မန္တလေးတိုင်း ပျော်ဘွယ်မြို့တွင် ကုန်တင်မီးရထားတစ်စင်း တိမ်းမှောက်ပြီး မိုင်းဆွဲခံရ၍ တိမ်းမှောက်သည်ဟု သတင်းများထွက်ပေါ်နေပြီး အဆိုပါဖြစ်စဥ်ကြောင့် စစ်ကောင်စီလက်အောက်ခံ မီးရထား Non-CDM ဝန်ထမ်း သုံးဦးသေဆုံးကြောင်း ဒေသခံများက ပြောသည်။
ယမန်နေ့ နိုဝင်ဘာလ ၁၇ ရက်၊ ညနေ ၅း၃ဝ ဝန်းကျင်က ပျော်ဘွယ်မြို့နယ်၊မင်းလမ်းအုပ်စု၊ ကျောင်းကုန်းကျေးရွာအနီးမိုင်တိုင်အမှတ် ၂၈၅နှင့်၂၈၆ကြားတွင် ကုန်တင် မီးရထားတစ်စင်း တိမ်းမှောက်ခဲ့ပြီး စက်ခေါင်းမှူး(၁)ဦးနှင့် လျှပ်စစ်စက်ပြင်(၁)ဦးတို နေရာတွင် သေဆုံးပြီး ကျန်သည့် စက်ခေါင်းမောင်း (၁)ဦးမှာ ဒဏ်ရာဖြင့် ဆေးရုံတွင် သေဆုံးသွားကြောင်း ဒေသခံများက ပြောသည်။
နွားအုပ်အားတိုက်မိ၍ ရထားတိမ်းမှောက်ခဲ့သည်ဟု စစ်ကောင်စီလက်အောက်ခံ ဒေသခံမီးသတ်တပ်ဖွဲ့ကဆိုထားသော်လည်းမီးရထားနှင့်နီးစပ်သူအချို့ကမူ အဆိုပါရထားသည် မိုင်းဆွဲခံရ၍ တိမ်းမှောက်ခြင်းဖြစ်နိုင်ကြောင်း ပြောကြားသည်။
“နွားတွေက အဲဒီအချိန်ကြီး မရှိတော့ပါဘူး။ ခုဟာက တစ်တွဲပေါ်ကို နောက်တစ်တွဲမြှောက်တက်သွားပြီးမှောက်တာ။”ဟု ဒေသခံတစ်ဦးက ပြောသည်။
ရထားစက်ခေါင်းအနောက်ရှိ စက်ခေါင်းမောင်း နားနေသည့်တွဲတွင် ပေါက်ကွဲခြင်းဖြစ်ပြီး ပေါက်ကွဲမှုကြောင့် ရထားတွဲမှာ မြောက်တက်သွားကာ နောက်အတွဲပေါ် သွားထပ်ပြီး တိမ်းမှောက်ခဲ့ခြင်းဖြစ်ကြောင်း မြို့ခံအချို့က ပြောသည်။ စစ်ကောင်စီအတွက်ရိက္ခာများသယ်ဆောင်လာသောရထားဖြစ်၍ မိုင်းခွဲတိုက်ခိုက်ခံရခြင်းဖြစ်ကြောင်းဒေသခံအချို့ကလည်းပြောသည်။ မီးရထားတိမ်းမှောက်ပြီးပျက်စီးမှု များပြာသည်ကို ဓါတ်ပုံများတွင်မြင်တွေ့ရသည်။