အကြမ်းဖက်စစ်ကောင်စီတပ်ဖွဲ့ဝင် ၁၅ဦးသေဆုံးပြီး ၁၅ဦးခန့်ဒဏ်ရာရရှိခဲ့သော ဒီဇင်ဘာ ၆ရက်တိုက်ပွဲတွင်ထီးချိုင့် PDFဖက်က တစ်ဦးကျဆုံးခဲ့ပြီး ကျဆုံးခဲ့သူမှာ တက္ကသိုလ်ဝင်တန်းကို ဂုဏ်ထူးသုံးဘာသာဖြင့် အောင်မြင်ခဲ့သည့် လူငယ်တစ်ဦးဖြစ်သည်ဟု ထီးချိုင့်ဒေသခံများနှင့် ထီးချိုင့်PDFဘက် ပြောသည်။
စစ်ကိုင်းတိုင်း ထီးချိုင့်မြို့နယ် တုံလုံရွာအနီး၌ တပ်စွဲထားသည့် စစ်ကောင်စီယာဥ်တန်းကိုထီးချိုင့် ပြည်သူ့ကာကွယ်ရေးတပ်ဖွဲ့(H-PDF)က ယမန်နေ့ နံနက်တွင် မိုင်းခွဲတိုက်ခိုက်ခဲ့သည်။အဆိုပါတိုက်ခိုက်မှုတွင် စစ်ကောင်စီဘက်က ၁၅ဦးခန့်သေဆုံးပြီး ၁၅ဦးခန့် ထိခိုက်ဒဏ်ရာရခဲ့ပြီး PDFဘက်က တစ်ဦးကျဆုံးကာ တစ်ဦးဒဏ်ရာရခဲ့သည်ဟု ထီးချိုင့် ပြည်သူ့ကာကွယ်ရေး တပ်ဖွဲ့(H-PDF)က သတင်းထုတ်ပြန်သည်။
PDFဘက်က ကျဆုံးသူလူငယ်သည် တက္ကသိုလ်ဝင်တန်းကို ဂုဏ်ထူးသုံးဘာသာဖြင့် အောင်မြင်ခဲ့သည့် လူငယ်တစ်ဦးဖြစ်သည်ဟု ဒေသခံများကပြောသည်။
“မိမိတို့အဖွဲ့မှ သုံးဘာသာဂုဏ်ထူးရှင် သူရဲကောင်းတစ်ဦး လက်နက်ကြီးထိမှန်ကာကျဆုံးခဲ့ရပါသည်” ဟု(H-PDF) ကလည်း သတင်းထုတ်ပြန်ထားသည်။
Public Service Announcement
ကဆုံးလူငယ်၏ ရုပ်အလောင်းကို ပစ်ခတ်မှုကြားမှပင်ရအောင်ပြန်သယ်ထုတ်ခဲ့ပြီး ကောင်းမွန်စွာသဂြိုလ်ခဲ့ကြောင်း H-PDF တပ်ဖွဲ့ဝင်တစ်ဦးကပြောသည်။
ထို့ပြင် ဒဏ်ရာရရှိသူ လူငယ်နောက်တစ်ဦးသည် အသက်အန္တရာယ်မရှိတော့သော်လည်း ခြေထောက်၌ ပြင်းထန် ဒဏ်ရာရခဲ့၍ ခြေတစ်ဘက်ကို ဖြတ်တောက်လိုက်ရသည်ဟု ဒေသခံများက ပြောသည်။
စစ်အာဏာရှင်ပြုတ်ကျရေး ၊ဖက်ဒရယ်ဒီမိုကရေစီဖော်ဆောင်နိုင်ရေးအတွက် ကြိုးစားရင်းတစ်ဦးကသေဆုံးပြီး တစ်ဦးက ပြင်းထန်ဒဏ်ရာရခဲ့သည့် တပ်ဖွဲ့ဝင် လူငယ်နှစ်ဦး၏ ကြေကွဲဖွယ်ဖြစ်ရပ်ကြောင့် စစ်အာဏာရှင်ကို အမြစ်ဖြတ်သုတ်သင်ရေး ပိုမိုစိတ်အားထက်သန်လာသည်ဟု ဒေသခံများက ပြောသည်။
ထီးချိုင့်မြို့သည် စစ်အာဏာရှင် ဆန့်ကျင်ရေးလူထုသပိတ်များစတင်စဥ်ကတည်းက အင်တိုက်အားတိုက်ပါဝင်ဆင်နွှဲခဲ့ပြီး လက်နက်ကိုင်ခုခံတော်လှန်ရာတွင်လည်း စစ်ကိုင်းတိုင်းရှိအခြားမြို့များနည်းတူရှေ့တန်းမှပါဝင်ခဲ့သည်။ ဒီဇင်ဘာလဆန်းပိုင်းတွင်လည်း ကချင်ပြည်နယ်ဘက်မှ ဆင်းလာသည့် စစ်ကောင်စီတပ်ယာဉ်တန်းကို ထီးချိုင့် PDFက နေရာ ၈ နေရာ၌ မိုင်းခွဲတိုက်ခိုက်ခဲ့သည်။
