ပြည်သူအားလုံးပါဝင်မည့် တိတ်ဆိတ်ငြိမ်သက်ခြင်းသပိတ်( Silent Strike)တွင် မြန်မာနိုင်ငံအတွင်းရှိ အစ္စလာမ်ဘာသာဝင်များအားလုံး ပူးပေါင်းပါဝင်ကြရန် မြန်မာနိုင်ငံလုံးဆိုင်ရာ မွတ်ဆလင်လူမျိုးစုများ အတိုင်ပင်ခံကော်မတီက ယနေ့(ဒီဇင်ဘာ ၁၀ရက်) တွင် မေတ္တာရပ်ခံထုတ်ပြန်သည်။
ယနေ့ သောကြာနေ့ဖြစ်နေသည့်အတွက်ရက်သတ္တပတ်၏သောကြာနေ့တိုင်းသည် အစ္စလာမ်ဘာသာဝင်များအတွက် အထွဋ်အမြတ်အထားရာနေ့ဖြစ်သည့်အလျောက် ဗလီတွင် စုပေါင်းဝတ်ပြုမှုသည်လည်း မဖြစ်မနေပြုလုပ်ရမည့်နေ့လည်းဖြစ်သည်။
ထို့ကြောင့် အစ္စလာမ်ဘာသာဝင်များအတွက် သောကြာနေ့ ဝတ်ပြုမှုသည် မဖြစ်မနေ(ဖရဇ်) ပြုလုပ်ရမည်ဖြစ်သောကြောင့် မိမိတို့အနေဖြင့် နေ့လည်ခင်းဝတ်ပြုမှုသွားကြရာတွင် လူစုလူဝေးဖြင့် ဗလီဝတ်ကျောင်းသို့သွားခြင်းများကို ရှောင်ကြဉ်ကြရန် တိုက်တွန်းသည်။
ဗလီဝတ်ကျောင်းများသို့ သိုသိပ်စွာသွားကြပြီး ဝတ်ပြုမှုပြီးသည့်အခါတွင်လည်း ဗလီဝတ်ကျောင်းမှ မိမိတို့နေအိမ်များသို့ ပြန်ကြရာတွင်လည်း လူစုလူဝေးများဖြင့် ပြန်ခြင်းမျိုးမပြုလုပ်ပဲ သိုသိပ်စွာသွားလာခြင်းကိုပြုလုပ်ကြရန်လည်း မေတ္တာရပ်ခံထားသည်။
Public Service Announcement
ယနေ့(ဒီဇင်ဘာ ၁၀ ရက်)သည် ကမ္ဘာ့လူ့အခွင့်အရေးနေ့ဖြစ်ပြီး တစ်နိုင်ငံလုံးအတိုင်းအတာဖြင့်လည်း “တိတ်ဆိတ်ငြိမ်သက်ခြင်းသပိတ်”(Silent Strike)ပြုလုပ်ရန် ပြင်ဆင်နေကြပြီဖြစ်သည်။
မြန်မာနိုင်ငံလုံးရှိ ပြည်သူများက နံနက် ၁၀နာရီမှ ညနေ ၄နာရီအထိ အပြင်မထွက်ဘဲ စစ်အာဏာရှင်ကို ဆန့်ကျင်တော်လှန်ကြောင်းပြသမည့် တိတ်ဆိတ်ငြိမ်သက်ခြင်းသပိတ်ကို တစ်နိုင်ငံလုံးအတိုင်း အတာဖြင့် ပြုလုပ်ရန် ပြည်သူအချင်းချင်း လှုံ့ဆော်ပြင်ဆင်နေသည်။
