အကြမ်းဖက်စစ်ကောင်စီနှင့် တိုက်ပွဲဖြစ်ပွားခဲ့သော နေရာများသို့ ပြည်သူအချို့ သွားရောက်လေ့လာမှုများရှိနေ၍ ထိုသို့မပြုလုပ်ရန် ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ မှ တာဝန်ရှိသူတစ်ဦးက လူထုနွေဦးသို့ပြောသည်။
ပြည်သူအချို့သည် လက်နက်၊ခဲယမ်း အကြွင်းအကျန်များ သွားရောက်ကောက်ယူခြင်းကိုလည်း လုပ်ဆောင်နေကြသည်ကို ကြားသိရကြောင်းလည်း ၎င်းက ဆိုသည်။
“စစ်ခွေးတွေရဲ့ အန္တရာယ်က အရမ်းများတယ်။ပြီးတော့ မပေါက်ကွဲသေးတဲ့ ဗုံးဆံတွေသာ ကိုင်မိ၊သယ်မိတာတို့ဆိုရင် တော်တော်လေး အခြေအနေဆိုးသွားနိုင်တယ်။နောက်တစ်ခုက သူတို့(အကြမ်းဖက်စစ်ကောင်စီ) ဆုတ်ခွာခဲ့ရတော့ နင်းမိုင်းတွေ ထောင်ခဲ့ဖို့များတယ်။ဒါကြောင့် မသွားကြပါနဲ့”ဟု အထက်ပါ တာဝန်ရှိသူက ပြောသည်။
ထို့ကြောင့် အဆိုပါနေရာများသို့ ကျွမ်းကျင်နားလည်သူများ မပါဝင်ပဲ သွားရောက်၍ စပ်စုလေ့လာခြင်း မပြုလုပ်ကြရန် ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့က သတိပေးသည်။
လက်နက်၊ ခဲယမ်းများ ကောက်ယူရရှိခဲ့သည့် ပြည်သူများအနေဖြင့်လည်း အဆိုပါ လက်နက်၊ခဲယမ်းများကို လက်ဝယ်မထားရှိကြရန်နှင့် ရရှိထားပါကလည်း သတိကြီးစွာကိုင်တွယ်ပြီး ကျေးရွာဒေသကာကွယ်ရေးတပ်ဖွဲ့များသို့သော်လည်းကောင်း၊ အဆိုပါ ဒေသကာကွယ်ရေးတပ်ဖွဲ့များအချိတ်အဆက်ဖြင့် ဒီပဲယင်းပြည်သူ့ကာကွယ်ရေးတပ်ဖွဲ့ထံသို့သော်လည်းကောင်း ပြန်လည်အပ်နှံကြရန် တိုက်တွန်းထားသည်။
ဒီဇင်ဘာ ၇ ရက်က ဒီပဲယင်းမြို့နယ် အနောက်ခြမ်း အောင်စည်မြေ ကျေးရွာအနီး အကြမ်းဖက်စစ်ကောင်စီ နှင့် ပြည်သူ့ကာကွယ်ရေးပူးပေါင်းတပ်ဖွဲ့များ အပြင်း အထန် တိုက်ပွဲဖြစ်ပွားခဲ့ရာ အကြမ်းဖက်စစ်ကောင်စီ တပ်သား ၅၀ ထက်မနည်း သေဆုံးပြီး ပြည်သူ့ရဲဘော် နှစ်ဦး ကျဆုံးခဲ့သည်။