ရှမ်းပြည်နယ်မြောက်ပိုင်းရှိ နမ့်ခမ်းမြို့နယ်တွင်း ပြည်သူများ မီတာမဆောင်ကြရန်နှင့်EPCက မီးလာဖြတ်ပါက အကြောင်းကြားရန် နမ့်ခမ်းပြည်သူ့လုံခြုံရေးနှင့်ကာကွယ်ရေးတပ်ဖွဲ့(PSDF)က ထုတ်ပြန်သည်။
နမ့်ခမ်းမြို့နယ်မှ မိဘပြည်သူများအနေဖြင့် မိမိတို့နေအိမ်သို့ မီတာစာရွက်များ၊ ရောက်ရှိလာပါက စစ်ကောင်စီ၏ ညွန်ကြားချက်အတိုင်းမီတာခသွားရောက်ဆောင်ခြင်းများ မပြုလုပ်ကြရန် ယမန်နေ့( နိုဝင်ဘာလ ၁၁ရက်)ကထုတ်ပြန်ထားသည်။ ထို့အပြင် မြို့နယ်လျှပ်စစ်ဌာနနှင့် လျှပ်စစ်ဖြန့်ဖြူးရေး ကုမ္မဏီJunction River Trading Co.Ltdအနေဖြင့်လျှပ်စစ်အား ဖြန့်ဖြူးရာတွင် ပြည်သူ့အကျိုးပြုလုပ်ငန်း များမှလွှဲပြီး စစ်ကောင်စီ၏ ညွှန်ကြားချက်ဖြင့် ပြည်သူတွေအပေါ် ခြိမ်းခြောက်ခြင်း၊ လျှပ်စစ်မီးဖြတ် တောက်ခြင်းများ ပြုလုပ်မှုများရှိပါက အကြောင်းကြားရန် တိုက်တွန်းထားသည်။
နမ့်ခမ်းမြို့နယ်ဒေသအတွင်း မြို့နယ်လျှပ်စစ်ဝန်ထမ်းများနှင့် Junction River Trading Co.L.td. မှ ဝန်ထမ်းများသည် စစ်ကောင်စီ၏ စေခိုင်းညွှန်ကြားချက်ဖြင့် နမ့်ခမ်းမြို့တွင်း လျှပ်စစ်မီတာစာရွက်များ လိုက်လံဝေငှနေခြင်းသည် အမျိုးသားညီညွတ်ရေးအစိုးရ(NUG)မှ Covid-19 ကပ်ဘေးကာလအတွင်း မိဘပြည်သူတွေကို မီတာခကင်းလွတ်ခွင့်ပါ ထုတ်ပြန်ချက်နဲ့ ကိုက်ညီမှုများ မရှိဟုလည်း PSDFက အသိပေးထားသည်။
“ကျမတို့ မီတာမဆောင်ဘူး။ ဒါဟာ တော်လှန်ရေးပဲ။ မီတာမဆောင်လို့ နောက်ဆက်တွဲဖိအားတွေကိုလည်း ပြည်သူဘက်က လက်နက်ကိုင်တွေက ကာကွယ်ပေး။ ကျမတို့ ဆက်တောင့်ခံထားမယ်”ဟု ဒေသခံတစ်ဦးကပြောသည်။
Public Service Announcement
