ရှမ်းပြည်နယ်မြောက်ပိုင်း ပန်ဆိုင်းမြို့တွင် အကြမ်းဖက်စစ်ကောင်စီနှင့် တိုင်းရင်းသားလက်နက်ကိုင်အဖွဲ့ တို့ ယနေ့ည တိုက်ပွဲအပြင်းအထန်ဖြစ်နေပြီး အကြမ်းဖက်စစ်ကောင်စီက လူနေရပ်ကွက်များဖက်သို့ လက်နက်ကြီးဖြင့် ပစ်ခတ်နေသည်ဟု ဒေသခံများက ပြောသည်။
ပန်ဆိုင်းမြို့ ရပ်ကွက်(၅)ရှိ လူနေအိမ်များအနီးသို့ လက်နက်ကြီးများ ကျရောက်ပေါက်ကွဲနေ၍ ဒေသခံများသည် ပုန်းခိုကျင်းအတွင်း ဝင်ရောက်ပုန်းအောင်းနေရသည်ဟုဒေသခံများကပြောသည်။
“လက်နက်ကြီးတွေက စစ်တပ်က ပစ်နေတာ။ ပြေးလို့လည်း ညဘက်ကြီးမို့ မရဘူး။ ကျင်းတွေထဲ ဝင်နေရတယ်”ဟု ယနေ့(အောက်တိုဘာ ၂၅)ည ၁၀နာရီ ၃၀မိနစ်ဝန်းကျင် အခြေအနေကို ဒေသခံတစ်ဦးကပြောသည်။
ပန်ဆိုင်းမြို့တွင် ကချင်လွတ်မြောက်ရေးတပ်မတော်(KIO/KIA)နှင့် တအာင်းတိုင်းရင်းသားလက်နက်ကိုင်အဖွဲ့ (TNLA)အပြင် ကိုးကန့်တိုင်းရင်းသားလက်နက်ကိုင်အဖွဲ့ MNDAAလည်း ရှိနေသည်။ အကြမ်းဖက်စစ်ကောင်စီနှင့် တိုက်ပွဲဖြစ်နေသည့်အဖွဲ့ကို လက်တလောအတည်မပြုနိုင်သေးပေ။ဒေသခံများကမူ KIAနှင့်တိုက်ခိုက်နေခြင်းဖြစ်ကြောင်း ပြောသည်။
Public Service Announcement
ကချင်လွတ်မြောက်ရေးတပ်မတော်(KIO/KIAသည် ပြည်သူနှင့်အတူရပ်တည်လျက် ပြည်သူ့တပ်ဦးရှေ့မှ အာဏာ သိမ်းစစ်ကောင်စီကို ခုခံတွန်းလှန်ခြင်းတွင် ပါဝင်ဦးဆောင်လျက်ရှိသည်ကို တိုင်းရင်းသားပြည်သူများကိုယ်စား များစွာကျေးဇူးတင် ဂုဏ်ယူလျက်ရှိကြောင်း အမျိုးသားညီညွတ်ရေးအစိုးရ(NUG)က သဝဏ်လွှာပေးပို့ထားသည်။
KIOဥက္ကဋ္ဌ ဗိုလ်ချုပ်ကြီ အင်ဘန်လကလည်း စစ်အာဏာရှင်စနစ်ချုပ်ငြိမ်းရေး ဆောင်ရွက်နေသည့် မည်သည့်အဖွဲ့နှင့်မဆို ပူးပေါင်းဆောင်ရွက်သွားမည်ဖြစ်ကြောင်း KIO ဖွဲ့စည်းတည်ထောင်ခြင်း အထိမ်းအမှတ်နေ့ဖြစ်သည့် ယနေ့(အောက်တိုဘာ ၂၅ရက်)ပြောကြားသည့် မိန့်ခွန်း၌ ထည့်သွင်းပြောကြားခဲ့သည်။
