ကလေးမြို့မှ စစ်တပ်မိသားစုများကိုလေယာဥ်ဖြင့် ရွှေ့ပြောင်းခြင်းမှာ စစ်သားများထွက်မပြေးရန်နှင့် စစ်ပွဲကြီးဖြစ်လာလျှင်သူ့လူမနာရန်ဖြစ်ဟု ဒေသခံများသုံးသပ်

အကြမ်းဖက်စစ်ကောင်စီက ကလေးတပ်နယ်မှ တပ်မိသားစုများကို စစ်တပ်လေယာဥ်ဖြင့် အရေးပေါ်ပြောင်းရွှေ့ခဲ့ကြောင်း ကလေးဒေသခံများကပြောသည်။

ထိုသို့ပြောင်းရွှေ့ခြင်းမှာ စစ်သားများ ထွက်မပြေးစေရန် တပ်မိသားစုများကို ခေါ်ထားခြင်းဖြစ်သည်ဟု ဒေသခံများကဆိုသည်။

“သဘောကစစ်မြေပြင်လိုပြာကျတဲ့ထိတိုက်လို့ပစ်လို့ရအောင်ကိုယ်လူကိုယ်အရင်ဖယ်ထုတ်သွားတာပါ။ အဆုံးစွန်ယုတ်မာဖို့ပါ”ဟု ဒေသခံတစ်ဦးပြောသည်။

အကြမ်းဖက်စစ်ကောင်စီက စစ်ကိုင်းတိုင်း၊မကွေးတိုင်း နှင့်ချင်းပြည်နယ်တို့တွင် စစ်အင်းအားဖြည့်တင်းနေပြီး မကြာခင်စစ်ပွဲကြီးတစ်ခု ဆင်နွှဲရန် စီစဉ်နေခြင်းဖြစ်သည်ဟု ဒေသခံများကပြောသည်။

Public Service Announcement

“တပ်တွေ ထွက်ပြေးမရအောင် မိသားစုတွေကို ဓားစာခံလုပ်ထားတာ”ဟု ကလေးမြို့ခံတစ်ဦးကသုံးသပ်သည်။

ထိုသို့ခေါ်ဆောင်ရာတွင် အကြမ်းဖက်စစ်တပ်ပိုင်လေယာဉ်ဖြင့် အောက်တိုဘာ ၁၀ ရက်နေ့ည ၇ နာရီတွင်တစ်ကြိမ် နှင့် အောက်တိုဘာ ၁၁ ရက်မနက်ပိုင်းတွင် တစ်ကြိမ်စုစုပေါင်း နှစ်ကြိမ်ခေါ်ယူခဲ့ခြင်းဖြစ်သည်။

ကလေးမြို့ကိုအခြေစိုက်ပြီး အကြမ်းဖက်စစ်တပ်က ချင်းပြည်နယ်ကို စစ်အင်အားဖြည့်တင်းနေခြင်းဖြစ်သည်။ အောက်တိုဘာ ၁၁ ရက်တွင် ကလေးမြို့မှ ချင်းပြည်နယ်ကို စစ်ကား ၂၁ စီးနှင့် လက်နက်ကြီးတပ်ဆင်ထားသည့် ကားတစ်စီး ထွက်ခွာသွားခဲ့သည်။