အကြမ်းဖက်စစ်တပ်က အရာတော်မြို့နယ် ကံဇွယ်ရွာကို မီးရှို့ဖျက်ဆီး

-ဒေသခံများ ဘေးလွတ်ရာပြေးနေရ

စစ်ကိုင်းတိုင်း အရာတော်မြို့နယ် ကံဇွယ်ရွာကို စစ်ကောင်စီတပ်များသည် ယနေ့(ဒီဇင်ဘာ ၄)နံနက်ပိုင်းကစတင်၍ ဝင်ရောက်မီးရှို့ဖျက်ဆီး​နေကြောင်း ဒေသခံများက ပြောသည်။

အကြမ်းဖက်စစ်ကောင်စီတပ်သား ၅၀ခန့်က ကံဇွယ်ကျေးရွာ စာသင်ကျောင်းတံခါးများကို ရိုက်ချိုးဖျက်ဆီး​ခြင်း ၊နေအိမ်တွင်ကျန်နေသည့် ဆိုင်ကယ်များအား ယူဆောင်ခြင်းနှင့် အိမ်မွေးတိရိစ္ဆာန်များကို ဖမ်းဆီးခြင်း စသည့်အကြမ်းဖက်မှုများကျူးလွန်နေကြာင်း ဒေသသတင်းရင်းမြစ်တစ်ခုဖြစ်သည့် အရာတော်သတင်းမှန်ပြန်ကြားရေးက ဖော်ပြသည်။

လက်ရှိအ​ခြေအနေတွင် ကံဇွယ်ကျေးရွားသူ၊ကျေးရွားသားများက ဘေးလွတ်ရာသို့ တိမ်းရှောင်နေရပြီး စစ်ကောင်စီတပ်သား ၅၀ခန့်မှာ ဒေသခံများ၏ပစ္စည်းများဖြင့် ချက်ပြုတ်စားသောက်ကာ ကျေးရွာအတွင်း တပ်စွဲထားမည့်အခြေအနေရှိကြောင်း ဒေသခံများက ပြော သည်။

Public Service Announcement

အရာတော်မြို့နယ်တွင် စစ်တပ်အခြေစိုက်စခန်းသုံးခုရှိပြီး မြို့နယ်အတွင်းရှိ ကျေးရွာများအားဝင်ရောက်သောင်းကျန်းလျက်ရှိရာ ရှောက်ခါး၊မန်ကျည်းကန်၊နောင်ကြီးအိုင် စသည့်ကျေးရွာများရှိ နေအိမ်များပါ မီးရှို့ဖျက်ဆီးခံထားရသည်။

စစ်​​​ကောင်စီတပ်များ လတ်တလော ဝင်ရောက်သောင်းကျန်းလျက်ရှိသော ကံဇွယ်ကျေးရွာသည် ဝါးတန်းကျေးရွာအုပ်စုအတွင်းပါဝင်ပြီး ကျေးရွာအုပ်စုတစ်ခုလုံးတွင် အိမ်ထောင်စု ၂,၀၀၀ နီးပါးနေထိုင်လျက်ရှိသည်။