ကရင်နီ(ကယား)ပြည်နယ် ဒီးမော့ဆိုမြို့နယ်တွင် ယနေ့ တိုက်ပွဲ ၄ကြိမ် ဆက်လက် ဖြစ်ပွားခဲ့ပြီး စစ်ကောင်စီတပ်မှ ၅ဦးသေ ၇ဦးဒဏ်ရာရရှိကာ ကရင်နီတပ်ဖွဲ့ဝင် တစ်ဦး ဒဏ်ရာရရှိခဲ့သည်ဟု ကရင်နီအမျိုးသားကာကွယ်ရေးတပ်ဖွဲ့(KNDF)က ထုတ်ပြန်သည်။
ယမန်နေ့က တိုက်ပွဲ ၃ကြိမ်ဖြစ်ခဲ့သည့် ဒီးမော့ဆိုမြို့နယ် စံပြ (၆)မိုင်နှင့် ဒေါပိုးစီကျေးရွာတို့တွင် ယနေ့ နိုဝင်ဘာ ၂၃ရက် မနက်အစောပိုင်းနှင့် ညနေပိုင်း တို့တွင် တိုက်ပွဲများဆက်ဖြစ်ခဲ့သည်ဟု KNDFက ဆိုသည်။ ထို့ပြင် လွိုင်ကော်မြို့နယ် ပန်ကန်းရပ်ကွက်နှင့် ဒီးမော့ဆိုမြို့နယ် ရဲစခန်းအနီးတွင်လည်းတိုက်ပွဲ ဖြစ်ပွားခဲ့ကြောင်း ဖော်ပြသည်။
ဒေါပိုးစီကျေးရွာအတွင်း တိုက်ပွဲတွင် ကရင်နီ တပ်မတော် (KA) နှင့် KNDF တို့ ခုခံတိုက်ခိုက်ခဲ့၍ အကြမ်းဖက် စစ်ကောင်စီတပ်ဖက်မှ (၂)ဦး သေဆုံးက (၅) ဦး ဒဏ်ရာရခဲ့ကြောင်း၊ ပန်ကန်းရပ်ကွက် ဘုန်းကြီးကျောင်းအနီး တပ်စွဲထားသော စစ်ကောင်စီတပ်များနှင့် ထိတွေ့တိုက်ပွဲဖြစ်ပွားခဲ့ရာ တွင်လည်း စစ်ကောင်ဏီတပ်မှ ၁ဦးသေဆုံးကြောင်း ထုတ်ပြန်ခဲ့သည်။
ညနေပိုင်းတွင် (၅) မိုင်နှင့် (၆) မိုင်အနီး သင်ချိုင်းတွင် တိုက်ပွဲဖြစ်ပွားပြီး စစ်ကောင်စီတပ်မှ ၂ဦးဒဏ်ရာရရှိကာ ကရင်နီပူးပေါင်းတပ်ဖွဲ့မှ ရဲဘော်တစ်ဦး မစိုးရိမ်ရ ဒဏ်ရာရခဲ့သည်ဟု ဆိုသည်။
ဒီးမော့ဆိုမြို့နယ် ရဲစခန်းအနီးတွင်လည်း ညနေပိုင်း၌ အပြန် အလှန်ပစ်ခတ်မှုဖြစ်ပွားခဲ့ရာ စစ်ကောင်စီတပ်ဘက်မှ (၂)ဦး အာပီဂျီ ထိမှန် သေဆုံးခဲ့ကြောင်း KNDFက ထုတ်ပြန်သည်။