စစ်ကိုင်းတိုင်းဒေသကြီး၊ ကနီမြို့နယ်တွင် အာဏာသိမ်းစစ်ကောင်စီတပ်နှင့် ဒေသခံပြည်သူ့ကာကွယ်ရေးတပ်ဖွဲ့များနေရာနှစ်နေရာတွင် ယမန်နေ့(နိုဝင်ဘာ ၂၁)ကတိုက်ပွဲ အပြင်းအထန်ဖြစ်ခဲ့ပြီး စစ်ကောင်စီတပ်များအထိ့နာ၍ ရဟတ်ယာဥ်နှင့် စစ်ရေယာဥ်များပါ အသုံးပြုခဲ့သော်လည်း ပြည်သူ့ကာကွယ်ရေးတပ်ဖွဲ့များ အထိ့အခိုက်မရှိခဲ့ကြောင်းတာဝန်ရှိသူများကပြောသည်။
-ယင်းယိမ်တောတိုက်အနီးတိုက်ပွဲစစ်ကောင်စီတပ် ၈ဦးသေပြီးစစ်ကူရဟတ်ယာဥ်သုံး
ယင်းယိမ်တောတိုက်တွင်အကြမ်းဖက်စစ်ကောင်စီတပ်ကို ဝိုင်းမိပြီးနောက် တိုက်ပွဲ ဖြစ်ပွားရာ စစ်ကောင်စီတပ်သားရှစ်ဦးသေပြီး သုံးယောက် ဒဏ်ရာရရှိခဲ့သည်ဟု KANI PDF -1 က ယနေ့(နိုဝင်ဘာ ၂၂ ရက်)က ထုတ်ပြန်သည်။
တိုက်ပွဲ ဖြစ်စဥ်မှာ နိုဝင်ဘာ ၂၁ ရက် နေ့လည် ၁ နာရီခန့် ကစတင်ခဲ့ပြီး ကနီမြို့နယ် ယင်းယိမ်တောတိုက်တွင် နယ်ကျွံလာသည့် စစ်ကောင်စီတပ်ဖွဲ့ကို ဝိုင်းမိခဲ့သည်။
Public Service Announcement
ထို့နောက် ညနေ ၃ နာရီခွဲခန့်တွင် စစ်ကောင်စီဘက်က ရဟတ်ယာဥ် အသုံးပြုလာသည့် အတွက် ဆုတ်ခွာခဲ့ရကြောင်း KANI PDF -1 ကဆိုသည်။
စစ်ကောင်စီတပ်က ညနေ ၅ နာရီခွဲဝန်းကျင်တွင် ယင်းယိမ်တော တောင်ပေါ် ကျောင်းသို့ ဦးတည်လာသဖြင့် KANI PDF -1 က စတင်ပစ်ခတ်ခဲ့ကာ စစ်ကောင်စီဘက်မှလည်း လက်နက်ငယ်၊လက်နက်ကြီးများ အသုံးပြုခဲ့သဖြင့် တိုက်ပွဲ ပြင်းထန်ခဲ့သည်။
အဆိုပါတိုက်ပွဲတွင် ပြည်သူ့တပ်ဖွဲ့ဝင်တစ်ဦးမျှ ထိခိုက်ခြင်းမရှိဘဲဆုတ်ခွာ နိုင်ခဲ့ပြီး အကြမ်း ဖက်စစ်ကောင်စီဘက်မှ ရှစ်ဦးသေကာ သုံးဦးဒဏ်ရာရခဲ့ကြောင်း ထုတ်ပြန်ချက်၌ ဖော်ပြသည်။
– မဲဒင်ကျေးရွာနှင့် သစ်ခက်ကျေးရွာအနီးတိုက်ပွဲ စစ်ကောင်တပ်အထိ့နာ၍ စစ်ရေယာဥ် ၂စီးအကူအညီယူရ
