စစ်ကောင်စီသတင်းပေးအလောင်းလာယူသည့်ဇီးကုန်းစခန်းမှူးကားမိုင်းဆွဲတိုက်ခိုက်ခံရ

စစ်ကိုင်းတိုင်း၊ ကန့်ဘလူမြို့နယ်တွင် သတ်ဖြတ်ခံရသူ စစ်ကောင်စီသတင်းပေး၏ အလောင်းအားလာယူသည့် ဇီးကုန်းစခန်းမှူး၏ကား မိုင်းဆွဲတိုက်ခိုက်ခံခဲ့ရကြောင်း ဒေသခံများက ပြောသည်။

ယမန်နေ့(နို၀င်ဘာလ (၅)ရက်နေ့) နံနက် ၉နာရီ ၅၀မိနစ် အချိန်ခန့်က ကန့်ဘလူမြို့နယ် သရက္ကံကြီးကျေးရွာအုပ်စု ကြာဖက်ကန်ကျေးရွာနေ အာဏာသိမ်းစစ်ကောင်စီသတင်းပေး ဒလန်ဟုဆိုသော မျိုးကျော် အား KBU-UG နှင့် မဟာမိတ် ပူးပေါင်းအဖွဲ့မှသွားရောက် ရှင်းလင်းခဲ့ကြောင်း ၎င်းတို့ကသတင်းထုတ်ပြန်သည်။

“အသတ်ခံရတဲ့ ဒလန်က ကန့်ဘလူမှာတော့နာမည်ကြီးတယ်။”ဟု ဒေသခံတစ်ဦးကလည်း ပြောသည်။

အခင်းဖြစ်ပွားပြီးနောက် ညနေ ၃နာရီ ၄၅ မိနစ်အချိန်တွင် ကြာဖက်ကန်ကျေးရွာရှိ စစ်ကောင်စီသတင်းပေး၏ ရုပ်အလောင်းအား လာယူသည့် အတင်းအဓမ္မချောဆွဲခံရသော လူမှုကူညီရေးအသင်းကားနှင့် ဇီးကုန်းစခန်းမှူး၏ ကားအား ကန့်ဘလူမြို့မှအပြန်ထန်းကုန်း-ဇီးကုန်းမြောင်းဘောင်ပေါ် မင်းကုန်း(က) ကျေးရွာနှင့် သရက်ကောင်းကျေးရွာလမ်းခွဲကြား KBU-UGနှင့် မဟာမိတ်ပူးပေါင်းအဖွဲ့မှ မိုင်းဆွဲတိုက်ခိုက်ခဲ့ခြင်းဖြစ်ကြောင်း KBU-UG၏ ထုတ်ပြန်ချက်တွင်ဖော်ပြထားသည်။

Public Service Announcement

အဆိုပါ မိုင်းခွဲတိုက်ခိုက်မှုကြောင့် ထိခိုက်ကျဆုံးမှုမသိရသေးကြောင်း ၎င်းတို့ကပြောသည်။