ကုလသမဂ္ဂအတွင်းရေးမှူးချုပ်ရဲ့မြန်မာနိုင်ငံဆိုင်ရာအထူးကိုယ်စားလှယ် ဒေါက်တာနိုလန်းဟေး ဇာဟာ မြန်မာနိုင်ငံအခြေအနေရဲ့ ငြိမ်းချမ်းတဲ့အဖြေရှာမှုမှာ အကောင်းဆုံးကူညီနိုင်လိမ့်မယ်လို့ မျှော်လင့်ကြောင်း စင်ကာပူနိုင်ငံခြားရေးဝန်ကြီးက ပြောပါတယ်။
စင်ကာပူနိုင်ငံခြားရေးဝန်ကြီး ဗီဗီယန်ဘလာခရစ်ရှ်နန်ဟာ ဒေါက်တာနိုလန်းဟေးဇာကို တွေ့ဆုံခဲ့ပြီး အထူးကိုယ်စားလှယ်အဖြစ်ခန့်အပ်ခံမှုကို ဂုဏ်ပြုဝမ်းမြောက်ကြောင်း ပြောကြားခဲ့တယ်လို့ ဒီနေ့(အောက်တိုဘာ၂၈) စင်ကာပူနိုင်ငံခြားရေးဝန်ကြီးရဲ့ဖေ့စ်ဘွတ်ခ်စာမျက်နှာကနေ ထုတ်ပြန်ပါတယ်။
စင်ကာပူနိုင်ငံသူ ဒေါက်တာနိုလန်းဟေးဇာဟာ ကုလ သမဂ္ဂမှာ ကာလရှည်၊ ထူးချွန်ပြောင်မြောက်တဲ့အလုပ်လုပ်ခဲ့သူဖြစ်တယ်လို့ နိုင်ငံခြားရေးဝန်ကြီး ဗီဗီယန်ဘလာခရစ်ရှ်နန်က ချီးကျူးပါတယ်။
အမျိုးသားညီညွတ်ရေးအစိုးရ(NUG) က ကုလသမဂ္ဂအထွေထွေအတွင်းရေးမှူးချုပ်ရဲ့ အထူးကိုယ်စားလှယ်အဖြစ် ဒေါက်တာနိုလန်းဟေးဇာကိုခန့်အပ်တာနဲ့ပတ်သက်လို့ ကြိုဆိုတယ်လို့ မနေ့(အောက်တိုဘာ၂၇)က သဝဏ်လွှာပေးပို့ထားပါတယ်။