တိုက်ပွဲ၌ကျဆုံးခဲသည့် ကရင်နီအမျိုးသားကာကွယ်ရေးတပ်ဖွဲ့(KNDF) ရဲဘော် လေးဦး၏ ဈာပနအခမ်းအနားကို နိုဝင်ဘာ ၂၆ရက်က ပြုလုပ်ခဲ့ကြောင်း KNDF တပ်ရင်း (၉)က ယနေ့ ထုတ်ပြန်သည်။
ကရင်နီ(ကယား)ပြည်နယ် ဒီးမော့ဆိုမြို့နယ်၌ နိုဝင်ဘာ ၂၅ရက်က ဖြစ်ပွားခဲ့သည့် တိုက်ပွဲ၌ KNDF ရဲဘော် လေးဦး ကျဆုံးခဲ့ခြင်းဖြစ်သည်။
စစ်အာဏာရှင်စနစ် အမြစ်ဖြတ်တော်လှန်ရေးတိုက်ပွဲ ၌ အသက်ပေးသွားခဲ့သော ရဲဘော်တို့၏ စျာပန ခရီးအား ဆွေမျိုးသားချင်းများ၊ ပြည်သူ့ကာကွယ်ရေး တပ်ဖွဲ့ဝင်များ နှင့် တာဝန်ရှိပုဂ္ဂိုလ်များ ၊မိဘပြည်သူ များမှ လိုက်ပါပို့ဆောင်ခဲ့ကြောင်း ရေးသားပြီး KNDF B-09 က မှတ်တမ်းဓာတ်ပုံများကို ဖော်ပြခဲ့သည်။
ကရင်နီဒေသ၌ မေလမှစ၍ ကရင်နီဒေသခံများနှင့်ကရင်နီလက်နက်ကိုင်တပ်ဖွဲ့များက စစ်ကောင်စီတပ်ကို ခုခံတော်လှန်တိုက်ခိုက်ခဲ့ရာ ၆လအတွင်း တိုက်ပွဲ ၁၀၀ ကျော်ဖြစ်ခဲ့ပြီး ကရင်နီတပ်မတော်(KA)၊ KNDFနှင့် ပြည်သူ့ကာကွယ်ရေးတပ်ဖွဲ့(PDF)တို့မှ တပ်ဖွဲ့ဝင် ၃၀ ကျော် ကျဆုံးခဲ့သည်။ ယင်းအနက် KNDF တပ်ဖွဲ့ဝင် ၁၆ဦး ခန့်ပါဝင်ကြောင်း KNDF ပြောရေးဆိုခွင့်ရှိသူ တစ်ဦး၏ ပြောပြချက်အရ သိရသည်။