ကချင်လွတ်လပ်ရေးအဖွဲ့(KIO)အုပ်ချုပ်နယ်မြေ အတွင်း ဧရာ၀တီ မြစ်ကြောင်းတစ်လျှောက် ရွှေတူးဖော်ခြင်း လုပ်ငန်းများ ယနေ့(နိုဝင်ဘာ ၂၉ရက်)မှစ၍ တားမြစ်လိုက်ကြောင်း KIO ရွှေကူခရိုင်က ထုတ်ပြန်သည်။
အများပြည်သူနှင့် သက်ဆိုင်သော ဘာသာ၊သာသနာ၊ မြေများ၊ ဘာသာရေး အဆောက်အဦများ၊ ဒေသခံ ပြည်သူများ ထွန်ယက်စိုက်ပျိုးမြေများနှင့် ကျေးရွာများ၊ ဧရာ၀တီမြစ်သဘာ၀ ဘေးပတ်ဝန်းကျင် နေရာများ ပျက်စီးယိုယွင်းလာခြင်းကြောင့် ဧရာ၀တီမြစ်ကြောင်းတစ်လျှောက် ရွှေဖောင်နှင့် ရွှေတူးဖော်ခြင်း လုပ်ငန်းများအား လုံး၀(လုံး၀) တားမြစ်လိုက်သည်ဟု ထုတ်ပြန်ချက်တွင် ဖော်ပြသည်။
သတိပေးချက် တားမြစ်စာထုတ်ပြန်သည့် နိုဝင်ဘာ ၂၉ရက်မှစ၍ လိုက်နာဆောင်ရွက်ခြင်းမရှိ ဆက်လက်ကျူးလွန်ပါက ပြင်းထန်စွာ အရေးယူခြင်းခံရမည်ဟုလည်း အသိပေးထားသည်။
စစ်တပ်အာဏာသိမ်းပြီးနောက်ပိုင်း ကချင်ပြည်နယ် မြစ်ကြီးနားမြို့နယ် မြစ်ဆုံဒေသ အနီးဝန်းကျင်နင့် ၀ိုင်းမော်မြို့နယ် နန်ဆန်ယန်ကျေးရွာတွင်လည်း စက်ယန္တရားများအသုံးပြုပြီး ရွှေတူးဖော်ခြင်းများ လုပ်ဆောင်နေ၍ ဒေသခံမားက ကန့်ကွက်ထားသည်။
Public Service Announcement
အဆိုပါ နေရာများသည် KIO အုပ်ချုပ်ရေးနယ်မြေတွင် မပါဝင်ဘဲ စစ်ကောင်စီ အုပ်ချုပ်သည့် နယ်မြေ ဖြစ် ကြောင်း KIO သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောသည်။
“KIO အနေနဲ့တော့ အဲဒါမျိုးတွေ သဘာ၀ ပျက်စီးတာတွေကတော့ ကျွန်တော်တို့က ကန့်ကွက်ပါတယ်” ဟု ဗိုလ်မှူးကြီးနော်ဘူက ပြောသည်။
