အကြမ်းဖက်စစ်ကောင်စီကိုဖြုတ်ချရေး ခုခံတော်လှန်နေသော ပြည်သူ့ကာကွယ်ရေးတပ်ဖွဲ့ (PDF )တပ်ဖွဲ့ ဝင်တစ်ဦးဖြစ်သော အစ္စလာမ်ဘာသာဝင် လူငယ်တစ်ဦးသည် ကရင်ပြည်နယ်တွင် ယနေ့ ဖြစ်ပွားသော တိုက်ပွဲအတွင်း
ကျဆုံးသွားခဲ့သည်။
အသက် ၂၈ နှစ်အရွယ် ကိုကောင်းထက်စိုးဖြစ်ပြီး ၎င်းသည် ရန်ကုန်တိုင်းဒေသကြီး တာမွေမြို့နယ်တွင် နေထိုင်ခဲ့သူဖြစ်ပြီး အစ္စလာမ်ဘာသာဝင်လူငယ်တစ်ဦးဖြစ်ကြောင်း နီးစပ်သူများက ပြောသည်။
ကရင်ပြည််နယ် တပ်မဟာ(၅) နယ်မြေ၌ ယနေ့(ဒီဇင်ဘာ ၆)ရက် နေ့လည်ပိုင်းက အကြမ်းဖက်စစ်ကောင်စီတပ်နှင့် ဖြစ်ပွားခဲ့သည့် တိုက်ပွဲတွင် ဖက်ဒရယ်ဒမိုကရေစီနိုင်ငံထူထောင်ရေးအတွက် တိုက်ပွဲဝင်ရင်းကျဆုံးခဲ့ကြောင်းကိုကောင်းထက်စိုးနှင့် ရင်းနီးသူများ People’s Spring သို့ပြောသည်။
ကိုကောင်းထက်စိုးသည် စစ်တပ်က နိုင်ငံတော်အာဏာ သိမ်းပြီးငြိမ်းချမ်းစွာဆန္ဒပြသူများကို စစ်ကောင်စီတပ်ကရက်ရက်စက်စက်သေနတ်ဖြင့်ပစ်သတ်ခဲ့ပြီးနောက်ပိုင်း လက်နက်ကိုင်တော်လှန်ရန် ဆုံးဖြတ်ကာ မိသားစုအား အဆက်အသွယ်ဖြတ်ပြီး ကရင်ပြည်နယ် တပ်မဟာ(၅)နယ်မြေ၌ PDF တပ်သားအဖြစ်ဝင်ရောက်ခဲ့သူဖြစ်သည်။ သူ၏ တော်လှန်ရေးကာလအမည်မှာ ရဲဘော်ရမ်ချိုဖြစ်သည်။
ယနေ့ကိုကောင်းထက်စိုး ကျဆုံးခဲ့ပြီးနောက် “ငါတို့တွေ မင်းခြေမှုန်မမှီသေးဘူး။ ငါတို့တွေ လိပ်ပြာမလုံသေးဘူး။ငါတို့တွေ မင်းလို မပေးဆပ်နိုင်သေးဘူး။ငါတို့တွေ မင်းလို အနစ်နာမခံနိုင်သေးဘူး။မင်းဟာ ငါတို့ရဲ့ သူရဲကောင်းတဦးပါ ညီလေး”ဟု သူ၏ မိတ်ဆွေတစ်ဦးက လူမှုကွန်ရက်တွင် ရေးသားထားသည်။
နိုင်ငံတော်အာဏာကိုမတရားသဖြင့်လုယူပြီး ပြည်သူများ၏ငြိမ်းချမ်းစွာဆန္ဒပြတောင်းဆိုမှုများကို မျက်ကွယ်ပြု၍ ရက်ရက်စက်စက်သေနတ်ဖြင့်ပစ်သတ်ခဲ့သောအကြမ်းဖက်စစ်ကောင်စီကိုဖြုတ်ချရန် ဘာသာစုံ၊လူမျိုးပေါင်းစုံ ၊ ဆရာဝန်၊အင်ဂျင်နီယာ၊အနုပညာရှင်၊အလုပ်သမား၊တောင်သူလယ်သမားစသောအလွှာပေါင်းစုံမှ လူငယ်များကPDFအတွင်းဝင်ရောက်ကာ စစ်ပညာသင်ယူ၍ ခုခံတော်လှန်နေကြခြင်းဖြစ်သည်။