ထိပ်သီးအစည်းအဝေးကို မတက်ရောက်တာဟာ အာဆီယံကို သပိတ်မှောက်တာမဟုတ်ကြောင်း စစ်ကောင်စီ ရဲ့နိုင်ငံခြားရေးဝန်ကြီးဌာနက ဒီနေ့ညပိုင်းမှာ ထုတ်ပြန်ပါတယ်။
ဒါအပြင် စစ်ကောင်စီခေါင်းဆောင်ကိုတက်ခွင့်မပေးလို့ မကျေနပ်တာလည်းမဟုတ်ဘူးလို့ ဆိုပါတယ်။
အစည်းအဝေးကိုမတက်တာဟာ အာဆီယံပဋိဉာဉ် မူတွေအရ အဖွဲ့ဝင်နိုင်ငံတစ်နိုင်ငံရဲ့ ရသင့်တဲ့အခွင့်အရေးကို တောင်းဆိုတာဖြစ်တယ်လို့ စစ်ကောင်စီက ပြောထားပါတယ်။
ဒီနေ့မှာ စတင်ကျင်းပတဲ့အာဆီယံ ထိပ်သီးအစည်းအဝေးကို စစ်ကောင်စီ ခေါင်းဆောင်ကိုတက်ခွင့်မပြုပေမယ့် စစ်ကောင်စီနိုင်ငံခြားရေး ဌာနက ရာထူးအကြီးပိုင်းတစ်ဦးကိုတက်ခွင့်ပြုခဲ့ပါတယ်။
Public Service Announcement
ဒါပေမယ့် စစ်ကောင်စီဟာ အဲဒီသူကို အစည်းအဝေးစေလွှတ်တာမတွေ့ရပါဘူး။
စစ်ကောင်စီနဲ့အာဆီယံ ကြားတင်းမာမှုတွေဖြစ်နေချိန်မှာ NUG က အာဆီယံနဲ့ ဆက်ဆံရေးတိုးမြှင့်ဖို့ အာဆီယံဆိုင်ရာ သံအမတ်ကြီး တစ်ဦးကိုခန့်အပ်တာဝန်ပေးလိုက်ပါတယ်။
စစ်ကောင်စီကတော့ သူ့တို့ကိုယ်တိုင်သဘောတူထားတဲ့ အာဆီယံ ဘုံသဘောတူညီချက် ၅ ချက်ကို အကောင်အထည်မဖော်တဲ့အတွက် ထိပ်သီးအစည်းအဝေးကိုတက်ရောက်ခွင့်မရခဲ့တာပါ။
