စစ်အာဏာရှင်ချုပ်ငြိမ်းရေးအတွက် လှုပ်ရှားနေသည့် မည်သည့်အဖွဲ့အစည်းနှင့်မဆို ပူးပေါင်းသွားမည်ဖြစ်ကြောင်း ကချင်လွတ်မြောက်ရေးတပ်မတော်(KIO) ဥက္ကဋ္ဌ ဗိုလ်ချုပ်ကြီးအင်ဘန်လက ပြောကြားသည်။
အောက်တိုဘာ ၂၅ရက်တွင် ကျရောက်သည့် KIO ဖွဲ့စည်းတည်ထောင်ခြင်း (၆၁)နှစ်ပြည့် အထိမ်းအမှတ် ဗိုလ်ချုပ်ကြီးအင်ဘန်လ ပြောကြားသည့် မိန့်ခွန်းကို ကချင်ဘာသာဖြင့် ထုတ်ပြန်ခဲ့သည်။
အဆိုပါ မိန့်ခွန်း၌ KIO ဝန်ထမ်းများ၊ ပြည်သူလူထုများကိုအားပေးသည့် စကားများကို အဓိက ထားပြောကြားခဲ့ကြောင်း KIO/KIA သတင်းနှင့်ပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ပြောသည်။
“ စစ်အာဏာရှင်ချုပ်ငြိမ်းရေးအတွက် လှုပ်ရှားနေတဲ့ ဘယ်အဖွဲ့အစည်းနဲ့မဆို ပူးပေါင်းသွားမယ်ဆိုတဲ့အချက် ပါပါတယ်ဗျ” ဟု ဗိုလ်မှူးကြီးနော်ဘူက ဗိုလ်ချုပ်ကြီးအင်ဘန်လ မိန့်ခွင်း၌ ပါရှိသည့် ပြောကြားချက်ကို ပြောပြသည်။
Public Service Announcement
KIO ကို ၁၉၆၀ အောက်တိုဘာ ၂၅ရက်တွင် ဖွဲ့စည်းခဲ့ပြီး လက်နက်ကိုင်တော်လှန်ရေးကို ၁၉၆၁ ခုနှစ် ဖေဖော်ဝါရီ ၌ စတင်ခဲ့သည်ဟုဆိုသည်။ KIO၏ လက်အောက်တွင် လက်နက်ကိုင်တပ်အဖြစ် ကချင်လွတ်မြောက်ရေးတပ်မတော်(KIA)ကို ဖွဲ့စည်းထားသကဲ့သို့ အုပ်ချုပ်ရေးအတွက် ကချင်လွတ်လပ်ရေးကောင်စီ(KIC)ကို ဖွဲ့စည်းထားသည်။
စစ်တပ်အာဏာသိမ်းပြီးနောက်ပိုင်း မတ်လမှစ၍ KIO/KIA အနေဖြင့် အာဏာသိမ်းစစ်ကောင်စီတပ်များကို ခုခံတိုက်ခိုက်မှုများ စဉ်ဆက်မပြတ်လုပ်ဆောင်နေသကဲ့သို့ ဒေသအချို့တွင် ဒေသခံ ပြည်သူ့ကာကွယ်ရေးတပ်ဖွဲ့ (PDF)များနှင့် လက်တွဲပြီး စစ်ကောင်စီကို ခုခံတိုက်ခိုက်ခြင်းများလည်းရှိသည်။
