အကြမ်းဖက်စစ်ကောင်စီတပ်ဖွဲ့ဝင်များက ကလေးမြို့နယ် မြစ်သာမြစ်အရှေ့ဘက်ကမ်း ကျေးရွာများကို ဝင်ရောက် မွှေနှောက်ဖျက်ဆီးနေပြီး ကျေးရွာ ၁၀ရွာမှ ပြည်သူ တစ်သောင်းခန့်သည် ဘေးလွတ်ရာ တိမ်းရှောင်ထွက်ပြေးနေရကြောင်း Kalay PDFက ယနေ့သတင်းထုတ်ပြန်သည်။
အကြမ်းဖက်စစ်ကောင်စီတပ်ဖွဲ့များသည် နိုဝင်ဘာ ၂၇ ရက်ဝန်းကျင်ကစ၍ ကလေးမြို့နယ်တောင်ပိုင်းနှင့် မြစ်သာမြစ်အရှေ့ဖက်ကျေးရွာများသို့ စစ်ကြောင်းများခွဲ၍ ဝင်ရောက်လာခဲ့ပြီး နိုဝင်ဘာ ၂၉ ရက်နေ့တွင် ရေရှင်ကျေးရွာမှ နေအိမ် ၁၅ လုံးခန့်၊ နိုဝင်ဘာ ၃၀ ရက်တွင် နွားတောင်ပေါ်ရှိ တောတိုက်အိမ် ၁၀ လုံးခန့်နှင့် ယနေ့ (ဒီဇင်ဘာလ ၁ ရက်)တွင် လယ်ခြားကျေးရွာမှ နေအိမ် ၈ လုံးခန့်ကို မီးရှို့ဖျက်စီးခဲ့သည်ဟု ပြည်သူ့ကာကွယ်ရေးတပ်ဖွဲ့ (ကလေး)က ထုတ်ပြန်ထားသည်။
နိုဝင်ဘာ ၂၅ ရက်ကလည်း စစ်ကောင်စီတပ်ဖွဲ့များသည် တင်သားရွာဘက်သို့ လက်နက်ကြီးဖြင့် အကြောင်းမဲ့ပစ်ခတ်ခဲ့၍ အမျိုးသမီးတစ်ဦး လက်နက်ကြီး ထိမှန်ကာ ဒဏ်ရာအပြင်းအထန်ရခဲ့သည်ဟု ဆိုသည်။
ကလေးဒေသသို့ ဝင်ရောက်လာသည့်အကြမ်းဖက်စစ်ကောင်စီစစ်ကြောင်းများတွင် တပ်မ ၂၂ တံဆိပ်တပ်ဆင်ထားသည့် တပ်ဖွဲ့များပါဝင်နေသည်ဟု လူထုအား အသိပေးထားသည်။ ယနေ့ ညနေပိုင်းတွင် မြစ်သာမြစ်အရှေ့ဘက်ကမ်း ကျေးရွာများကိုဝင်ရောက် မွှေနှောက်ဖျက်စီးနေပြီး တင်သား၊ကျောက်ဖူး၊ဒိုးနွယ်၊ အရှေ့စည်း၊အင်းကျွန်း၊ ရေရှင်၊ ကုက္ကိုလ်၊လယ်ခြား၊ ရှားတောနှင့် နွားကျေးရွာများမှ ဒေသခံပြည်သူ တစ်သောင်းခန့်သည် ထွက်ပြေးတိမ်းရှောင်နေရသည်ဟု သတင်းထုတ်ပြန်ထားသည်။
Public Service Announcement
