စစ်ကောင်စီခေါင်းဆောင် တက်ခွင့်မရတဲ့ အာဆီယံထိပ်သီးအစည်းအဝေးကို ဒီနေ့မနက်ပိုင်းကစတင်ကျင်းပနေပါပြီ။
ထိပ်သီးအစည်းအဝေးကို ဒီနေ့ အောက်တိုဘာ ၂၆ ရက်ကစတင်ကာ ၃ ရက်ကြာကျင်းပမှာဖြစ်ပြီး ကိုဗစ်ကြောင့်အွန်လိုင်းကနေပြုလုပ်တာဖြစ်ပါတယ်။
စစ်ခေါင်းဆောင်ဟာ အာဆီယံ ဘုံသဘောတူညီချက် ၅ချက်ကို အကောင်အထည်မဖော်တဲ့အတွက် အစည်းအဝေးတက်ရောက်ခွင့်မရတာဖြစ်ပါတယ်။
စစ်ကောင်စီဘက်ကတော့ အစည်းဝေးဖိတ်ကြားမှုဟာ အာဆီယံရဲ့လုပ်ထုံးလုပ်နည်း အစဉ်လာနဲ့သွေဖယ်နေတာကြောင့် ထိပ်သီးဆွေးနွေးပွဲကို နိုင်ငံအကြီးအကဲ ဒါမှမဟုတ် ကိုယ်စားပြုပုဂ္ဂိုလ်တက်ခွင့်ရမှသာ လက်ခံမယ်လို့ ကြေညာချက်ထုတ် တုံ့ပြန်ထားပါတယ်။