စစ်ကိုင်းတိုင်း၊ ရွှေဘိုနှင့် ကန့်ဘလူမြို့နယ်များတွင်အကြမ်းဖက်စစ်ကောင်စီတပ်သားများမောင်းနှင်လာသော ဆိုင်ကယ်များနှင့် သံသယဖြစ်ဖွယ်ယာဥ်အချို့အား နယ်ခံPDF များက မိုင်းဆွဲ ခုခံတိုက်ခိုက်ခဲ့ရာ ထိခိုက်သေဆုံးနိုင်ကြောင်း သက်ဆိုင်ရာ PDFအဖွဲ့များကထုတ်ပြန်သည်။
ယနေ့ (အောက်တိုဘာ ၁၇ရက်) နံနက် ၈ နာရီအချိန် ကန့်ဘလူမြို့နယ်၊ အင်းလယ်ကြီး ကျေးရွာသို့ ဆိုင်ကယ်လေးစီးဖြင့် လာရောက်ခဲ့သည့် ပျူစောထီးလမ်းပြ အပါအဝင် ရဲသား ၈ ယောက်တို့အား ကန့်ဘလူPDF ပူးပေါင်းတပ်စု မှ မိုင်း ၂ လုံးဆွဲကာ တိုက်ခိုက်မှုပြုလုပ်ခဲ့ရာ ရဲတပ်သားများအထိနာကာ ဒဏ်ရာအပြင်းအထန်ရရှိခဲ့ပြီး ဆေးရုံကားဖြင့်လာရောက်သယ်ဆောင်သွားခဲ့ကြောင်း ကန့်ဘလူပြည်သူ့ကာကွယ်ရေးတပ်ဖွဲ့(ကန့်ဘလူ PDF) အဖွဲ့က သတင်းထုတ်ပြန်သည်။
ကန့်ဘလူပြည်သူ့ကာကွယ်ရေးတပ်သားများ ဘေးအန္တရာယ်ကင်းရှင်းစွာ စခန်းသို့ပြန်လည်ရောက်ရှိခဲ့သည်ဟု ကန့်ဘလူ PDFက ပြောသည်။
အလားတူ ယနေ့ မွန်းလွဲ ၂ နာရီကျော်တွင် ရွှေဘို မှ မုံရွာ ဘက်သို့မောင်းလာသော အန်စာတုံး နှစ်စီးမှန်မချဘဲမောင်းနှင်လာသောကြောင့် နယ်ခံ လှော်တက်အင်အားစု၁၂၆ အဖွဲ့မှ မိုင်းခွဲခြောက်လန့်ခဲ့ရာ ကားမှန်များကွဲပြီး ကားပေါ်ပါသူများ ဒဏ်ရာရကာ သေကြေပျက်စီးမှုရှိနိုင်ကြောင်း၊ နောက်ထပ်နှစ်စီးထပ်မောင်းလာရာ ၂နာရီ ၅၀ မိနစ်အချိန်တွင် နောက်တစ်ကြိမ်မိုင်း ခွဲတိုက်ခိုက်ခဲ့ကြောင်း လှော်တက်အင်အားစု၁၂၆ အဖွဲ့မှ အသိပေးသည်။
အဆိုပါကားပေါ်တွင် မည်သည့် အဖွဲ့အစည်းများလိုက်ပါလာသည်ကို နယ်ခံPDFအဖွဲ့က ထုတ်ပြန်ခြင်းမရှိသေးပါ။