ပြည်သူလူထုစားဝတ်နေရေးခက်ခဲနေသည့် ယခုလိုအချိန်တွင် စည်ပင်ဝန်ထမ်းများ စျေးခွန်ကောက်ခံခြင်းမပြုလုပ်ကြရန် မြင်းမူမြို့နယ် ပြည်သူ့ကာကွယ်ရေးတပ်ဖွဲ့များက သတိပေးချက်တစ်စောင် ယနေ့(ဒီဇင်ဘာ ၁၁) ထုတ်ပြန်လိုက်သည်။
မြင်းမူမြို့နှင့် မြို့နယ်တွင်းရှိ ကျေးရွာများတွင်စျေးကောက်အခွန် ကောက်ခံခြင်းကို မနက်ဖြန်(ဒီဇင်ဘာ ၁၂)မှစတင်ကာ ကောက်ခံခြင်း လုံဝမပြုလုပ်ရန် နောက်ဆုံသတိပေးသည်ဟု ထုတ်ပြန်ချက်တွင် ဖော်ပြသည်။
“ပြည်သူများ စားဝတ်နေရေး ခက်ခဲနေချိန်တွင် အခွန်မကောက်ရန်နှင့် ဖက်စစ်အာဏာ သိမ်းစစ်တပ်အတွက် ကျည်ဖိုးမဖြစ်စေရန် အခွန်ကောက်ခံခြင်းများ မပြုလုပ်ရန် နောက်ဆုံးအနေဖြင့် အသိပေးတာမြစ်အပ်ပါသည်”ဟု ထုတ်ပြန်ချက်က ဆိုသည်။
ထိုသို့တားမြစ်သည့်ကြားမှ ဆက်လက်ကောက် ခံနေပါက ဒလန်(စစ်တပ်ထောက်တိုင်)အဖြစ် သတ်မှတ်ပြီး မြင်းမူ PDF နှင့် မဟာမိတ် ညီနောင်များမှ ဒီဇင်ဘာ၁၂ ရက် မှစ၍ အာမခံချက်ပေးမည်မဟုတ်ကြောင်း အသိပေးထားသည်။
အလားတူ မုံရွာမြို့တွင်လည်း စစ်ကောင်စီတပ်များက ယနေ့(ဒီဇင်ဘာ ၁၁)နံနက်က စျေးသည်တချို့ကို ရိုက်နှက်ပြန်လွှတ်သည့်အပြင် စျေးရောင်းခွင့်မပေးသည့်အပေါ် မုံရွာမြို့နယ်ဒေသကာကွယ်ရေးတပ်ဖွဲ့များက သတိပေးစာတစ်စောင် ထုတ်ပြန်ခဲ့သည်။
ယင်းကဲ့သို့ ဒေသကာကွယ်ရေးတပ်များ သတိ ပေးစာထုတ်ပြီးနောက် ယနေ့ညနေပိုင်းတွင်မှ မုံရွာမြို့နယ်စည်ပင်က ရပ်ကွက်လမ်းများအတွင်းလှည့်ကာ စျေးများပုံမှန်ဖွင့်လှစ်ရောင်းချနိုင်ကြောင်း လော်စပီကာများဖြင့် လိုက်လံအသိပေးခဲ့ကြောင်း ဒေသခံများထံမှ သိရသည်။