စစ်ကိုင်းတိုင်း၊ ဒီပဲယင်းမြို့နယ်တွင် အကြမ်းဖက်စစ်ကောင်စီက နယ်အရှေ့ခြမ်းနှင့်အနောက်ခြမ်းအား စစ်ကြောင်းများခွဲကာ ထိုးစစ်ဆင်နေပြီး ရဟတ်ယာဥ်များဖြင့်ပါပစ်ခတ်ခဲ့၍ ပြည်သူငါးဦးထက်မနည်း သေဆုံးကြောင်း ဒေသခံများကပြောသည်။
အကြမ်းဖက်စစ်ကောင်စီသည် ယမန်နေ့(နိုဝင်ဘာလ ၂၇ရက်နေ့)ညနေပိုင်းကဒီပဲယင်းမြို့နယ်အရှေခြမ်းအားခန့်မှန်းအင်အား သုံးဆယ်မှလေးဆယ်ဝန်းကျင်ဖြင့် စစ်ကြောင်းထိုးခဲ့ကြောင်း၊ ထိုပမာဏဖြင့် နောက်ထပ်စစ်ကြောင်းတစ်ကြောင်းအား အရှေ့ခြမ်းနယ်ကိုပင် ထပ်မံထိုးခဲ့ကြောင်း၊ ပထမစစ်ကြောင်းအား ဒီပဲယင်းPDFဘက်မှဝိုင်းဝန်းပိတ်ဆို့ခဲ့သဖြင့် ပြန်ခေါက်သွားခဲ့ကြောင်းဒေသခံများကပြောသည်။နောက်ထပ်လာသည့် စစ်ကြောင်းကိုလည်းPDFဘက်မှ ထပ်ဝိုင်းထားသည့်အတွက် ထွက်ပေါက်ခက်ခဲသွားသောအခါ ရဟတ်ယာဥ်(၅)စီးဖြင့် စစ်ကူလာချပေးပြီး ပစ်ခတ်သွားခဲ့ခြင်းဖြစ်ပြီး ပြည်သူငါးဦးထက်မနည်းသေဆုံးခဲ့သည်ဟု သတင်းများထွက်ပေါ်နေကြောင်း ဒေသခံများကပြောသည်။
တချိန်တည်းမှာပင် ဒီပဲယင်းနယ်အနောက်ဘက်ခြမ်းကိုလည်း စစ်ကြောင်းများခွဲကာထိုးစစ်ဆင်ခဲ့ကြောင်း ဒေသခံများကပြောသည်။
ညောင်လှကျေးရွာအပါအဝင် ဆယ်ရွာထက်မနည်းစစ်ဘေးရှောင်နေရပြီး ထိခိုက်သေဆုံးသူ၊ကလေးငယ်မျာအပါအဝင်ပျောက်ဆုံးနေသူများလည်းရှိကာ ပြည်သူသုံးထောင်ကျော်စစ်ဘေးရှောင်နေရကြောင်း ဒေသခံများကပြောသည်။
Public Service Announcement
“ဒီကနေ့မနက်လည်း ရမ်းသမ်းပစ်နေတယ်။ လက်နက်ကြီးတွေနဲ့ပစ်ခတ်နေတယ်။အိမ်ခေါင်မိုးပေါ်တွေထိ ကျည်ဆံကျတာတွေရှိတယ်။”ဟု ဒေသခံတစ်ဦးကပြောသည်။
အကြမ်းဖက် စစ်တပ်သည် နိုဝင်ဘာလ ၂၇ရက် ညနေ ၅ နာရီခန့်မှစ၍ ဒီပဲယင်းမြို့နယ် ညောင်လှကျေးရွာအနီးတွင် ရဟတ်ယာဥ်များသုံး၍ စစ်သေနတ်များဖြင့်ပစ်ခတ်ခြင်း၊ မြေပြင်တွင် သာလွန်အင်အားဖြင့် ထိုးစစ်ဆင်ခြင်းများ ပြုလုပ်လျက်ရှိကြောင်း၊ လတ်တလောအခြေအနေတွင် အကြမ်းဖက်စစ်တပ်သည် ပြည်သူများကိုသာ ရမ်းသမ်း ပစ်ခတ်နေခြင်း၊ ပြည်သူနေအိမ်များအား