ကနီမြို့နယ် ၊စဖိုကြီးကျေးရွာ၊ မဲဒင်ကျေးရွာနှင့် သစ်ခက်ကျေးရွာတို့အနီး၌ ယမန်နေ့ညနေပိုင်းက အကြမ်းဖက်စစ်ကောင်စီတပ်နှင့် အာဏာရှင်တော်လှန်ရေးပြည်သူ့တပ်မတော်(DRPA)နှင့် ဒေသခံပြောက်ကျားရဲဘော်များပူးပေါင်းအဖွဲ့နှင့် အကြမ်းဖက်အာဏာသိမ်းစစ်ကောင်စီ၏ စစ်တပ်တို့အကြားတိုက်ပွဲဖြစ်ပွားခဲ့သည်။တိုက်ပွဲအတွင်း ဖက်ဆစ်စစ်တပ်မှ အကျအဆုံးများ၍ စစ်ကူခေါ်ခဲ့ရာ ရေယာဥ်နှစ်စင်းစစ်ကူရောက်ရှိလာကြောင်း၊ စစ်ကူရေယာဥ်များအား အာဏာရှင်တော်လှန်ရေးပြည်သူ့တပ်မတော် (DRPA)မှ လက်နက်ကြီးပစ်ကူအသုံးပြုတိုက်ခိုက်ခဲ့ရာရေယာဥ်တစ်စီးထိမှန်မီးလောင်ခဲ့ကြောင်း၊ အဆိုပါစစ်ကူရေယာဥ်နှစ်စင်းပြန်လည်ဆုတ်ခွာသွားပြီးနောက် ညပိုင်းအထိ တိုက်ပွဲပြင်းထန်ခဲ့ကြောင်း DRPA က သတင်းထုတ်ပြန်သည်။
“တိုက်ပွဲအခြေအနေကတော့ အခုညနေ၅နာရီလောက်ကစဖြစ်တာဗျ။ ဖက်ဆစ် စစ်တပ်ကကျေးရွာတွေကိုထိုးစစ်ဆင်လာတာ။ ဒေသခံပြောက်ကျားရဲဘော်တွေနဲ့ ကျနော်တို့ DRPA စစ်ကိုင်းတပ်ရင်းကပူးပေါင်းပြီး ခုခံကာကွယ်စစ်ဆင်နွှဲနေတာပါ။ လက်ရှိမြေပြင်အခြေအနေကတော့ စစ်ခွေးတွေဘက်ကအကျအဆုံးများတယ်ဗျ။ အခုထိတိုက်နေတုန်းဆိုတော့အရေအတွက်တော့အတိအကျမသိရသေးဘူး။ ပြီးတော့ဒီ ကောင်တွေအကျအဆုံးများလို့စစ်ကူခေါ်တာနဲ့တူတယ်။ ရေယာဥ်နှစ်စင်းစစ်ကူရောက်လာတယ်ဗျ။ ဒါကိုလည်း ကျနော်တို့ DRPA က လက်နက်ကြီးပစ်ကူသုံးပြီးတိုက်ခိုက်နိုင်ခဲ့တယ်။ ဒီအတွက်ရေယာဥ်တစ်စီးထိမှန်ပျက်စီးတယ်ဗျ။ အခုထိတော့ကျနော်တို့ပူးပေါင်းအဖွဲ့ဘက်က ကျဆုံးသူမရှိသေးဘူးခင်ဗျ”ဟု မြေပြင်မှ DRPA ရဲဘော်တစ်ဦးကသတင်းပေးပို့လာကြောင်း စစ်ရေးကြီးကြပ်မှုလုပ်ငန်းကော်မတီ(ဗဟို) ဒုတိယဥက္ကဌကပြောကြားသည်။
ညပိုင်းအချိန်အထိ တိုက်ပွဲဖြစ်ပွားနေပြီး အကြမ်းဖက်စစ်တပ်ကို ပူးပေါင်းအဖွဲ့ကဝိုင်းဝန်း ပိတ်ဆို့တိုက်ခိုက်လျက်ရှိရာ တိုက်ပွဲအရှိန်ပြင်းထန်ခဲ့ကြောင်း၊ အကြမ်းဖက်စစ်သားအင်အားခန့်မှန်း ၅၀ ခန့်သာကျန်တော့ကြောင်း DRPAက အသိပေးသည်။
