စစ်အာဏာသိမ်းမှုအပေါ် နိုင်ငံတကာအသိုက်အဝန်း၏ အချိန်မီထိရောက်သော အရေးယူဆောင် ရွက်မှုမရှိပါက မြန်မာနိုင်ငံကို ကြီးမားသည့် ပဋိပက္ခသို့လုံး၀ကျရောက်စေရန်တွန်းပို့နေကြောင်း ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းက ထပ်မံတောင်းဆိုသည်။
ဒီဇင်ဘာ ၁၀ ရက်တွင် ကျင်းပသည့် ကုလသမဂ္ဂအထွေထွေညီလာခံ၊ မျက်နှာစုံညီအစည်းအဝေး၌ ယင်းသို့တောင်းဆိုခြင်းဖြစ်ပြီး မြန်မာပြည်သူများသည် ယခုလိုများစွာခက်ခဲနေသည့်အချိန်တွင် ကုလသမဂ္ဂအပေါ် ယုံကြည်နေဆဲဖြစ်ကြောင်း မြန်မာသံအမတ်ကြီး ပြောသည်။
မြန်မာနိုင်ငံ၌ ဒီမိုကရေစီပြုပြင်ပြောင်းလဲမှုလမ်းကြောင်းသို့ ပြန်လည် ရောက်ရှိရေးအတွက် နိုင်ငံတကာနှင့် ဒေသတွင်းနိုင်ငံများအနေဖြင့် အမြန်ဆုံးတုန့်ပြန်ဆောင်ရွက်ရန် သံအမတ်ကြီးက ထပ်မံတောင်းဆိုသည်။
ထို့အပြင် မြန်မာနိုင်ငံ၌ ငြိမ်းချမ်ရေးနှင့် တည်ငြိမ်မှုရရှိရေးနှင့် လိုအပ်သည့် လူသားချင်းစာနာ ထောက်ထားမှု အကူအညီများ အဟန့်အတားမရှိ ပံ့ပိုးပေးနိုင်ရေးတို့အတွက် စစ်တပ်အုပ်ချုပ်မှုကို အဆုံးသတ်ရမည်ဖြစ်ကြောင်း ဦးကျော်မိုးထွန်းက ထောက်ပြသည်။
စစ်တပ်၏ လူသားချင်းစာနာထောက်ထားမှုဥပဒေကို အဆိုးဝါးဆုံးချိုးဖောက်နေမှုသည် အကူအညီလိုအပ်နေသူများအား အကူအညီပေးအပ်မှုကို တားဆီးမှုမပြုရန်ဟူသော ကုလသမဂ္ဂလုံခြုံရေး ကောင်စီအပါအဝင် ကုလသမဂ္ဂမှ တောင်းဆိုချက်ကို လက်မခံခြင်းဖြစ် ကြောင်းလည်း မြန်မာသံအမတ်ကြီးက အဖွဲ့ဝင်နိုင်ငံများကို အသိပေးသည်။
မြန်မာစစ်တပ်သည် ဆိုးဝါးသည့် နိုင်ငံတကာလူ့အခွင့် အရေးချိုးဖောက်မှုများနှင့် လူသားချင်းစာနာထောက် ထားမှုဆိုင်ရာဥပဒေများကို ချိုးဖောက်နေဆဲဖြစ်ပြီး ယခုရက်သတ္တပတ်တစ်ပတ်အတွင်းတွင်ပင် စစ်ကိုင်းတိုင်း၌ လူငယ်ငါးဦးအပါအဝင် ပြည်သူ ၁၁ ဦးကို မီးရှို့သတ်ဖြတ်မှု၊ ရန်ကုန်မြို့၌ ငြိမ်းချမ်းစွာဆန္ဒပြနေသူများကို ကားဖြင့်တိုက်သတ်မှုတို့ကို ကျူးလွန်ခဲ့ကြောင်း သံအမတ်ကြီး ဦးကျော်မိုးထွန်းက ကုလသမဂ္ဂသို့ အစီရင်ခံသည်။