မြန်မာနိုင်ငံရဲ့ လူ့အခွင့်အရေးဆိုင်ရာအကျပ်အတည်းပိုမိုဆိုးရွားနေချိန်မှာ အာဆီယံအနေနဲ့ အဖွဲ့ဝင်နိုင်ငံတွေရဲ့ ပြည်တွင်းရေးကို ကြားဝင်မစွက်ဖက်ရဘူးဆိုတဲ့ ဆယ်စုနှစ်များစွာရှည်ကြာခဲ့တဲ့ မူဝါဒကိုပြန်လည်စဉ်းစားသင့်တယ်လို့ မလေးရှားနိုင်ငံခြားရေးဝန်ကြီးက ဒီနေ့(အောက်တိုဘာ၂၁)မှာ ပြောပါတယ်။
ဧပြီတုန်းက သဘောတူဆုံးဖြတ်ခဲ့တဲ့ မြန်မာ့အရေးငြိမ်းချမ်းစွာ ဖြေရှင်းရေးအစီအစဉ် တိုးတက်မှုကင်းမဲ့တာကြောင့် လာမယ့်အာဆီယံထိပ်သီးညီလာခံမှာ မြန်မာစစ်ကောင်စီခေါင်းဆောင်ကို တက်ရောက်ခွင့်မပေးဖို့ သမာရိုးကျမဟုတ်တဲ့လုပ်ဆောင်မှုတစ်ရပ်ကို အာဆီယံက ပြီးခဲ့တဲ့ သောကြာနေ့က ဆုံးဖြတ်ခဲ့ပါတယ်။
စစ်ကောင်စီခေါင်းဆောင် မင်းအောင်လှိုင်အစား မြန်မာ နိုင်ငံက နိုင်ငံရေးနဲ့မပတ်သက်သူကိုယ်စားလှယ်ကိုဖိတ်ကြားတက်ရောက်စေမှာ ဖြစ်ပါတယ်။
မလေးရှား၊ အင်ဒိုနီးရှား၊ စင်ကာပူနဲ့ ဖိလစ်ပိုင်တို့ တွန်းအားပေးခဲ့တဲ့ အဲဒီဆုံးဖြတ်ချက်ဟာ အာဆီယံအတွက် ရှားပါးပြောင်မြောက်တဲ့ခြေလှမ်းဖြစ်ပြီး အာဆီယံဟာ အစဉ်အလာအားဖြင့် အဖွဲ့ဝင်နိုင်ငံတွေရဲ့ ဝေဖန်မှုကို ဘုံဆုံးဖြတ်ချက်၊ ညှိနှိုင်းဆောင်ရွက်မှုနဲ့သာ လုပ်ဆောင်လေ့ရှိတာပါ။
Public Service Announcement
မြန်မာ့အရေးဟာ ပြည်တွင်းရေးဖြစ်ပေမယ့် ဒေသတွင်းအပေါ် သက်ရောက်မှုရှိလာမှာဖြစ်ပြီး အခြားအဖွဲ့ဝင်နိုင်ငံတွေရဲ့ စိုးရိမ်မှုကို အသိအမှတ်ပြုရမယ်လို့ မလေးရှားနိုင်ငံခြားရေးဝန်ကြီးက အဖွဲ့ဝင်နိုင်ငံတွေကို ဆွေးနွေးခဲ့ပါတယ်။
ဒီအရေးကိစ္စတွေကို ဖြေရှင်းရေး ရှောင်ရှားဖို့အတွက် ကြားဝင်မစွက်ဖက်ရေးမူဝါဒကို ဒိုင်တစ်ခု သဖွယ်အသုံးမပြုသင့်ဘူးဆိုတာကိုထည့်သွင်းပြောကြားခဲ့တယ်လို့ မလေးရှားနိုင်ငံခြားရေးဝန်ကြီး Mr. Saifuddinက ပြောပါတယ်။