ဖျက်ဆီးခြင်းအစရှိသည့် ကြွက်မနိုင် ကျီမီးရှို့လုပ်ရပ်များကြောင့်ပြည်သူလူထုများ ကျဆုံးမှုများနှင့် ထိခိုက်ဒဏ်ရာများ ရရှိထားပြီး ပြည်သူအများအပြားလည်း ဘေးလွတ်ရာသို့ ထွက်ပြေးတိမ်းရှောင်နေကြရကြောင်း ဒီပဲယင်းပြည်သူ့ကာကွယ်ရေးတပ်ဖွဲ့က အသိပေးသည်။
ထို့ကြောင့် ပြည်သူများအနေဖြင့် မြို့နယ်အတွင်းရှိ ကျေးရွာများသည် စစ်ဘေးရှောင်ပြည်သူများအား ညီရင်းမောင်နှမ ဆွေမျိုးသဖွယ် သဘောထား၍ ကြိုဆိုလက်ခံပေးကြပါရန်၊ စစ်ဘေးရှောင်ပြည်သူများတွင် ဒဏ်ရာရပြည်သူများပါဝင်လာပါက လိုအပ်သော ဆေးဝါးကုသမှုများ ရရှိရန် ဒေသတွင်း လူမှုကူညီရေးအဖွဲ့များ၊ ဆရာဝန်များ၊ ကျန်းမာရေးဆေးပညာတတ်ကျွမ်းသူများနှင့် ချိတ်ဆက် အကူအညီတောင်းရန်၊ ကျေးရွာများရှိ ဖြတ်လတ်သန်စွမ်းသော လူငယ်များက ဦးဆောင်၍ ပျောက်ဆုံး အဆက်အသွယ်ပြတ်လျက်ရှိသော ပြည်သူများအား ဝိုင်းဝန်းရှာဖွေပေးရန်၊ ရာသီဥတု ချမ်းအေးသော ကာလဖြစ်သဖြင့် စစ်ဘေးရှောင်ပြည်သူများအတွက် လိုအပ်သော စောင်နှင့် အနွေးထည်များ ရှာဖွေပေးရန်၊စစ်ဘေးရှောင်များအတွက် ရိက္ခာနှင့် သောက်ရေသန့်များ ကူညီပေးကြရန်၊စစ်ဘေးရှောင်များအတွက် ကူညီရာတွင် အမျိုးသမီး၊ ကလေးသူငယ်နှင့် သက်ကြီးရွယ်အိုများအတွက်လိုအပ်သောအရာများကိုလည်း ထည့်သွင်းစဥ်းစား၍ ကူညီပေးကြရန်၊ စစ်ဘေးရှောင်ပြည်သူများအား စိတ်ဓာတ်ကျဆင်းမှုမရှိအောင် နွေးထွေးစွာ ဖေးမပြီး မေတ္တာတရားများ ပြသကြရန်၊ ကျန်းမာရေးဆေးပညာတတ်ကျွမ်းသူများအနေနှင့်လည်း မိမိတို့ တတ်ကျွမ်းသင့်ပညာဖြင့် စစ်ဘေးရှောင်ပြည်သူလူထုဆီသို့သွားရောက်၍ ကူညီစောင့်ရှောက် ပေးကြရန်၊ မော်တော်ယာဥ်ရှိသည့် ပြည်သူများကလည်း စစ်ဘေးရှောင်ပြည်သူများအား ဘေးကင်းရာသို့ပေးပို့ခြင်းနှင့် လိုအပ်သည့် ပစ္စည်းများပေးပို့ရာတွင် ကူညီပေးကြရန်၊ ထူးခြားသည့်ဖြစ်စဥ်များကို ကျွန်ုပ်တို့ Page messenger သို့ ဆက်သွယ်၍ သတင်းပေးပို့ကြပါရန် ဒီပဲယင်းပြည်သူ့ကာကွယ်ရေးတပ်ဖွဲ့က မေတ္တာရပ်ခံထားသည်။
