင်းမှပါအကြိမ်ကြိမ်တိုက်ခိုက်သော်လည်း KIA ကအောင်မြင်စွာခုခံကာကွယ်နိုင်ခဲ့သည်။
Public Service Announcement
စစ်ကောင်စီက နိုင်ငံ့အာဏာလုယူပြီးနောက်ပိုင်း မိုးမောက်မြို့တွင် ပြည်သူ့ကာကွယ်ရေးတပ်(PDF)လည်း ပေါ်ပေါက်လာပြီး စစ်ကောင်စီအား တိုက်ခိုက်မှုအချို့တွင် KIAနှင့် PDF ပူးပေါင်းခဲ့ကြသည်။ Non CDM ဝန်ထမ်းအချို့ကို
PDFက သတိပေးခဲ့သလို မြို့နယ်အုပ်ချုပ်ရေးမှုးကိုလည်း သေနတ်ဖြင့်ပစ်ခတ်လုပ်ကြံခဲ့ဖူးသည်။မြို့နယ်အုပ်ချုပ်ရေးမှုးသည် သေနတ်ဒဏ်ရာသာရခဲ့ပြီး သေဆုံးခြင်းမရှိခဲ့ပေ။စစ်တပ်ထောက်ခံသည့် ဌာနဆိုင်ရာအရာရှိတစ်ဦး၏ ဝန်ထမ်းအိမ်ယာလည်း ဖောက်ခွဲခံရဖူးသည်။
