အာဏာသိမ်းစစ်ကောင်စီက အောက်တိုဘာလအတွင်း ချင်းပြည်နယ်ရှိ မြို့နယ် ၅ ခုမှ အိမ်ခြေ ၃၀၀ကျော်မီးရှို့ဖျက်ဆီးခဲ့ကြောင်း ချင်းပြည်နယ်ကာကွယ်ရေးပူးတွဲကော်မတီ(Chinland Joint Defense Committee (CJDC)က ယနေ့(အောက်တိုဘာ ၃၁ ရက်)တွင်ထုတ်ပြန်သည်။
ထိုလုပ်ရပ်များတွင် အကြမ်းဖက်စစ်ကောင်စီသည် ဂျနီဗာ ကွန်ဗန်းရှင်းသဘောတူညီချက်ကို လိုက်နာမူမရှိဘဲ စစ်ရာဇဝတ်ကျူးလွန်ခြင်းဖြစ်၍ CJDCသည် အကြမ်းဖက်စစ်ကောင်စီကို အမြစ်ပြတ်တိုက်ခိုက်ချေမှုန်းသွားမည်ဖြစ်ကြောင်းထုတ်ပြန်ချက်တွင်ပါဝင်သည်။
အဆိုပါထုတ်ပြန်ချက်ကို ချင်းပြည်နယ်အတွင်းရှိ ဒေသခံကာကွယ်ရေးတပ်ဖွဲ့ ၁၆ ဖွဲ့နှင့် ချင်းအမျိုးသားတပ်ဦးတို့က ပူးတွဲထုတ်ပြန်ခြင်းဖြစ်သည်။
အကြမ်းဖက်စစ်ကောင်စီတပ်သည် မြန်မာနိုင်ငံတဝန်းလုံးရှိ ပြည်သူများ၏ အသက်အိုးအိမ်များ ဖျက်ဆီးခြင်း၊ အပြစ်မဲ့ပြည်သူများအား သတ်ဖြတ်ခြင်း၊ ရွာလုံးကျွတ်မီးရှို့ဖျက်ဆီးခြင်းစသော အကြမ်းဖက်မှုမျိုးစုံ ကျူးလွန်နေသည်ဟုလည်း ထုတ်ပြန်ချက်တွင်ပါရှိသည်။
ချင်းပြည်နယ်တွင် အကြမ်းဖက်စစ်ကောင်စီတပ်သားများက အောက်တိုဘာ ၁၂ ရက်မှ ၂၆ ရက်အတွင်း ဖလမ်းနှင့် ဟားခါးမြို့နယ်များတွင်ရှိသော ဟားခါး-ဖလမ်းလမ်းမကြီးဘေးမှ ကျေးရွာ ၃ မှ နေအိမ် ၃၆ လုံးကို မီးရှို့ဖျက်ဆီးခဲ့သည်။အလားတူအောက်တိုဘာ ၁၉ ရက်မှ ၂၃ ရက်အတွင်း မင်းတပ်-မတူပီလမ်းကြီးဘေးရှိ လူနေအိမ် ၁၀၇လုံး မီးရှို့ဖျက်ဆီးပြီး အဖိုးတန်ပစ္စည်းများကို လုယူခဲ့သည်။ ထိုပြင် အကြမ်းဖက်စစ်ကောင်စီတပ်သားများသည် ထန်တလန်မြို့ရှိ ခရစ်ယာန်ဘုရားကျောင်းနှစ်လုံးနှင့် လူနေအိမ် ၁၆၄ လုံးကို အောက်တိုဘာ ၂၉ ရက်တွင် မီးရှို့ဖျက်ဆီးခဲ့သည်ဟုထုတ်ပြန်ချက်တွင်ဖော်ပြထားသည်။
စက်တင်ဘာလ၁၈ ရက်ကလည်း စစ်ကောင်စီတပ်သည် ထန်တလန်မြို့ရှိနေအိမ် ၁၉ လုံးကို လက်နက်ကြီးဖြင့်ပစ်ခတ်မီးရှိုခဲ့သလို ၊ခရစ်ယာန်သင်းအုပ်ဆရာ ပါစတာကျုံးဗျက် ကိုသေနတ်ဖြင့်ပစ်သတ်ခဲ့သည်။ထို့အပြင်စစ်ကောင်စီတပ်သားများက ကျဆုံးသွားသောပါစတာကျုံးဗျက်၏လက်ချောင်းအားဖျက်၍ လက်စွပ်ချွတ်ယူပြီး နာရီကိုလည်းယူခဲ့သေးသည်။
Public Service Announcement
ထိုအတူမင်းတပ်မြို့ပြည်သူအုပ်ချုပ်ရေးအဖွဲ့က အကြမ်းဖက်စစ်ကောင်စီသည် ထန်တလန်မြို့ကို မီးရှို့ပြီ လူထု၏ အဖိုးတန်ပစ္စည်းများလုယက်ခြင်းကို ဝမ်းနည်းကြေကွဲကြောင်းနှင့် အကြမ်းဖက်စစ်ကောင်စီကို အမြစ်ပြုတ်သည့် အထိ တိုက်ခိုက်ချေမှုန်းသွားမည်ဟု ယနေ့(အောက်တိုဘာ ၃၁ ရက်)မှာပင်ထုတ်ပြန်သည်။
အာဏာသိမ်းစစ်ကောင်စီ၏ ပြောခွင့်ရပုဂ္ဂိုလ်ဗိုလ်ချုပ်ဇော်မင်းထွန်းကအောက်တိုဘာ ၂၉ ရက်ထန်တလန် မြို့တွင်လောင်ကျွမ်းသောမီးမှာ PDF များကရှို့ သောမီးဟု လွှဲချခဲ့သေးသည်။
ဒေသခံအားလုံးကမူ အကြမ်းဖက်စစ်ကောင်စီတပ်သားများက မီးရှိုခဲ့ခြင်းဖြစ်ကြောင်းတညီတစ်ညွတ်တည်းပြောကြသည်။ လူ့ငယ်ခေတ်(Lu Nge Khit) အမည်ရှိသတင်းဌာနက စစ်ကောင်စီတပ်သားများ မီးရှို့ခံ့သောရုပ်သံဖိုင်ကို အောက်တိုဘာ ၃၀ ရက်တွင်ဖော်ပြထားသည်။
CJDCတွင် CDF-Tonzang, ZFU/PDF-Zoland, CNO/CNDF, CDF-Hakha, CDF-Thantlang, CDF-Matupi, CDF-Mindat, CDF-Kanpetlet, CDF-Paletwa, CDF-KKG, CDF-Dai, CDF-Zotung, MPC/CDF-Mara, CDF-Lautu, CDF-Zophei, CDF-Hualngo နှင့် ချင်းအမျိုးသားတပ်ဉီးတို့ ပူးပေါင်းပါဝင်ခြင်းဖြစ်သည်။
